مغربی بنگال کی وزیر اعلیٰ ممتا بنرجی، بنگال کے سابق برانڈ ایمبیسیڈر اور بالی ووڈ کے مشہور اداکار شاہ رخ خان اور سابق ہندوستانی کپتان سوربھ گنگولی لیونل میسی کا ہفتے کے روز مغربی بنگال کے دارالحکومت میں استقبال کریں گے۔

مغربی بنگال کی وزیر اعلیٰ ممتا بنرجی، بنگال کے سابق برانڈ ایمبیسیڈر اور بالی ووڈ کے مشہور اداکار شاہ رخ خان اور سابق ہندوستانی کپتان سوربھ گنگولی لیونل میسی کا ہفتے کے روز مغربی بنگال کے دارالحکومت میں استقبال کریں گے۔ لیونل میسی نے خود تصدیق کی ہے کہ وہ ۱۳؍ سے۱۵؍ دسمبر ۲۰۲۵ء کے درمیان ہندوستان آ رہے ہیں۔ وہ ۱۲؍ سے ۱۳؍ دسمبر کی شب دبئی کے راستے میامی سے اپنے پرائیویٹ جیٹ کے ذریعے کولکاتا ایئرپورٹ پر اتریں گے، ان کے ساتھ انٹر میامی کے کچھ ساتھی کھلاڑی بھی ہوں گے۔
لیونل میسی کامجسمہ 
شہر کا ماحول میسی کی آمد کے پیش نظر بہت پُرجوش ہے۔ ہوائی اڈے سے لے کر اسٹیڈیم اور ای ایم بائی پاس کے ہوٹل تک سخت حفاظتی انتظامات کیے جا رہے ہیں۔ اسٹیڈیم کے قریب آرٹسٹ مونٹی پال نے لیونل میسی کے اعزاز میں ۷۰؍ فٹ بلند اونچا مجسمہ تیار کیا ہے، جسے ریاستی فائر بریگیڈ کے وزیر سجیت بوس نے اسپانسر کیا ہے۔ توقع ہے کہ میسی اس مجسمے کا افتتاح کریں گے۔یہ مجسمہ ۴۵؍ افراد کی ٹیم نے ۲۷؍ دن کی مسلسل محنت سے تیار کیا ہے۔ مجسمہ میسی کو فیفا ورلڈکپ ٹرافی اٹھائے ہوئے دکھاتا ہے اور اسے کلکتہ کے سری بھومی اسپورٹنگ کلب نے لیک ٹاؤن، ساؤتھ دم دم میں مکمل کیا ہے۔ منتظمین کے مطابق یہ دنیا میں کسی بھی فٹبالر کا سب سے اونچا مجسمہ ہے۔ بالی ووڈ فلم اسٹار اور کولکاتا نائٹ رائیڈرز کے مالک شاہ رُخ خان میسی سے ملنے کے لیے بے حد پُرجوش ہیں۔ میسی کو دنیا کے عظیم ترین فٹبالروں میں سے ایک مانا جاتا ہے۔ میسی ۱۴؍ سال بعد ایک بار پھر کولکاتا پہنچنے والے ہیں۔ آخری بار وہ یہاں اس وقت آئے تھے جب انہوں نے اپنی قومی ٹیم ارجنٹینا کی قیادت کرتے ہوئے وینزویلا کے خلاف ایک دوستانہ میچ کھیلا تھا۔

یہ بھی پڑھئے:ڈزنی نے اوپن اے آئی میں ایک بلین ڈالرس کی سرمایہ کاری کی

شاہ رُخ خان باقاعدگی سے کولکاتا کا دورہ کرتے ہیں، خاص طور پر اُس وقت جب اُن کی ٹیم کے کے آر ہر سیزن آئی پی ایل کے میچ کھیلتی ہے۔ لیکن اس بار ان کا دورہ خاص ہے، کیونکہ یہ مکمل طور پر ارجنٹینا کے عظیم فٹبالر لیونل میسی کے لیے ہے، جنہوں نے اپنی ٹیم کو فیفا ورلڈ کپ ۲۰۲۲ء کا چیمپئن بنایا تھا۔

یہ بھی پڑھئے:ویبھَو کی ریکارڈ سنچری، ہندوستان نے یو اے ای کو شکست دی

شاہ رُخ خان نے میسی سے ملاقات کی خواہش کا اظہار کرتے ہوئے کہاکہ ’’اس بار میں کولکاتا میں اپنی نائٹ (کے کے آر) کی کوئی پلاننگ نہیں کر رہا۔  امید ہے کہ پورا دن میسی کے نام رہے۔ آپ سب سے  ۱۳؍تاریخ کو سالٹ لیک اسٹیڈیم میں ملاقات ہوگی۔‘‘  میسی حیدرآباد میں ایک نمائشی میچ میں بھی حصہ لیں گے اور ممبئی جانے سے پہلے ایک میوزیکل شو میں بھی شریک ہوں گے۔