کپتان سددیش لاڈ اور نائب کپتان آیوش مہاترے کی نظریں ریکارڈ ۴۳؍ویں رنجی ٹرافی خطاب پر ہیں۔ نوجوان اور پُرجوش ممبئی کی ٹیم اتوار کو وانکھیڈے اسٹیڈیم میں چندی گڑھ کے خلاف اپنی مہم کا آغاز کرے گی۔

کپتان سددیش لاڈ اور نائب کپتان آیوش مہاترے کی نظریں ریکارڈ ۴۳؍ویں رنجی ٹرافی خطاب پر ہیں۔ نوجوان اور پُرجوش ممبئی کی ٹیم اتوار کو وانکھیڈے اسٹیڈیم میں چندی گڑھ کے خلاف اپنی مہم کا آغاز کرے گی۔ ممبئی کرکٹ اسوسی ایشن کی جانب سے وانکھیڈے اسٹیڈیم میں منعقد پری سیزن پریس کانفرنس میں لاڈ اور مہاترے نے آئندہ ریڈ بال سیزن کے لیے ٹیم کی تیاریوں، حکمت عملی اور اہداف کے بارے میں بات کی۔ کپتان لاڈ نے ممبئی کی شاندار روایت کو آگے بڑھانے کی ذمہ داری کا ذکر کرتے ہوئے کہا کہ ہندوستانی ڈومیسٹک کرکٹ کی کامیاب ترین ٹیموں میں سے ایک کی نمائندگی کرنے کے ساتھ دباؤ بھی آتا ہے، جسے ٹیم ایک یونٹ کے طور پر قبول کرنا چاہتی ہے۔لاڈ نے کہاکہ ’’ممبئی کی شاندار تاریخ، ہمارے ۴۲؍ رنجی ٹرافی خطاب اور ٹیم کی نمائندگی کرنے والے کھلاڑیوں کی میراث کو دیکھتے ہوئے، جب آپ ممبئی کی جرسی پہنتے ہیں تو دباؤ ہمیشہ رہے گا۔ لیکن ایک یونٹ کے طور پر ہم اس دباؤ کو قبول کرنا چاہتے ہیں، اس سے بھاگنا نہیں۔ ہم تاریخ اور ثقافت کو سمجھتے ہیں۔  نائب کپتان مہاترے نے قیادت کی ذمہ داری اور سینئر کھلاڑیوں کے ساتھ کام کرنے کے تجربے کے بارے میں کہاکہ ممبئی کا نائب کپتان منتخب ہونا میرے لیے بڑی ذمہ داری اور فخر کا لمحہ ہے، خاص طور پر ٹیم کے قد اور رنجی ٹرافی کی ممبئی کرکٹ میں اہمیت کو دیکھتے ہوئے۔ ٹیم کے اندر خود کو پُرسکون محسوس کرنا اور میدان پر پُرسکون رہنے کی اہمیت میں نے سیکھی ہے، جس سے اپنے اور ٹیم کے لیے بہتر فیصلے کرنے میں مدد ملتی ہے۔ 

یہ بھی پڑھئے:افغانستان کے خلاف واحد ٹیسٹ میں بنگلہ دیش مضبوط دعویدار

ممبئی کی ۱۶؍ رکنی ٹیم میں تجربہ کار ڈومیسٹک کھلاڑیوں کے ساتھ ابھرتی ہوئی نوجوان صلاحیتوں کا امتزاج ہے۔ یشسوی جیسوال، سرفراز خان اور مشیر خان جیسے کھلاڑی ٹیم کی مضبوطی اور صلاحیت میں اضافہ کرتے ہیں، جو ریکارڈ ۴۳؍ویں رنجی ٹرافی خطاب کے حصول کے لیے میدان میں اترے گی۔کپتان لاڈ قیادت کے گروپ میں فرسٹ کلاس کرکٹ کا وسیع تجربہ رکھتے ہیں اور اپنے ڈومیسٹک کریئر میں ۵۶۰۰؍ سے زیادہ رنز بناچکے ہیں۔۲۶۔۲۰۲۵ء سیزن کے دوران مڈل آرڈر میں اہم کردار ادا کرتے ہوئے لاڈ نے دباؤ کے حالات میں ممبئی کی ٹیم کو استحکام فراہم کیا۔

یہ بھی پڑھئے:’’ایونجرز: ڈومز ڈے‘‘ نے پیشگی ٹکٹ فروخت میں ۱۰۰؍ ملین ڈالر کا ہندسہ عبور کرلیا

نائب کپتان مہاترے بھی ڈومیسٹک کرکٹ میں تیزی سے آگے بڑھ رہے ہیں۔ ۱۹؍ سالہ اوپننگ بلے باز نے ۱۳؍ فرسٹ کلاس میچوں میں ۶۶۰؍ رنز بنائے ہیں۔ رواں سال کے آغاز میں ہیمسٹرنگ کی چوٹ سے صحت یاب ہونے کے بعد مہاترے کا ٹاپ آرڈر میں پُرسکون انداز ممبئی کی بلے بازی کے لیے اہم ثابت ہوگا۔