زیورخ ڈائمنڈ لیگ مقابلے میں ۰۷ء۹۲؍میٹر کی دوری پر تھرو کرکے طلائی تمغہ جیت لیا۔

زیورخ، (ایجنسی):سری لنکا کے جیولن تھرو اسٹار رومیش تھرنگا پتھیراگے نے زیورخ ڈائمنڈ لیگ ۲۰۲۶ءمیں ۰۷ء۹۲؍میٹر کی شاندار تھرو کے ساتھ طلائی تمغہ جیت لیا۔ ۲۳؍سالہ دولت مشترکہ کھیلوں کے چمپئن نے لیٹزگ  اسٹیڈیم میں ہوئے مقابلے کے چھٹے اور آخری تھرو میں  غرناطہ کے سابق عالمی چمپئن اینڈرسن پیٹرز کو پیچھے چھوڑ دیا۔پیٹرز نے ۹۳ء۸۶؍میٹر کی سیزن کی بہترین تھرو کے ساتھ دوسری پوزیشن حاصل کی جبکہ پولینڈ کے ڈیوڈ ویگنر نے ۱۶ء۸۵؍میٹر کی ذاتی بہترین کارکردگی کے ساتھ تیسرا مقام حاصل کیا۔ تھرنگا مقابلے میں جون میں روم ڈائمنڈ لیگ میں ۶۲ء۹۲؍میٹر کی تھرو کے ساتھ عالمی سرفہرست کھلاڑی کی حیثیت سے اترے تھے۔

یہ بھی پڑھئے: ایشین گیمز کے لیے ہندوستان دوسری درجے کی ٹیم بھیج سکتا ہے

سری لنکن ایتھلیٹ نے مقابلے کا آغاز ۸۱ء۵۰؍میٹر کی تھرو سے کیا اور دوسرے راؤنڈ میں ۴۳ء۸۸؍میٹر تک پہنچے۔ تیسرے  تھرو میں انہوں نے ۸۹ء۹۰؍میٹر کی دوری طے کرکے اپنی برتری مزید مضبوط کرلی جبکہ چوتھی کوشش ۸۴ء۹۱؍ میٹر رہی۔ ان کی پانچویں کوشش فاؤل قرار دی گئی، لیکن آخری راؤنڈ میں انہوں نے اپنا بہترین مظاہرہ کرتے ہوئے جیولن ۹۲ء۰۷؍میٹر دور پھینک دیا۔یہ ان کے کریئر کی دوسری ۹۲؍ میٹر سے زیادہ کی تھرو ہے اور روم میں قائم ان کے قومی ریکارڈ اور عالمی سطح پر رواں سیزن کی بہترین ۶۲ء۹۲؍ میٹر کی کارکردگی سے صرف ۵۵؍ سینٹی میٹر کم ہے۔

اس کامیابی کیساتھ رومیش تھرنگا کا ۲۰۲۶ء  کا شاندار سلسلہ جاری رہا۔ وہ رواں سال اب تک ۱۲؍ میں سے ۱۱؍ مقابلے جیت چکے ہیں اور یہ ان کی مسلسل چھٹی فتح ہے۔ قابل ذکر ہے کہ ہندوستان کے جیولن تھرو اسٹار نیرج چوپڑا نے زیورخ ڈائمنڈ لیگ میں حصہ نہیں لیا۔