سوئنگ کے سلطان وسیم اکرم نے کہا کہ شاہین کو یہ معلوم ہونا چاہئےکہ اصل گیم ٹیسٹ کرکٹ ہے

پاکستان کے سابق تیز گیند بازز وسیم اکرم اور وقار یونس نے آسٹریلیا کے خلاف تیسرے ٹیسٹ میں پاکستانی ٹیم کے  ٹاپ کے تیز گیند باز شاہین آفریدی کو آرام کرانے کے فیصلے کو غلط قرار دیتے ہوئے اس پر شاہین کو تنقید کا نشانہ بنایا ہے۔ذرائع کے مطابق سوئنگ کے سلطان وسیم اکرم نے دعویٰ کیا کہ تیسرے ٹیسٹ میں آرام کا فیصلہ شاہین نے خود کیا اور ٹیم مینجمنٹ کا اس میں کوئی کردار نہیں۔انہوں نے واضح کیا کہ کرکٹروں کو خود فیصلہ کرنا ہوگا کہ وہ امیر بننا چاہتے ہیں یا عظیم کرکٹر، شاہین آفریدی ٹی ٹوینٹی فارمیٹ کے کپتان ضرور ہیں لیکن یہ فارمیٹ صرف پیسہ کمانے کیلئے ہے۔ وسیم اکرم نے کہا کہ شاہین کو یہ معلوم ہونا چاہئے کہ اصل گیم ٹیسٹ کرکٹ ہے۔ادھر اپنی خطرناک اِن سوئنگ یارکر کے لیے مشہور وقار یونس نے بھی شاہین کو آسٹریلیا کے خلاف تیسرے ٹیسٹ میں نہ کھلانے کے فیصلے پر حیرت کا اظہار کیا۔ان کا کہنا تھا کہ مجھے امید تھی کہ شاہین تیسرا ٹیسٹ ضرور کھیلیں گے کیوں کہ انہوں نے دوسرے ٹیسٹ میں اچھی کارکردگی دکھائی تھی۔یاد رہے کہ آسٹریلیا کے خلاف تیسرے ٹیسٹ میں شاہین آفریدی کو آرام دیاگیا ہے۔