ماہرِ معاشیات جواخم کلیمنٹ نے ایک ایسا شماریاتی ماڈل تیار کیا ہے جس نے گزشتہ ۳؍ عالمی کپ کے فاتحین کی بالکل درست پیش گوئی کی تھی۔

جب ۲۰۱۰ء کے فیفا ورلڈ کپ میں پال دی اکٹوپس  نے جرمنی کے تمام میچوں کی درست پیش گوئی کی تھی، تو وہ دنیا بھر میں ایک سنسنی بن گیا تھا۔ لیکن اب، ایک جرمن ماہرِ معاشیات نے ریاضیاتی اور شماریاتی ماڈل کے ذریعے اس سے بھی بڑا کارنامہ انجام دے دیا ہے۔
مختلف رپورٹس کے مطابق، ماہرِ معاشیات جواخم کلیمنٹ نے ایک ایسا شماریاتی ماڈل تیار کیا ہے جس نے گزشتہ ۳؍ عالمی کپ کے فاتحین کی بالکل درست پیش گوئی کی تھی۔ ان کے ماڈل نے ۲۰۱۴ء میں جرمنی، ۲۰۱۸ء میں فرانس اور ۲۰۲۲ء میں ارجنٹائنا کی جیت کی پیش گوئی کی تھی، جو حرف بہ حرف سچ ثابت ہوئی۔ اب ۲۰۲۶ء کے ٹورنامنٹ کے لیے اس ماڈل نے پیش گوئی کی ہے کہ نیدر لینڈز (ڈچ ٹیم) بالآخر پہلی بار ٹرافی اپنے نام کرے گی۔ اگر ایسا ہوتا ہے، تو کلیمنٹ کا ماڈل مسلسل ۴؍ ورلڈ کپ فاتحین کی درست پیش گوئی کرنے کا ناقابلِ یقین ریکارڈ قائم کر دے گا۔
یہ ماڈل صرف چیمپئن کا نام ہی نہیں بتاتا، بلکہ پورے ٹورنامنٹ کا نقشہ بھی کھینچتا ہے۔ ماڈل کے مطابق اس بار کئی بڑے الٹ پھیر دیکھنے کو ملیں گے، جن میں راؤنڈ آف ۳۲؍ میں جاپان کا برازیل کو شکست دینا اور اسی اسٹیج پر جنوبی کوریا کا اسکاٹ لینڈ کو باہر کرنا شامل ہے۔ فٹ بال شائقین کے لیے سب سے سنسنی خیز پیش گوئی کوارٹر فائنل کے حوالے سے ہے، جہاں ارجنٹائنا اور پرتگال کا ٹکراؤ متوقع ہے۔ یہ ورلڈ کپ کی تاریخ میں لیونل میسی اور کرسٹیانو رونالڈو کا آخری اور سب سے بڑا مقابلہ ہو سکتا ہے۔ ماڈل کے مطابق، پرتگال اس بلاک بسٹر میچ میں دفاعی چیمپئن ارجنٹائنا کو شکست دے کر میسی کا ٹائٹل برقرار رکھنے کا خواب توڑ دے گا اور رونالڈو کا ورلڈ کپ جیتنے کا خواب زندہ رہے گا۔ مزید برآں، انگلینڈ سیمی فائنل تک پہنچے گا لیکن ۲۰۰۶ء کی تاریخ دُہراتے ہوئے پرتگال کے ہاتھوں ہی باہر ہو جائے گا۔

یہ بھی پڑھئے:رمیش بابو پرگنانندھا فائنل راؤنڈ میں پہنچے، اساؤبایوا نے خاتون زمرے کا خطاب جیتا

ان پیش گوئیوں کے بعد ڈچ ٹیم کو ایک بڑا جھٹکا لگا ہے۔ اسٹار کھلاڑی زاوی سیمنز گھٹنے کی شدید چوٹ  کے باعث ورلڈ کپ سے باہر ہو چکے ہیں۔ اس کے علاوہ نیدر لینڈز کو حال ہی میں الجزائر کے خلاف ایک دوستانہ میچ میں غیر متوقع شکست کا سامنا کرنا پڑا، جہاں فرانسیسی لیجنڈ زین الدین زیدان کے بیٹے لوکا زیدان نے الجزائر کے گول کیپر کے طور پر شاندار کھیل پیش کیا۔ ان کے منیجر رونالڈ کو مین کو بھی تنقید کا سامنا ہے، لیکن اس ڈچ ٹیم کا دفاع انتہائی مضبوط اور مڈ فیلڈ بہترین ہے۔ اصل سوال یہ ہے کہ گول کون کرے گا؟ ڈونیمل مالین اس وقت روما کی طرف سے زبردست فارم میں ہیں، جبکہ ممفس ڈیپائے (جو اب برازیل میں کھیل رہے ہیں) نیدر لینڈز کے سب سے زیادہ گول کرنے والے کھلاڑی ہیں۔ ان کے علاوہ لیورپول کے کوڈی گاکپو اور کریسینسیو سمر ویل بھی موجود ہیں۔ 

یہ بھی پڑھئے:’’رام چرن کی ’’پیدی‘‘ نے پہلے ہی دن ۱۰۰؍کروڑ کا ہندسہ عبور کر لیا

یاد رہے کہ اسپین نے ۲۰۱۰ء کا ورلڈ کپ صرف ۸؍ گول کر کے اور پورے ٹورنامنٹ میں صرف ۲؍گول کھا کر جیتا تھا۔ انہوں نے فائنل میں نیدر لینڈز کو ہی ہرایا تھا، جس سے یہ ثابت ہوتا ہے کہ مضبوط دفاع اور مڈ فیلڈ کے بل بوتے پر بھی ٹرافی جیتی جا سکتی ہے۔  نیدر لینڈز کی ٹیم ہمیشہ سے فٹ بال کی دنیا میں قریب پہنچ کر رہ جانے والی   ٹیم کہلاتی رہی ہے۔ جوہان کرائف کے دور سے لے کر ۲۰۱۰ء کے فائنل تک، وہ کئی بار ٹرافی کے قریب پہنچے لیکن اسے چھو نہ سکے۔ اس بار ان کے گرد ماضی جیسا گلیمر یا ہائپ نہیں ہے، اور شاید یہی دباؤ کی کمی ان کے حق میں جا سکتی ہے۔ اگر جواخم کلیمنٹ کی یہ پیش گوئی بھی سچ ثابت ہوتی ہے، تو یہ کسی معجزے سے کم نہیں ہوگا اور یہ شماریاتی ماڈل عالمی کپ کی تاریخ کا ایک یادگار حصہ بن جائے گا۔ دوسری طرف، پرتگال اور رونالڈو کے کروڑوں پرستار یہ امید کریں گے کہ فائنل سے متعلق یہ پیش گوئی غلط ثابت ہو اور رونالڈو اپنے کریئر کی آخری حسرت پوری کر سکیں۔