انسانی جسم ایک پیچیدہ اور منظم نظام ہے جو اپنے اندرونی ماحول کو مستقل رکھنے کی کوشش کرتا ہے۔ اس نظام میں حرارت کا مناسب توازن بہت اہمیت رکھتا ہے کیونکہ یہ جسمانی افعال کیلئے ضروری توانائی فراہم کرتی ہے۔ کبھی کبھی جسم کا درجہ حرارت بڑھ جاتا ہے جسے بخار کہتے ہیں توہمارا جسم گرم ہوجاتا ہے۔ کیا آپ نے کبھی غور کیا کہ بخار آنے پر ہمارا جسم گرم کیوں ہو جاتا ہے؟

بخار ایک جسمانی حالت ہے جس میں انسانی جسم کا درجہ حرارت معمول سے بڑھ جاتا ہے، یعنی تقریباً \۳۷؍ ڈگری سلیس سے زیادہ ہو جاتا ہے۔ یہ اکثر جسم میں موجود انفیکشن یا بیماری کی علامت ہوتا ہے اور دراصل جسم کی قدرتی حفاظتی حکمت عملی ہے تاکہ وائرس، بیکٹیریا یا دیگر جراثیم کی افزائش کو روکا جا سکے۔ جب جسم میں جراثیم داخل ہوتے ہیں تو یہ مدافعتی نظام کو فعال کرتے ہیں اور مدافعتی خلیے پروٹین نما کیمیکلز، جیسے پائروجنز (Pyrogens)، خارج کرتے ہیں۔ یہ کیمیکلز دماغ کے ہائپوتھیلمس (Hypothalamus) کو سگنل دیتے ہیں جو جسم کا تھرمو اسٹاٹ کی طرح کام کرتا ہے اور جسمانی درجہ حرارت بڑھانے کا حکم دیتا ہے۔

جسمانی درجہ حرارت بڑھنے کا عمل کئی مراحل میں ہوتا ہے۔ سب سے پہلے، خلیے میٹابولزم کے ذریعے زیادہ توانائی پیدا کرتے ہیں جو حرارت میں تبدیل ہوتی ہے۔ اس دوران عضلات میں لرزش (Shivering) بھی پیدا ہو سکتی ہے تاکہ حرارت مزید بڑھائی جا سکے۔ دوسرا، جسم حرارت کے اخراج کو کم کرتا ہے، یعنی خون کی روانی جلد کی سطح سے اندرونی حصوں کی طرف منتقل ہو جاتی ہے اور پسینے کی پیداوار کم ہو جاتی ہے جس سے جسم گرم رہتا ہے۔ تیسرا، زیادہ درجہ حرارت مائکروبس کی افزائش کو سست کر دیتا ہے اور سفید خلیات (White Blood Cells) کی کارکردگی بہتر ہو جاتی ہے جس سے مدافعتی نظام جراثیم کا مؤثر مقابلہ کر پاتا ہے۔

بخار کے دوران جسم میں دیگر ردعمل بھی ظاہر ہوتے ہیں۔ دل کی دھڑکن بڑھ جاتی ہے تاکہ زیادہ خون اور مدافعتی خلیے متاثرہ حصوں تک پہنچ سکیں۔ جگر اور طحال (تلی) میں آئرن اور زنک کا ذخیرہ بڑھتا ہے کیونکہ یہ معدنیات جراثیم کی افزائش کیلئے ضروری ہیں۔ بخار کے دوران تھکاوٹ، سردی لگنا، اور چکر آنا عام علامات ہیں کیونکہ جسم اپنی توانائی حرارت پیدا کرنے میں استعمال کر رہا ہوتا ہے۔