ساؤ پاؤلو گراں پری میں بارش اور بدلتے موسمی حالات کے درمیان دلچسپ مقابلہ، میک لارن کے لینڈو نورس پہلے، ریڈ بُل کے میکس ورسٹاپن دوسرے اور آئزک حدجار تیسرے مقام پر رہے، مرسڈیز نے ۲۰۲۶ء کا ٹیموں کا عالمی خطاب اپنے نام کرلیا۔

فارمولا ون   کے ۲۰۲۶ء سیزن کی ساؤ پاؤلو گراں پری میں میک لارن کے برطانوی ڈرائیور لینڈو نورس نے شاندار کارکردگی کا مظاہرہ کرتے ہوئے فتح حاصل کرلی، جبکہ ریڈ بُل کے میکس ورسٹاپن نے گرڈ پر ۲۱؍ویں مقام سے ریس شروع کرنے کے باوجود دوسری پوزیشن حاصل کرکے سب کو حیران کردیا۔ برازیل کے انٹرلاگوس سرکٹ پر منعقدہ اس سنسنی خیز ریس میں ریڈ بُل کے آئزک حدجار تیسرے مقام پر رہے۔ دوسری جانب مرسڈیز نے اپنے دونوں ڈرائیوروں جارج رسل اور کیمی انتونیلی کی چوتھی اور پانچویں پوزیشن کے ساتھ ۲۰۲۶ء کی کنسٹرکٹرز چیمپئن شپ اپنے نام کرلی۔ اس طرح مرسڈیز نے نویں مرتبہ ٹیموں کا عالمی خطاب جیت کر ولیمز کے نو خطابات کے ریکارڈ کی برابری بھی کرلی۔ 

یہ بھی پڑھئے:نیلم کوٹھاری نے فرح خان کے ساتھ اپنا خاندانی رشتہ بتایا

۷۱؍ لیپس پر مشتمل یہ ریس ابتدا ہی سے انتہائی دلچسپ رہی۔ بارش کے باعث ٹریک گیلا تھا اور تمام ڈرائیوروں نے انٹرمیڈیٹ ٹائروں کے ساتھ ریس کا آغاز کیا۔ پول پوزیشن سے ریس شروع کرنے والے لینڈو نورس کو ابتدائی مرحلے میں مشکلات کا سامنا کرنا پڑا اور مرسڈیز کے کیمی انتونیلی نے بہترین آغاز کرتے ہوئے پہلی پوزیشن حاصل کرلی۔ ریسنگ بلز کے لیام لاسن بھی نورس کو پیچھے چھوڑ کر دوسرے مقام پر پہنچ گئے۔ تاہم نورس نے جلد ہی اپنی رفتار بہتر بنائی اور لاسن کو پیچھے چھوڑ دیا۔ اس دوران انتونیلی نے کئی لیپس تک اپنی برتری برقرار رکھی، لیکن ٹریک خشک ہونے کے بعد ٹائروں کی تبدیلی اور حکمت عملی نے ریس کا رخ تبدیل کردیا۔ انتونیلی کو ٹائر تبدیل کرنے کے بعد گاڑی کے توازن اور گرفت کے مسائل کا سامنا کرنا پڑا اور وہ پہلے موڑ پر پھسل کر اپنی برتری کھو بیٹھے۔ اس موقع کا فائدہ اٹھاتے ہوئے نورس نے پہلی پوزیشن حاصل کرلی۔

DRIVER STANDINGS (after 20 rounds) Max consolidates second, George moves up to third 👀 #F1 #BrazilGP https://t.co/4sOqlNNtFU

— Formula 1 (@F1) November 8, 2026

ریس کے آخری حصے میں دوبارہ بارش شروع ہوگئی اور ڈرائیوروں کو ایک مرتبہ پھر انٹرمیڈیٹ ٹائروں کا استعمال کرنا پڑا۔ نورس نے مشکل حالات میں بھی اپنی رفتار اور گاڑی پر بہترین کنٹرول برقرار رکھا اور میکس ورسٹاپن کو اپنے قریب آنے کا موقع نہیں دیا۔ انہوں نے ۱۴ء۶۰۲؍ سیکنڈ کی برتری سے ریس جیت لی۔  ریس کی سب سے نمایاں کارکردگی ریڈ بُل کے چار مرتبہ کے عالمی چیمپئن میکس ورسٹاپن نے پیش کی۔ انجن سے متعلق پنالٹی کے باعث انہیں گرڈ پر ۲۱؍ویں مقام سے ریس شروع کرنا پڑی، لیکن انہوں نے غیر معمولی ڈرائیونگ کا مظاہرہ کرتے ہوئے ایک ایک کرکے حریفوں کو پیچھے چھوڑا اور پوڈیم تک پہنچنے میں کامیاب رہے۔
ورسٹاپن نے ابتدائی لیپس میں ہی اپنی پوزیشن بہتر بنانا شروع کردی تھی۔ انہوں نے کئی اہم اوورٹیک کرتے ہوئے ساتویں مقام تک رسائی حاصل کی اور بعد میں اپنی رفتار مزید تیز کردی۔ ریس کے درمیانی مرحلے میں وہ تیسرے اور پھر دوسرے مقام پر پہنچ گئے۔ ریڈ بُل کے ان کے ساتھی ڈرائیور آئزک حدجار نے بھی عمدہ کارکردگی دکھائی اور تیسرے مقام پر ریس مکمل کرکے ٹیم کے لیے ڈبل پوڈیم یقینی بنایا۔ ورسٹاپن کی ۲۱ویں مقام سے دوسرے مقام تک پہنچنے کی یہ کوشش ساؤ پاؤلو گراں پری کی سب سے یادگار کارکردگیوں میں شمار کی جارہی ہے۔  اس ریس کا ایک اور بڑا نتیجہ مرسڈیز کی تاریخی کامیابی کی شکل میں سامنے آیا۔ ٹیم نے ۲۰۲۶ء کی فارمولا ون کنسٹرکٹرز چیمپئن شپ جیت لی۔ یہ ۲۰۲۱ء کے بعد مرسڈیز کا پہلا ٹیموں کا عالمی خطاب ہے۔

یہ بھی پڑھئے:آئزن کوٹ کو دعوت، نیتن یاہو ہاتھ ملتے رہ گئے

مرسڈیز کو چیمپئن شپ جیتنے کے لیے فیراری کے مقابلے میں صرف ۳؍ پوائنٹس زیادہ حاصل کرنے تھے۔ جارج رسل نے چوتھی اور کیمی انتونیلی نے پانچویں پوزیشن حاصل کی، جس سے ٹیم کا مطلوبہ ہدف پورا ہوگیا۔ دوسری جانب فیراری کے چارلس لیکلرک آٹھویں اور لیوس ہیملٹن نویں مقام پر رہے۔ مرسڈیز نے اس کامیابی کے ساتھ اپنا نواں کنسٹرکٹرز خطاب حاصل کیا اور فارمولا ون کی تاریخ میں ولیمز کے برابر پہنچ گئی۔ 
مرسڈیز کے نوجوان ڈرائیور کیمی انتونیلی کے لیے یہ ریس توقعات کے برخلاف رہی۔ انہوں نے شاندار آغاز کرتے ہوئے نورس کو پیچھے چھوڑا اور ابتدائی مرحلے میں ریس کی قیادت بھی کی، لیکن بعد میں دو مرتبہ گاڑی پر کنٹرول کھونے کے باعث انہیں اپنی برتری سے ہاتھ دھونا پڑا۔ قابلِ ذکر ہے کہ انتونیلی نے اس ریس سے ایک ہفتہ قبل میکسیکو سٹی گراں پری میں ڈرائیورز ورلڈ چیمپئن شپ جیت کر تاریخ رقم کی تھی۔ ۲۰؍ سال کی عمر میں وہ فارمولا ون کی تاریخ کے سب سے کم عمر عالمی ڈرائیورز چیمپئن بنے تھے۔ ساؤ پاؤلو میں پانچویں پوزیشن کے باوجود ان کی ٹیم نے کنسٹرکٹرز خطاب حاصل کرلیا۔