بالی ووڈ کی معروف اداکارہ سونالی بیندرے نے اداکاری کے بعد اب فلمی دنیا میں ایک نئے کردار کا آغاز کر دیا ہے۔ وہ فلم ’’سولہ‘‘ کے ذریعے بطور پریزنٹر اپنا نیا سفر شروع کر رہی ہیں۔ ان کا کہنا ہے کہ وہ ایسی کہانیوں کو ناظرین تک پہنچانا چاہتی ہیں جو فلم ختم ہونے کے بعد بھی لوگوں کے دل و دماغ پر نقش چھوڑ جائیں۔

بالی ووڈ کی معروف اداکارہ  سونالی بیندرے  نے اداکاری کے بعد اب فلمی دنیا میں ایک نئے کردار کا آغاز کر دیا ہے۔ وہ فلم ’’سولہ‘‘ کے ذریعے بطور  پریزنٹر  اپنا نیا سفر شروع کر رہی ہیں۔ ان کا کہنا ہے کہ وہ ایسی کہانیوں کو ناظرین تک پہنچانا چاہتی ہیں جو فلم ختم ہونے کے بعد بھی لوگوں کے دل و دماغ پر نقش چھوڑ جائیں۔ سونالی بیندرے نے کہا کہ ’’سولہ‘‘ ان کے لیے محض ایک فلم نہیں بلکہ زندگی کے ایک نئے باب کی شروعات ہے۔ ان کے مطابق انہیں ہمیشہ ایسی کہانیاں پسند آئی ہیں جو انسان کو رک کر سوچنے پر مجبور کر دیں اور زندگی کو ایک نئے زاویے سے دیکھنے کا موقع فراہم کریں۔

یہ بھی پڑھئے:فلم ’’رامائن‘‘ کا ٹریلر جاری، رنبیر کپور اور یش کے درمیان حق اور باطل کی جنگ

انہوں نے کہا’’بطور پریزنٹر یہ میرا پہلا قدم ہے اور میرے لیے بہت معنی رکھتا ہے۔ میں ہمیشہ ایسی فلموں کا انتخاب کرتی رہی ہوں جو ختم ہونے کے بعد بھی ناظرین کے دل و دماغ میں زندہ رہیں۔ ’’سولہ ‘‘ بھی ایسی ہی ایک کہانی ہے۔ جب میں نے پہلی بار اس کی کہانی سنی تو کافی دیر تک خاموش بیٹھی رہی اور اسی کے بارے میں سوچتی رہی۔‘‘
سونالی نے بتایا کہ اس فلم کی کہانی نے انہیں فوری طور پر اپنی طرف متوجہ کیا کیونکہ یہ  امید، حوصلے اور عام انسان کی خاموش طاقت  کی کہانی ہے۔ انہوں نے مزید کہا’’گزشتہ چند برسوں میں بیماری، جدوجہد اور صحت یابی کے سفر نے مجھے امید اور ہمت کی اصل اہمیت سکھائی ہے۔ اسی لیے مجھے محسوس ہوا کہ اپنے نئے سفر کا آغاز ’’سولہ‘‘ جیسی فلم سے کرنا بہترین فیصلہ ہے۔ 

یہ بھی پڑھئے:لٹن داس بنگلہ دیش کی ون ڈے ٹیم کے نئے کپتان مقرر

جب ان سے بطور پریزنٹر ان کے مقصد کے بارے میں سوال کیا گیا تو انہوں نے کہا’’میری خواہش ہے کہ میں ایسی فلموں کی حمایت کروں جو لوگوں کے دلوں کو چھو جائیں اور انہیں جذباتی طور پر متاثر کریں۔ میں نئے فلم سازوں اور ہدایت کاروں کو بھی پلیٹ فارم دینا چاہتی ہوں، جن کی آواز ابھی تک عوام تک نہیں پہنچی، لیکن جن کی کہانیاں ضرور سنی جانی چاہئیں۔‘‘ فلم’’سولہ‘‘ کو  روز موویز  اور کیری آن پکچرز  نے مشترکہ طور پر پروڈیوس کیا ہے  جبکہ یہ فلم ۱۶؍ اکتوبر  کو ملک بھر کے سنیماگھروں میں ریلیز کی جائے گی۔