ہدایتکار انوبھو سنہا نے انکشاف کیا ہے کہ انہوں نے فلم ’’راون‘‘ کے دوران شاہ رخ خان کو غیر معمولی تخلیقی آزادی دی، کیونکہ وہ اداکار کی سامعین پر گرفت پر مکمل اعتماد رکھتے تھے۔ تاہم اب وہ مانتے ہیں کہ ہر فیصلے میں مکمل جھکاؤ دانشمندانہ نہیں تھا۔

انوبھو سنہا نے ماضی کی یادیں تازہ کرتے ہوئے بتایا کہ جب انہوں نے شاہ رخ خان کے ساتھ فلم ’’راون‘‘ پر کام کیا تو وہ اداکار کی تخلیقی بصیرت سے بے حد متاثر تھے۔ فلم کو اکثر ’’اپنے وقت سے آگے‘‘ قرار دیا جاتا ہے، اور اسی وجہ سے ایک مرحلے پر اس کے سیکوئل پر بھی غور کیا جا رہا تھا۔ زوم کو دیے گئے انٹرویو میں سنہا نے اعتراف کیا کہ وہ شاہ رخ کے وژن پر اس قدر بھروسہ کرتے تھے کہ کئی مواقع پر انہوں نے اداکار کی رائے کو حتمی مان لیا۔انہوں نے کہا کہ ’’میں شاہ رخ سے بہت زیادہ متاثر بھی تھا۔ مجھے لگتا تھا کہ اس کو ہم سے زیادہ پتا ہے کہ ناظرین کو کیا پسند ہے۔‘‘ انہوں نے مزید کہا کہ ممکن ہے بعض فیصلے صرف اس بنیاد پر کیے گئے ہوں کہ شاہ رخ نے تجویز دی تھی کہ ’’ہو سکتا ہے میں نے کچھ فیصلے اس لیے کئے ہوں کیونکہ وہ کہہ رہے تھے، اور مجھے لگا کہ اس کو ۱۰۰؍ فیصد پتا ہے۔ شاید مجھے ایسا نہیں سوچنا چاہیے تھا۔‘‘

یہ بھی پڑھئے: وشال بھردواج نے شاہ رخ خان کے ساتھ فلم کا اشارہ دیا

انوبھو سنہا کا کہنا ہے کہ وقت کے ساتھ ان کا نقطہ نظر بدل چکا ہے۔ وہ مانتے ہیں کہ چاہے کوئی اداکار کتنا ہی تجربہ کار کیوں نہ ہو، ہر تجویز پر مکمل انحصار کرنا درست حکمت عملی نہیں۔ انہوں نے واضح کیا کہ وہ ماضی پر پچھتاوا نہیں کرتے، لیکن یہ ضرور سمجھتے ہیں کہ ہدایت کار کے طور پر حتمی ذمہ داری انہی کی تھی۔ انوبھو سنہا اس وقت تاپسی پنو کے ساتھ اپنی نئی فلم ’’اسی‘‘ کے باعث خبروں میں ہیں، جسے ملے جلے ردعمل کا سامنا ہے۔ ایسے میں ’’راون‘‘ کے تجربے پر ان کا کھلا اعتراف سوشل میڈیا پر بھی بحث کا موضوع بن گیا ہے۔