دنیا کے مشہور موسیقی میلے کوچیلا ویلی میوزک اینڈ آرٹس فیسٹیول ۲۰۲۷ء کی تاریخوں، فنکاروں کی فہرست اور ٹکٹوں کی قیمتوں کا اعلان کردیا گیا ہے۔ اگلے سال ہونے والے اس بڑے میوزک فیسٹیول میں عالمی شہرت یافتہ گلوکارہ دعا لیپا، معروف موسیقار ٹیم امپالا اور گلوکارہ ایس زیڈ اے مرکزی فنکاروں کی حیثیت سے پرفارم کریں گے۔

 دنیا کے مشہور موسیقی میلے کوچیلا ویلی میوزک اینڈ آرٹس فیسٹیول ۲۰۲۷ء کی تاریخوں، فنکاروں کی فہرست اور ٹکٹوں کی قیمتوں کا اعلان کردیا گیا ہے۔ اگلے سال ہونے والے اس بڑے میوزک فیسٹیول میں عالمی شہرت یافتہ گلوکارہ دعا لیپا، معروف موسیقار ٹیم امپالا اور گلوکارہ ایس زیڈ اے مرکزی فنکاروں کی حیثیت سے پرفارم کریں گے، جبکہ عالمی شہرت یافتہ پاپ اسٹار میڈونا، ہندوستانی گلوکار دلجیت دوسانجھ، ڈیڈی یانکی، فوبی بریجرز اور دیگر نامور فنکار بھی اپنی موسیقی سے شائقین کو محظوظ کریں گے۔  فیسٹیول کے دونوں ویک اینڈ کے لیے ٹکٹوں کی عام فروخت ۱۳؍ نومبر سے شروع ہوگی اور ابتدائی دستیاب قیمت ۷۷۹؍ امریکی ڈالر رکھی گئی ہے۔
کوچیلا ۲۰۲۷ء کا انعقاد امریکی ریاست کیلیفورنیا کے شہر انڈیو میں واقع ایمپائر پولو کلب میں کیا جائے گا۔ یہ موسیقی میلہ دو مرحلوں میں منعقد ہوگا۔ پہلا ویک اینڈ ۹؍ سے ۱۱؍ اپریل ۲۰۲۷ء تک جاری رہے گا، جبکہ دوسرا ویک اینڈ ۱۶؍ سے ۱۸؍ اپریل تک منعقد ہوگا۔ دونوں ویک اینڈ میں تقریباً ایک جیسی فنکاروں کی فہرست ہوگی، جس میں پاپ، راک، ہپ ہاپ، آر اینڈ بی، الیکٹرانک ڈانس میوزک اور دیگر موسیقی کی اصناف سے تعلق رکھنے والے فنکار شامل ہیں۔

یہ بھی پڑھئے:یش کی راون کے کردار میں شاندار پرفارمنس پر فلمی دنیا سے بھرپور ستائش

مرکزی فنکارفیسٹیول کے پہلے دن یعنی جمعہ کو برطانوی پاپ گلوکارہ دعا لیپا مرکزی فنکار کی حیثیت سے اسٹیج پر جلوہ گر ہوں گی۔ ان کے ساتھ زارا لارسن، اسٹیو لیسی، کیہلانی، بلیک پنک کی جیسو، پیگی گو اور بھارتی گلوکار دلجیت دوسانجھ سمیت متعدد فنکار پرفارم کریں گے۔ اسی دن میڈونا بھی ڈانس ٹینٹ میں خصوصی پرفارمنس دیں گی، جو اس فیسٹیول کی سب سے زیادہ متوقع پیشکشوں میں سے ایک ہے۔ہفتہ کے روز آسٹریلوی موسیقی پروجیکٹ ٹیم امپالا مرکزی توجہ کا مرکز ہوگا، جس کی قیادت موسیقار کیون پارکر کرتے ہیں۔ اس دن فوبی بریجرز، ویزر، روبن، ٹیئسٹو، مارٹن گارکس، مانسکن، انڈرورلڈ اور لیون برجز جیسے فنکار بھی اپنی صلاحیتوں کا مظاہرہ کریں گے۔اتوار کو فیسٹیول کا اختتام گلوکارہ ایس زیڈ اے کی مرکزی پرفارمنس کے ساتھ ہوگا۔ ان کے علاوہ ڈان ٹولیور، ڈوم ڈولا، کائگو، بیکی جی، بیبی مونسٹر، وکٹوریہ مونیٹ، جورجا اسمتھ اور دی نیبرہڈ سمیت کئی فنکار اس دن اسٹیج پر نظر آئیں گے۔  
میڈونا کی واپسی، ڈیڈی یانکی کی خصوصی پرفارمنس کوچیلا ۲۰۲۷ء کی نمایاں خصوصیات میں میڈونا کی شرکت بھی شامل ہے۔ وہ ڈانس ٹینٹ میں خصوصی پرفارمنس دیں گی۔ میڈونا اس سے قبل ۲۰۰۶ء میں بھی کوچیلا فیسٹیول میں شرکت کرچکی ہیں، اس لیے ان کی واپسی کو موسیقی کے شائقین کے لیے خاص اہمیت حاصل ہے۔ اس کے علاوہ پورٹو ریکو کے معروف گلوکار ڈیڈی یانکی کو بھی خصوصی طور پر ’’اِن دی ڈیزرٹ‘‘ کے عنوان سے جگہ دی گئی ہے۔ فرانسیسی الیکٹرانک موسیقی کی جوڑی جسٹس بھی اپنے خصوصی پروجیکٹ ’بلائنڈڈ بائی دی لائٹس‘ کے ساتھ فیسٹیول میں شرکت کرے گی۔
ہندوستانی موسیقی کے شائقین کے لیے اس فیسٹیول کی ایک بڑی خبر دلجیت دوسانجھ کی واپسی ہے۔ وہ ۹؍ اپریل کو پہلے ویک اینڈ کے دوران پرفارم کریں گے۔ دلجیت نے۲۰۲۳ء میں کوچیلا میں اپنی پہلی پرفارمنس کے ذریعے تاریخ رقم کی تھی اور اس عالمی موسیقی میلے میں پرفارم کرنے والے پہلے بڑے پنجابی گلوکار بنے تھے۔ اب چار سال بعد ان کی واپسی سے ایک مرتبہ پھر پنجابی موسیقی کو عالمی سطح پر نمایاں ہونے کا موقع ملے گا۔ ان کے ساتھ اسی دن دعا لیپا، میڈونا، بلیک پنک کی جیسو، زارا لارسن اور دیگر عالمی فنکار بھی پرفارم کریں گے۔

یہ بھی پڑھئے:رضوان اللہ کے پانچ وکٹ ، پاکستان انڈر ۱۹؍ ایشیا کپ کے فائنل میں داخل

کوچیلا انتظامیہ کے مطابق فیسٹیول کے دونوں ویک اینڈ کے لیے ٹکٹوں کی عام فروخت جمعہ ۱۳؍ نومبر ۲۰۲۶ء کو دوپہر ۱۲؍ بجے (امریکی بحرالکاہل کے معیاری وقت کے مطابق) شروع ہوگی۔ ٹکٹوں کی قیمتوں کی تفصیل درج ذیل ہے: جنرل انٹری کے ساتھ تین دن کی شٹل بس سہولت: ۷۷۹؍ ڈالر، دونوں ویک اینڈ کے لیے۔  وی آئی پی پاس، پہلا ویک اینڈ: ۱،۳۹۹؍ ڈالر۔ وی آئی پی پاس، دوسرا ویک اینڈ: ۱،۳۹۹؍ ڈالر۔واضح رہے کہ جنرل انٹری کے عام پاس پہلے ہی فروخت ہوچکے ہیں، اس لیے فی الحال شٹل بس سہولت کے ساتھ جنرل انٹری پاس دستیاب فروختی اختیارات میں شامل ہے۔ وی آئی پی پاس رکھنے والوں کو خصوصی مقامات، بہتر نشستوں، سایہ دار جگہوں اور دیگر سہولتوں تک رسائی حاصل ہوگی۔ انتظامیہ نے واضح کیا ہے کہ قیمتیں دستیابی کے مطابق تبدیل ہوسکتی ہیں۔ جو شائقین امریکہ پہنچ کر اس فیسٹیول میں شرکت نہیں کرسکیں گے، ان کے لیے بھی خوش خبری ہے۔ کوچیلا کی پرفارمنسز کی براہِ راست نشریات یوٹیوب پر بھی دستیاب ہوں گی۔ اس طرح دنیا بھر میں موجود موسیقی کے شائقین گھر بیٹھے اپنے پسندیدہ فنکاروں کی پرفارمنس سے لطف اندوز ہوسکیں گے۔ دعا لیپا، میڈونا، دلجیت دوسانجھ اور دیگر عالمی فنکاروں کی موجودگی کے باعث کوچیلا ۲۰۲۷ء کو آئندہ سال کے اہم ترین عالمی موسیقی میلوں میں شمار کیا جارہا ہے۔