آدتیہ دھر کی آنے والی فلم’’دھرندھر: دی ریوینج‘‘ کا رن ٹائم تقریباً چار گھنٹے بتایا جا رہا ہے، جس کے باعث سنگل اسکرین سنیما مالکان کو خدشہ ہے کہ وہ ایک دن میں محدود شوز ہی چلا سکیں گے۔

بالی ووڈ کی بڑی ایکشن فلم’’دھرندھر: دی ریوینج‘‘ ریلیز سے پہلے ہی اپنی غیر معمولی طوالت کی وجہ سے خبروں میں آ گئی ہے۔ رپورٹس کے مطابق فلم کا رن ٹائم تقریباً ۳؍ گھنٹے ۵۵؍ منٹ ہے، جس کی وجہ سے یہ ہندی سنیما کی طویل ترین فلموں میں شامل ہو گئی ہے۔ یہ فلم آدتیہ دھر کی ۲۰۲۵ء کی فلم’’دھرندھر‘‘ کا سیکوئل ہے، جس میں رنویر سنگھ، اکشے کھنہ، سنجے دت اور ارجن رامپال نے اہم کردار ادا کیے تھے۔ پہلی فلم کا دورانیہ بھی کافی طویل تھا اور اس کا رن ٹائم ۳؍ گھنٹے ۳۴؍  منٹ تھا۔ نئی فلم کے تقریباً چار گھنٹے طویل ہونے کی وجہ سے سنگل اسکرین سنیما گھروں کے مالکان نے خدشہ ظاہر کیا ہے کہ وہ ایک دن میں زیادہ سے زیادہ چار شوز ہی چلا سکیں گے۔ عام طور پر مختصر دورانیے والی فلموں کے لیے ایک ہی دن میں زیادہ اسکریننگ ممکن ہوتی ہے، جس سے ٹکٹ فروخت بڑھتی ہے۔

یہ بھی پڑھئے: سپر مین کے سیکوئل میں آرون پیئر ’’گرین لینٹن‘‘ کا کردار اداکریں گے

تجزیہ کاروں کا کہنا ہے کہ اگرچہ لمبی فلمیں بعض اوقات ناظرین کے لیے چیلنج بن جاتی ہیں، لیکن بڑے پیمانے پر بننے والی تاریخی یا ایکشن فلموں میں طویل دورانیہ غیر معمولی نہیں سمجھا جاتا۔ فلم’’دھرندھر: دی ریوینج‘‘ اس وقت ہندی سنیما کی چوتھی طویل ترین فلموں میں شمار کی جا رہی ہے۔ اس سے زیادہ دورانیہ رکھنے والی فلموں میں جے پی دتہ کی جنگی فلم’’ایل او سی: کارگل‘‘ شامل ہے جس کا رن ٹائم ۴؍ گھنٹے ۱۵؍  منٹ تھا، جبکہ راج کپور کی کلاسک فلم’’میرا نام جوکر‘‘ کا دورانیہ ۴؍ گھنٹے ۸؍ منٹ تھا۔ اسی طرح راج کپور کی ایک اور مشہور فلم’’سنگم‘‘ تقریباً ۳؍ گھنٹے ۵۸؍ منٹ طویل تھی، جو طویل ترین ہندی فلموں کی فہرست میں نمایاں مقام رکھتی ہے۔

یہ بھی پڑھئے: ٹموتھی شالامے کے بیلے اور اوپیرا پر تبصرے، آسکر میں نئی بحث

اگر مجموعی طور پر سب سے طویل ہندی فلم کی بات کی جائے تو ۱۹۸۸ء کی فلم’’تمس‘‘ تقریباً ۴؍ گھنٹے ۵۸؍ منٹ طویل تھی، تاہم یہ دراصل ایک ٹی وی فلم تھی اور اسے سنیما گھروں میں باقاعدہ ریلیز نہیں کیا گیا تھا۔ ’’دھرندھر: دی ریوینج‘‘ کی کاسٹ میں رنویر سنگھ، سنجے دت، ارجن رامپال، آر مادھاون، سارہ ارجن، دانش پنڈور، گورو گیرا اور راکیش بیدی سمیت کئی اداکار شامل ہیں۔ فلم ۱۹؍ مارچ ۲۰۲۶ء کو سنیما گھروں میں ریلیز ہونے والی ہے جبکہ اس کی خصوصی پیڈ اسکریننگ ۱۸؍ مارچ کی شام بجے سے ہوگی۔