اجے دیوگن کی فلم ’درشیم: دی کنکلوژن‘ نے ریلیز کے محض ۸؍ دنوں میں دنیا بھر میں تقریباً ۴۰۰؍ کروڑ روپے کا کاروبار کرکے اداکار کی اب تک کی سب سے زیادہ کمائی کرنے والی فلم کا اعزاز حاصل کرلیا ہے۔ فلم ہندوستانی باکس آفس پر بھی ۴۰۰؍ کروڑ روپے کی کمائی کی جانب گامزن ہے۔

اجے دیوگن نے ابھیشیک پاٹھک کی ہدایتکاری میں بننے والی فلم ’’درشیم: دی کنکلوژن‘‘ کے ذریعے اپنے فلمی کریئر کی سب سے بڑی بلاک بسٹر فلم پیش کی ہے۔ فلم میں تبو، شریا سرن، ایشیتا دتہ، مرنال جادھو، کملیش ساونت، پرکاش راج اور جے دیپ اہلاوت بھی اہم کرداروں میں نظر آ رہے ہیں۔ فلم ’’درشیم: دی کنکلوژن‘‘ اس مقبول فلمی سلسلے کی آخری فلم ہے۔

فلم ’’درشیم: دی کنکلوژن‘‘ نے ریلیز کے ابتدائی ویک اینڈ پر ہندوستانی باکس آفس پر ۱۷۴؍ کروڑ روپے کا کاروبار کیا۔ اگرچہ ہفتے کے دوران فلم کی کمائی میں کمی دیکھی گئی، لیکن اس کے باوجود فلم کی آمدنی کا سلسلہ مضبوط رہا اور اس کے بڑی تجارتی کامیابی حاصل کرنے کے امکانات برقرار رہے۔ فلم نے ہندوستان میں آٹھ دنوں کے اندر ۲۶۰؍ کروڑ روپے سے زیادہ کا کاروبار کیا، جس کے بعد یہ اجے دیوگن کی ہندوستان میں سب سے زیادہ کمائی کرنے والی فلموں میں تیسرے نمبر پر آگئی۔ اس نے فلم ’’درشیم ۲‘‘ کو پیچھے چھوڑ دیا، جبکہ اس سے آگے فلم ’’سنگھم اگین‘‘ (۲۶۸ء۳۵؍ کروڑ روپے) اور فلم ’’تاناجی: دی اَن سنگ واریئر‘‘ (۲۷۹ء۵۵؍ کروڑ روپے) ہیں۔

یہ بھی پڑھئے: بگ باس ۲۰: امَن گاندھی کا ’مسلم‘ آبادی سے متعلق متنازع جملہ، قاضی توقیر کو نشانہ بنایا

تاہم، عالمی باکس آفس پر فلم ’’درشیم: دی کنکلوژن‘‘ اب اجے دیوگن کی سب سے زیادہ کمائی کرنے والی فلم بن گئی ہے۔ اس نے فلم ’’سنگھم اگین‘‘ کے ۳۸۹ء۶۴؍ کروڑ روپے کے عالمی کاروبار کو پیچھے چھوڑ دیا ہے۔

اجے دیوگن کی عالمی باکس آفس پر سب سے زیادہ کمائی کرنے والی پانچ فلمیں درج ذیل ہیں:

۱۔ فلم ’’درشیم: دی کنکلوژن‘‘ (۲۰۲۶ء) تقریباً ۴۰۰؍ کروڑ روپے (آٹھ دنوں کا کاروبار)

۲۔ فلم ’’سنگھم اگین‘‘ (۲۰۲۴ء) ۳۸۹ء۶۴؍ کروڑ روپے

۳۔ فلم ’’تاناجی: دی اَن سنگ واریئر‘‘ (۲۰۲۰ء) ۳۶۷ء۶۵؍ کروڑ روپے

۴۔ فلم ’’درشیم ۲‘‘ (۲۰۲۲ء) ۳۴۵ء۰۵؍ کروڑ روپے

۵۔ فلم ’’گول مال اگین‘‘ (۲۰۱۷ء) ۳۱۱ء۱۸؍ کروڑ روپے

یہ بھی پڑھئے: نانا پاٹیکر کو فنکار زہیب خان کا منفرد خراجِ عقیدت، دیوار پر کوئلے سے بلند تصویربنائی

فلم کی ریلیز کے دوسرے ویک اینڈ، یعنی دسویں دن تک، فلم ’’درشیم: دی کنکلوژن‘‘ ہندوستان میں بھی اجے دیوگن کی سب سے زیادہ کمائی کرنے والی فلم بن جائے گی۔ اس کے علاوہ، یہ عالمی باکس آفس پر ۵۰۰؍ کروڑ روپے کا کاروبار کرنے والی اجے دیوگن کی پہلی فلم بھی بن سکتی ہے۔ یہی نہیں، فلم اب ہندوستان میں کم از کم ۴۰۰؍ کروڑ روپے کی کمائی کرنے کی راہ پر بھی گامزن ہے۔ اگر ایسا ہوتا ہے تو اس کا عالمی باکس آفس کاروبار ۶۰۰؍ کروڑ روپے تک پہنچ سکتا ہے۔