آسکر ایوارڈ یافتہ ہالی ووڈ اداکارہ جینیفر لارنس نے سان سیباسٹین فلم فیسٹیول میں پریس کانفرنس کے دوران غزہ کی صورتحال کو ’’نسل کشی سے کم نہیں‘‘ قرار دیتے ہوئے کہا کہ وہ اس المیے پر شدید خوفزدہ اور افسردہ ہیں۔ انہوں نے زور دیا کہ فنکار عالمی بحران حل نہیں کر سکتے، ذمہ داری عوامی نمائندوں پر ہے۔

ہالی ووڈ اداکارہ اور آسکر ایوارڈ یافتہ اسٹار جینیفر لارنس نے جمعہ کو سان سیباسٹین فلم فیسٹیول میں ایک پریس کانفرنس کے دوران غزہ میں جاری تنازع پر کھل کر بات کی اور اسے ’’نسل کشی سے کم نہیں‘‘ قرار دیا۔ لارنس اپنی نئی فلم ’’ڈائی مائی لو‘‘ کی تشہیر اور فیسٹیول کے ڈونوسٹیا ایوارڈ وصول کرنے کیلئے اسپین میں موجود تھیں۔ انہوں نے کہا کہ ’’میں خوفزدہ ہوں اور یہ افسوسناک ہے۔ جو کچھ ہو رہا ہے وہ نسل کشی سے کم نہیں اور یہ ناقابل قبول ہے۔ میں اپنے بچوں کیلئے، اپنے تمام بچوں کیلئے خوفزدہ ہوں۔‘‘

“What’s happening is no less than a genocide & unacceptable.”

Oscar winner Jennifer Lawrence spoke up for Palestine at the San Sebastian film festival press conference today pic.twitter.com/HoRDsuw60x

— The Resonance (@Partisan_12) September 26, 2025

امریکی سیاست پر بات کرتے ہوئے لارنس نے عوامی گفتگو کے موجودہ معیار پر گہری مایوسی ظاہر کی۔ ان کا کہنا تھا کہ ’’یہ افسوسناک ہے کہ آج امریکہ میں پروان چڑھنے والے بچوں کیلئے سیاست میں کوئی صداقت، ہمدردی یا سچائی باقی نہیں۔ جب دنیا کے ایک کونے میں ہونے والے المیے کو نظر انداز کیا جاتا ہے تو زیادہ دیر نہیں لگتی کہ وہ بحران آپ کے دروازے پر بھی آ جائے۔‘‘ ’’ہنگر گیمز‘‘ کی اداکارہ نے زور دیا کہ فنکاروں سے عالمی بحرانوں کو حل کرنے کی توقع نہیں کی جانی چاہئے۔ انہوں نے کہا کہ ’’میری خواہش ہے کہ میں اس پیچیدہ اور شرمناک صورتحال کو بدلنے کیلئے کچھ کر سکتی، لیکن حقیقت یہ ہے کہ ہمارے الفاظ اکثر سیاستدانوں کے ہاتھوں محض بیان بازی کیلئے استعمال ہوتے ہیں۔‘‘

یہ بھی پرھئے: جبران خان کو ان کے ہی کیفے منیجر نے ۳۵؍لاکھ کا چونا لگایا

لارنس نے مزید کہا کہ عوام کو یہ دیکھنے کی ضرورت ہے کہ اصل ذمہ دار کون ہیں اور انہیں کب جوابدہ بنانا ہے اور ووٹ دینا ہے۔ ان کے مطابق، فنکاروں کی آزادی اظہار کو سیاست کے بوجھ تلے دبانا نہیں چاہئے۔ انہوں نے امریکہ میں بڑھتی ہوئی سیاسی تقسیم کے تناظر میں اظہار رائے کی آزادی کی اہمیت پر بھی زور دیا، اور کہا کہ ’’ہم ایک دوسرے کی کہانیاں دیکھ سکتے ہیں، جڑ سکتے ہیں اور سیکھ سکتے ہیں۔ سب کو ہمدردی اور آزادی کے یکساں حقوق حاصل ہیں۔‘‘

یہ بھی پڑھئے: ایما واٹسن نے ہیری پوٹر کے دوران سخت سبق کا انکشاف کیا

واضح رہے کہ لارنس کی فلم ’’ڈائی مائی لو‘‘ جس کی ہدایتکاری کے فرائض لین رمسے نے انجام دیئے ہیں اور رابرٹ پیٹنسن شریک ہدایتکار ہیں، ایک عورت گریس (لارنس) کی کہانی بیان کرتی ہے جو ذہنی صحت کے بگڑنے اور شادی پر اس کے اثرات سے دوچار ہے۔ فلم کا پہلا پریمیئر مئی میں کانز میں ہوا تھا، جہاں اسے چھ منٹ تک کھڑے ہو کر داد ملی تھی۔