ہالی ووڈ کے معروف اداکار جارج کلونی نے انکشاف کیا ہے کہ وہ اپنے بچوں کو ہالی ووڈ کے گلیمر اور شہرت سے دور رکھنے کیلئے فرانس کے ایک فارم ہاؤس میں ان کی پرورش کر رہے ہیں۔ ان کا کہنا ہے کہ وہ نہیں چاہتے کہ ان کے بچے پاپرازیوں کے تعاقب یا مشہور والدین کے دباؤ میں زندگی گزاریں۔

ہالی ووڈ کے ۶۴؍ سالہ سینئر اداکار جارج کلونی نے ایک حالیہ انٹرویو میں اعتراف کیا کہ وہ اپنے جڑواں آٹھ سالہ بچوں ایلا اور الیگزینڈر کو شہرت کے شور شرابے سے دور رکھنا چاہتے ہیں۔ کلونی اپنی اہلیہ اور معروف انسانی حقوق کی وکیل امل کلونی کے ساتھ فرانس میں رہائش پذیر ہیں، جہاں وہ اپنے بچوں کی پرورش فطرت کے قریب ماحول میں کر رہے ہیں۔کلونی نے امریکی تفریحی میگزین ایسکوائر سے گفتگو کرتے ہوئے کہا کہ ’’ان (ایلا اور الیگزینڈر) کی زندگی اب بہت بہتر ہے۔ میں ہالی ووڈ کے ماحول میں، خاص طور پر لاس اینجلس میں، اپنے بچوں کی پرورش کے بارے میں فکرمند تھا۔ مجھے لگا کہ وہ ایسی زندگی میں کبھی سکون سے نہیں جی سکیں گے۔‘‘
انہوں نے مزید کہا کہ فرانس میں شہرت کی دوڑ یا پاپرازی کلچر کا وجود نہ ہونے کے برابر ہے، اور وہ نہیں چاہتے کہ ان کے بچے اس دباؤ کا شکار ہوں۔ انہوں نے کہا کہ ’’میں نہیں چاہتا کہ وہ پاپرازیوں سے بچنے کیلئے چھپتے پھریں یا ان کا موازنہ کسی اور کے مشہور بچوں سے کیا جائے۔‘‘ اداکار نے یہ بھی بتایا کہ وہ چاہتے ہیں ان کے بچے خود کفیل ہوں۔ اس مقصد کیلئے وہ انہیں فارم کے کاموں میں حصہ لینے اور عملی مہارتیں سیکھنے کی ترغیب دیتے ہیں۔ اسی گفتگو میں کلونی نے امریکی صدر ڈونالڈ ٹرمپ کے بیرون ملک بننے والی فلموں پر ۱۰۰؍ فیصد ٹیرف لگانے کے فیصلے پر تنقید کرتے ہوئے کہا کہ یہ ’’ایک حقیقی مسئلے کا غلط حل‘‘ ہے۔
کلونی کا کہنا تھا کہ فلم انڈسٹری کی ملازمتیں کیلیفورنیا سے اس لئے ختم ہو رہی ہیں کیونکہ وہاں نیویارک یا نیو جرسی جیسی ریاستوں کی طرح ٹیکس مراعات نہیں ملتیں۔ انہوں نے تجویز دی کہ وفاقی سطح پر فلم انڈسٹری کیلئے ایسی مراعات فراہم کی جائیں جو دیگر ریاستوں میں پہلے سے موجود ہیں۔واضح رہے کہ اداکار اس وقت اپنے دو آنے والے پروجیکٹس پر کام کر رہے ہیں، جن میں نیٹ فلکس کی فلم ’’جے کیلی‘‘ (J.Kelly) شامل ہے جس میں وہ ایڈم سینڈلر کے ساتھ اداکاری کر رہے ہیں جبکہ دوسرا منصوبہ ایک ڈرامہ ’’دی ہیومن کنڈیشن‘‘ (The Human Condition) ہے۔