شہر کے مختلف مقامات پر کنگ خان کی سالگرہ کے استقبال کی تیاریاں شروع ہو گئی ہیں۔ ان کے گھر ’منت‘ کے باہر ایک بڑی اسکرین نصب کی گئی ہے، جبکہ باندرہ-ورلی سی لنک کو بھی شاہ رخ خان کی آنے والی فلم ’کنگ‘ کے پوسٹر سے سجایا گیا ہے۔ ان منفرد انتظامات نے شہر میں جشن کا ماحول پیدا کر دیا ہے اور مداح اپنے پسندیدہ اداکار کی سالگرہ کا بے صبری سے انتظار کر رہے ہیں۔

بالی ووڈ کے سپر اسٹار شاہ رخ خان کی ۶۱؍ویں سالگرہ سے قبل ممبئی میں ان کے مداحوں کا جوش و خروش عروج پر پہنچ گیا ہے۔ شہر کے مختلف مقامات پر کنگ خان کی سالگرہ کے استقبال کی تیاریاں شروع ہو گئی ہیں۔ ان کے گھر ’منت‘ کے باہر ایک بڑی اسکرین نصب کی گئی ہے، جبکہ باندرہ-ورلی سی لنک کو بھی شاہ رخ خان کی آنے والی فلم ’کنگ‘ کے پوسٹر سے سجایا گیا ہے۔ ان منفرد انتظامات نے شہر میں جشن کا ماحول پیدا کر دیا ہے اور مداح اپنے پسندیدہ اداکار کی سالگرہ کا بے صبری سے انتظار کر رہے ہیں۔شاہ رخ خان کی سالگرہ سے قبل ممبئی کے مشہور باندرہ ورلی سی لنک کو ان کی آنے والی فلم’’کنگ‘‘ کے پوسٹر اور خصوصی تشہیری پیغام سے روشن کیا گیا۔ اس دلکش منظر کی تصاویر اور ویڈیوز سوشل میڈیا پر تیزی سے وائرل ہو رہی ہیں۔ مداحوں نے اس اقدام کو اپنے پسندیدہ اداکار کے لیے شہر کی جانب سے ایک خاص خراجِ تحسین قرار دیا ہے۔ سی لنک پر شاہ رخ خان کی تصویر اور فلم ’’کنگ‘‘ کی تشہیر نے ممبئی کے آسمان کو ایک الگ ہی رنگ دے دیا ہے۔ 

یہ بھی پڑھئے:ڈیوڈ وارنر نے آسٹریلیا کی کارکردگی کو ’شرمناک‘ قرار دے دیا

اس خصوصی منظر نے خود شاہ رخ خان کو بھی متاثر کیا۔ اطلاعات کے مطابق اداکار نے سی لنک پر اپنی فلم کے پوسٹر اور روشنیاں دیکھنے کے لیے گاڑی میں وہاں کا رخ کیا اور اس منظر کی تصویر بھی سوشل میڈیا پر شیئر کی۔ انہوں نے اپنے پیغام میں اس محبت کے لیے شکریہ ادا کیا اور مزاحیہ انداز میں بتایا کہ اس خوبصورت منظر کو دیکھنے کے لیے انہیں چپکے سے ڈرائیو پر نکلنا پڑا۔ شاہ رخ خان کی رہائش گاہ منت کے باہر بھی سالگرہ کی تقریبات کے لیے بڑے پیمانے پر تیاریاں کی گئی ہیں۔ بنگلے کے سامنے ایک بڑی ڈجیٹل اسکرین یا ڈسپلے نصب کیا گیا ہے، جس کے بعد یہ قیاس آرائیاں تیز ہوگئی ہیں کہ ۲؍ نومبر کو ان کی نئی فلم ’’کنگ‘‘ کی جھلک یا کوئی خصوصی تشہیری مواد یہاں دکھایا جا سکتا ہے۔
میڈیا رپورٹس کے مطابق مداحوں کو امید ہے کہ سالگرہ کے موقع پر فلم کا ٹیزر یا کوئی نیا پروموشنل مواد جاری کیا جائے گا۔ فلم کے ہدایت کار سدھارتھ آنند کی جانب سے سوشل میڈیا پر آدھی رات کے وقت کی گئی پراسرار پوسٹس نے بھی ان قیاس آرائیوں کو تقویت دی ہے۔ تاہم فلم سازوں کی جانب سے ٹیزر کی نمائش یا کسی مخصوص پروگرام کی مکمل تفصیلات کی باضابطہ تصدیق نہیں کی گئی ہے۔  شاہ رخ خان ۲ ؍نومبر کو اپنی ۶۱؍ویں سالگرہ منائیں گے۔ ہر سال اس موقع پر ملک اور بیرونِ ملک سے ان کے مداح ممبئی پہنچتے ہیں اور باندرہ میں واقع منت کے باہر جمع ہوکر اپنے پسندیدہ اداکار کو سالگرہ کی مبارک باد دیتے ہیں۔ اس مرتبہ بھی مداحوں میں خاصا جوش ہے، تاہم میڈیا رپورٹس کے مطابق کام کی مصروفیات کے باعث شاہ رخ خان کی منت کے باہر مداحوں سے ملاقات کا امکان کم بتایا جا رہا ہے۔

یہ بھی پڑھئے:ملیالم سپر اسٹار مموٹی کو کیرالا پولیس کا ’سائبر سیکوریٹی کیپٹن‘مقرر کردیا گیا

اس کے باوجود ممبئی میں ہونے والی یہ تیاریاں مداحوں کے لیے کسی بڑے تحفے سے کم نہیں ہیں۔ شہر کی مشہور عمارتوں اور مقامات پر فلم ’’کنگ‘ ‘کی تشہیر نے سالگرہ کی خوشیوں کو فلم کے انتظار کے ساتھ جوڑ دیا ہے۔  شاہ رخ خان کی آنے والی فلم ’’کنگ‘‘ کی ہدایت کاری سدھارتھ آنند کر رہے ہیں۔ اس فلم کے ذریعے شاہ رخ اور سدھارتھ آنند ایک مرتبہ پھر ساتھ کام کر رہے ہیں۔ اس سے قبل دونوں نے فلم ’’پٹھان‘‘ میں ساتھ کام کیا تھا، جسے باکس آفس پر بڑی کامیابی ملی تھی۔ فلم میں شاہ رخ خان کے ساتھ ان کی بیٹی سہانا خان بھی اہم کردار میں نظر آئیں گی۔ اس کے علاوہ دپیکا پڈوکون، ابھیشیک بچن، جے دیپ اہلاوت اور راگھو جویال سمیت کئی فنکار فلم کا حصہ ہیں۔ فلم کو ریڈ چلیز انٹرٹینمنٹ اور مارفلکس پکچرز کے بینر تلے تیار کیا جا رہا ہے۔