ڈزنی کی ’’موآنا‘‘ لائیو ایکشن فلم کے ٹریلر پر مداحوں کی تنقید، اصل جادو نہ ہونے کا دعویٰ۔

۲۰۱۶ء میں والٹ ڈزنی کی اینیمیٹڈ فلم Moana نے ریلیز کے بعد عالمی سطح پر زبردست کامیابی حاصل کی، جہاں اس نے تقریباً ۶۸۷؍ ملین ڈالر کمائے۔ اس کی مقبولیت کو دیکھتے ہوئے ۲۰۲۴ء میں Moana 2 بھی ریلیز ہوئی جو ملے جلے ریویوز کے باوجود ایک ارب ڈالر سے زائد کمائی کر کے بڑی بلاک بسٹر ثابت ہوئی۔ اب ڈزنی نے اس فرنچائز کو ایک نئے انداز میں پیش کرتے ہوئے Moana کا لائیو ایکشن ریبوٹ بنانے کا فیصلہ کیا ہے، جس کا پہلا ٹریلر حال ہی میں جاری کیا گیا۔ فلم میں ڈووین جانسن (دی راک) ایک بار پھر ’’ماؤئی‘‘ کے کردار میں نظر آئیں گے، جسے انہوں نے اینیمیٹڈ ورژن میں آواز دی تھی۔

ٹریلر کے اجرا کے بعد سوشل میڈیا پر فوری ردعمل سامنے آیا، جہاں مداحوں کی ایک بڑی تعداد نے اسے تنقید کا نشانہ بنایا۔ کئی صارفین نے کہا کہ لائیو ایکشن ورژن میں وہ جادو اور توانائی نہیں ہے جو اصل اینیمیٹڈ فلم کی پہچان تھی۔ ایک صارف نے لکھا، ’’یہ ماؤئی نہیں لگتا بلکہ ایک کوس پلے جیسا محسوس ہوتا ہے‘‘، جبکہ دوسرے نے کہا کہ ’’انہوں نے اینیمیٹڈ فلم کا جادو ختم کر دیا ہے۔‘‘ کچھ مداحوں نے تو یہاں تک کہا کہ بعض کہانیاں اینیمیٹڈ ہی بہتر رہتی ہیں اور انہیں لائیو ایکشن میں تبدیل کرنا ہمیشہ کامیاب نہیں ہوتا۔ خاص طور پر ماؤئی کے لُک اور وگ پر شدید تنقید کی گئی، جسے کئی لوگوں نے غیر فطری قرار دیا۔
فلم کی ہدایت کاری تھامس کائل کر رہے ہیں، جبکہ مرکزی کردار میں نئی اداکارہ کیتھرین لائیا جلوہ گر ہوں گی۔ فلم ۱۰؍ جولائی ۲۰۲۶ء کو سنیما گھروں میں ریلیز ہوگی۔ دلچسپ بات یہ ہے کہ یہ فلم ’’دی اوڈیسی‘‘  سے ایک ہفتہ قبل ریلیز ہو رہی ہے، جس سے باکس آفس پر ایک بڑی ٹکر کی توقع کی جا رہی ہے۔

یہ بھی پڑھئے: دھرو راٹھی نے ’’دھرندھر ۲‘‘ کو ’’برین روٹ‘‘ قرار دیا، نوین کوشک کا ردعمل

حالیہ برسوں میں ڈزنی کی جانب سے اینیمیٹڈ کلاسکس کو لائیو ایکشن میں تبدیل کرنے کا رجحان تیز ہوا ہے، جیسے ’’دی لاین کنگ‘‘ اور ’’الہ دین‘‘ جن میں سے کچھ کو کامیابی ملی جبکہ کچھ کو تنقید کا سامنا کرنا پڑا۔ ماہرین کے مطابق، ’’موآنا‘‘ کے ٹریلر پر ملنے والا ردعمل اس بات کی نشاندہی کرتا ہے کہ ناظرین اب صرف نوستالجیا نہیں بلکہ معیار اور تخلیقی گہرائی بھی چاہتے ہیں۔ فی الحال، فلم کے ٹریلر نے سوشل میڈیا پر ایک بڑی بحث چھیڑ دی ہے کیا یہ لائیو ایکشن ورژن اصل کی طرح دل جیت پائے گا یا محض ایک اور متنازع ری میک ثابت ہوگا، اس کا فیصلہ اب ریلیز کے بعد ہی ہوگا۔