ہندی فلموں کے راک اسٹار کے نام سے مشہور رنبیر کپور کا کہنا ہے کہ سنجے دت نے انہیں اچھا کام کرنے کیلئے ہمیشہ ترغیب دی ہے۔

ہندی فلموں کے راک اسٹار کے نام سے مشہور رنبیر کپور کا کہنا ہے کہ سنجے دت نے انہیں اچھا کام کرنے کیلئے ہمیشہ ترغیب دی ہے۔ یاد رہے کہ رنبیر کپور نے سنجے دت کی بایوپک’سنجو‘ میں کام کیا ہے۔اس فلم میں انہوںنے سنجے دت کا کردار ادا کیا تھا۔رنبیر کپور اب پہلی بار فلم’شمشیرا‘ میں سنجے دت کے ساتھ کام کرتے ہوئے نظر آئیں گے۔رنبیر کپور نے سنجے دت کے ساتھ گزارے اپنے وقت کے تعلق سے بتایا کہ ’’جب میں ’برفی‘ اور ’راک اسٹار ‘میں کام کر رہا تھاتب میں ان کے جم میں کسرت کرتا تھا۔وہ مجھ سے کہتے تھے کہ  تو ۲؍ سال سے یہاں کسرت کر رہا ہے پر تیری باڈی کہاں ہے؟۔وہ مجھ سے مذاقاً یہ بھی سوال کرتے تھے کہ تو ابھی ’برفی‘ کر رہا ہےپھر تیری اگلی فلم کون سی ہوگی؟پیڑا  یا لڈّو۔‘‘رنبیر کپور نے مزید کہا کہ ’’سنجے دت نے ہمیشہ میری پیٹھ تھپتھپائی ہے۔جو کچھ بھی میں نے کیا  اس سے وہ بہت خوش تھے اور فخر کرتے ہیں۔انہوںنے مجھے ہمیشہ الگ طرح کی فلمیں کرنے کی ترغیب دی۔ میں سنجو سر کے ساتھ بہت خوش ہوں جو میری  حوصلہ افزائی کرتے ہیں اور آگے بڑھنے کی ترغیب دیتے ہیں۔‘‘ واضح رہے کہ کرن ملہوترہ کے ڈائریکشن میں بننے والی فلم’شمشیرا‘ میں رنبیر کپور،وانی کپور اور سنجے دت اہم کرداد اداکر رہے ہیں۔اس فلم میں ان کے علاوہ آشوتوش رانا،سوربھ شکلا، رونت رائے اور تریدھا چودھری کا بھی اہم رول ہے۔آدتیہ چوپڑا اس فلم کو پروڈیوس کر رہے ہیں جو ۲۲؍جولائی ۲۰۲۲ء کو ہندی،تمل اور تیلگو میں ریلیز کی جائےگی۔