بالی ووڈ اور ساؤتھ انڈین سنیما کے بڑے امتزاج میں سنجے لیلا بھنسالی ایک نئی میتھولوجیکل فلم کے لیے دھنش کے ساتھ کام کر رہے ہیں۔ فلم کی ہدایت کاری ایس پی میتھران کریں گے اور یہ ایک جنگل کے پس منظر میں قائم بڑے پیمانے کی کہانی ہوگی۔ پروجیکٹ ۲۰۲۷ء کے اوائل میں فلور پر جانے کی توقع ہے، اور اسے دھنش کے کریئر کا ایک اہم سنگ میل قرار دیا جا رہا ہے۔

انڈین فلم انڈسٹری میں ایک اہم اور منفرد اشتراک سامنے آیا ہے جہاں سنجے لیلا بھنسالی اپنے بینر کے تحت ایک بڑے پیمانے کی میتھولوجیکل فلم پروڈیوس کر رہے ہیں، جس میں مرکزی کردار دھنش ادا کریں گے۔ اس فلم کی ہدایت کاری تمل فلم ساز ایس پی میتھران کریں گے، جو اس سے قبل ’’ہیرو‘‘، ’’اریمبو تھیرائی‘‘ اور ’’سردار‘‘ جیسی فلموں کے لیے جانے جاتے ہیں۔ یہ پروجیکٹ نہ صرف ان کا ہندی سنیما میں ڈیبیو ہوگا بلکہ دھنش کے ساتھ ان کا پہلا تعاون بھی ہوگا۔

یہ بھی پڑھئے: عامر خان کی ’’تھری ایڈیٹس ۲‘‘ کی تصدیق، کہانی ۱۰؍ سال بعد سے شروع ہوگی

ذرائع کے مطابق، اس فلم کا تصور ایک بصری طور پر شاندار اور بیانیہ طور پر منفرد کہانی کے طور پر کیا گیا ہے، جو ایک افسانوی جنگل میں قائم ہوگی۔ اس کا آئیڈیا اس وقت سامنے آیا جب میتھران اور بھنسالی پروڈکشن ’’راؤڈی راتھوڑ ۲‘‘ پر کام کر رہے تھے، تاہم اس پروجیکٹ کے تعطل کا شکار ہونے کے بعد دونوں نے ایک نئی کہانی پر کام شروع کیا جو آخرکار اس فلم کی شکل میں سامنے آئی۔ کاسٹنگ کے مرحلے میں اہم تبدیلیاں ہیں۔ رپورٹس کے مطابق، تیلگو سپر اسٹار رام چرن ابتدائی طور پر مرکزی کردار کے لیے زیر غور تھے، تاہم بات آگے نہ بڑھ سکی، جس کے بعد یہ کردار دھنش کو آفر کیا گیا۔

یہ فلم دھنش کے لیے خاص اہمیت رکھتی ہے، کیونکہ اسے ان کے کریئر کی سب سے بڑی ہندی فلم قرار دیا جا رہا ہے۔ اس سے قبل وہ آنند ایل رائے کے ستاھ ’’رانجھنا‘‘، ’’اترنگی رے‘‘ اور ’’تیرے عشق میں‘‘ جیسی فلموں میں کامیاب تعاون کر چکے ہیں۔ پروڈکشن کے شیڈول کے مطابق، فلم کی شوٹنگ ۲۰۲۷ء کے اوائل میں شروع ہونے کا امکان ہے۔ اس سے پہلے دھنش جنوبی ہند میں کئی بڑے پروجیکٹس میں مصروف ہیں، جن میں راجکمار پیریاسامی اور ماری سیلواراج کے ساتھ فلمیں شامل ہیں، جبکہ ’’واڈا چنئی ۲‘‘ بھی لائن اپ میں ہے۔

یہ بھی پڑھئے: فرحان اختر نے’’جی لے ذرا‘‘ کی کاسٹ پر خاموشی توڑی

دوسری جانب، سنجے لیلا بھنسالی اس وقت اپنی فلم ’’لو اینڈ وار‘‘ کی ہدایت کاری میں مصروف ہیں، جس میں رنبیر کپور، عالیہ بھٹ اور وکی کوشل مرکزی کردار ادا کر رہے ہیں۔ فلم کی شوٹنگ آخری مراحل میں ہے۔ اسے ۲۰۲۷ء کے یومِ جمہوریہ ویک اینڈ پر ریلیز کرنے کی منصوبہ بندی کی جا رہی ہے۔