بالی ووڈ کے سپر اسٹار سلمان خان کی زیرِ انتظار جنگی فلم ’’ماتر بھومی: مے وار ریسٹ اِن پیس‘‘ ایک بار پھر بڑی تبدیلیوں کی وجہ سے خبروں میں ہے۔ تازہ رپورٹس کے مطابق فلم کے ہدایت کار اپوروا لاکھیا اور مصنفین نے فلم کے کلائمیکس کے ساتھ سلمان خان کے کردار کے سفر اور کردار کی تشکیل میں بھی تبدیلی کی ہے۔

بالی ووڈ کے سپر اسٹار سلمان خان کی زیرِ انتظار جنگی فلم ’’ماتر  بھومی: مے وار ریسٹ اِن پیس‘‘  ایک بار پھر بڑی تبدیلیوں کی وجہ سے خبروں میں ہے۔ تازہ رپورٹس کے مطابق فلم کے ہدایت کار اپوروا لاکھیا اور مصنفین نے فلم کے  کلائمیکس کے ساتھ سلمان خان کے کردار کے سفر اور کردار کی تشکیل  میں بھی تبدیلی کی ہے۔ فلم کی مرکزی کہانی اور اختتام کو اس انداز میں دوبارہ ترتیب دیا گیا ہے کہ اس میں جنگ کے بجائے امن، مفاہمت اور انسانی پہلوؤں کا پیغام زیادہ نمایاں ہو۔ یہ تبدیلیاں ایسے وقت میں کی گئی ہیں جب فلم کو رواں ہفتے مرکزی فلم سرٹیفیکیشن بورڈ کے سامنے پیش کیے جانے کی توقع ہے۔

یہ بھی پڑھئے:ارجنٹائنا کے شائقین نے میسی کی الوداعی تقریب میں’’اصلی گوٹ‘‘ کو میدان میں اتار دیا

سلمان خان کی یہ فلم ابتدا میں  ’’بیٹل آف گلوان‘‘  کے نام سے بنائی جا رہی تھی اور اس کی کہانی ۲۰۲۰ء میں گلوان وادی میں ہندوستانی اور چینی فوجیوں کے درمیان ہونے والی جھڑپ کے پس منظر میں ترتیب دی گئی تھی۔ فلم میں سلمان خان کو کرنل بکوملا سنتوش بابو کا کردار ادا کرنا تھا۔ تاہم بعد کے برسوں میں ہندوستان اور چین کے تعلقات میں ہونے والی تبدیلیوں کے باعث فلم کے موضوع اور اندازِ پیشکش پر دوبارہ غور کیا گیا، جس کے نتیجے میں کہانی، لہجے، عنوان اور متعدد مناظر میں تبدیلیاں کی گئیں اور کچھ حصوں کی دوبارہ عکس بندی بھی کی گئی۔ بعد میں فلم کا نام بدل کر ’’ماتر بھومی: می وار ریسٹ اِن پیس‘‘کردیا گیا۔
 رپورٹس کے مطابق فلم کے اختتام کو دوبارہ لکھنے کا بنیادی مقصد یہ ہے کہ کہانی کا آخری پیغام موجودہ اندازِ فکر اور فلم کے امن پر مبنی مرکزی موضوع سے زیادہ مطابقت رکھے۔ ذرائع کا کہنا ہے کہ فلم ساز اس بات کے حوالے سے خاص طور پر محتاط رہے ہیں کہ  ہندوستان اور چین کے درمیان تنازع کو پردے پر کس انداز میں پیش کیا جائے۔ اسی لیے روایتی جنگی فلم کے اختتام کے بجائے ایسا کلائمیکس تیار کیا گیا ہے جس میں امن، مفاہمت اور انسانی رشتوں  کو زیادہ اہمیت دی جائے گی۔
 صرف فلم کے کلائمیکس پر ہی کام نہیں کیا گیا بلکہ سلمان خان کے کردار کے  کردار  اور سفر  میں بھی تبدیلی کی گئی ہے۔ رپورٹس میں کہا گیا ہے کہ ان کے کردار کو فلم کے نئے لہجے کے مطابق ڈھالا گیا ہے تاکہ کہانی کے اختتام اور فلم کے مجموعی امن پسند پیغام کے درمیان بہتر ربط قائم ہوسکے۔ تاہم سلمان خان کے کردار میں ہونے والی مخصوص تبدیلیوں یا نئے کلائمیکس کی تفصیلات ابھی باضابطہ طور پر سامنے نہیں آئی ہیں۔
 فلم کے نظرثانی شدہ ورژن کو گزشتہ ہفتے اطلاعات و نشریات کی وزارت سے نان آبجیکشن سرٹیفکیٹ (این او سی)  ملنے کی بھی اطلاعات ہیں۔ اس کے بعد فلم کو مرکزی فلم سرٹیفیکیشن بورڈ کے پاس جمع کرا دیا گیا ہے اور اب اس کی اسکریننگ کی تاریخ کا انتظار ہے۔ اگر رواں ہفتے سی بی ایف سی فلم کا جائزہ لے لیتا ہے تو اس کے سرٹیفکیٹ اور ممکنہ ریلیز سے متعلق صورتحال مزید واضح ہوسکتی ہے۔

یہ بھی پڑھئے:اجے دیوگن کی’’دِرِیشیم ۳‘‘ نے دنیا بھر میں ۳۴۱؍ کروڑ روپے کا ہندسہ پار کرلیا

’’ماتر بھومی: مے وار ریسٹ اِن پیس‘‘ کو پہلے اپریل  ۲۰۲۶ء میں ریلیز کیا جانا تھا، لیکن فلم میں مسلسل ہونے والی تبدیلیوں اور دوبارہ عکس بندی کے باعث یہ منصوبہ مؤخر ہوگیا۔ اب تک فلم کی نئی حتمی ریلیز تاریخ کا باضابطہ اعلان نہیں کیا گیا ہے۔ تازہ تبدیلیوں کے بعد شائقین کی نظریں اس بات پر ہیں کہ سی بی ایف سی فلم کو کس نوعیت کا سرٹیفکیٹ دیتا ہے اور فلم آخرکار کب سینما گھروں میں پہنچتی ہے۔
فلم کی ہدایت کاری اپوروا لاکھیا کر رہے ہیں جبکہ سلمان خان کے ساتھ  چترانگدا سنگھ  بھی اہم کردار میں نظر آئیں گی۔ ’’بیٹل آف گلوان‘‘ سے شروع ہونے والا یہ منصوبہ اب ’’ماتربھومی: می وار ریسٹ اِن پیس‘‘ کے نئے عنوان اور امن کے پیغام کے ساتھ ایک مختلف شکل اختیار کرچکا ہے۔ مسلسل تبدیلیوں کے بعد اب سی بی ایف سی کی منظوری اس فلم کے لیے اگلا اور انتہائی اہم مرحلہ بن گئی ہے۔