شارجہ انٹرنیشنل بک فیئر (ایس آئی بی ایف) ۲۰۲۵ء نے اعلان کیا ہے کہ عالمی شہرت یافتہ اداکار اور مصنف ول اسمتھ ۱۴؍ نومبر کو بطور مہمان خصوصی ایونٹ کے مرکزی اسٹیج پر شریک ہوں گے۔ یہ ان کی ایس آئی بی ایف میں پہلی شرکت ہوگی، جہاں وہ اپنی زندگی، تخلیقی سفر، فلم، موسیقی اور کاروبار کے تجربات پر بات کریں گے۔

شارجہ انٹرنیشنل بک فیئر (ایس آئی بی ایف، شارجہ بین الاقوامی کتاب میلہ) ۲۰۲۵ء نے اعلان کیا ہے کہ عالمی سپر اسٹار، اداکار، گلوکار اور مصنف ول اسمتھ ۱۴؍ نومبر، بروز جمعہ شام ۸؍ بجے میلے کے مرکزی اسٹیج پر براہِ راست گفتگو میں شریک ہوں گے۔ یہ ول اسمتھ کی شارجہ بین الاقوامی کتاب میلے میں پہلی شرکت ہوگی، جو شرکاء کو ان سے براہِ راست سننے کا ایک نایاب موقع فراہم کرے گی۔ وہ اپنے فنکارانہ سفر، فلم، موسیقی، تحریر اور کاروبار میں کامیابی کے راز شیئر کریں گے ایک ایسا سفر جو استقامت، تخلیقی جستجو اور خود دریافت کی علامت ہے۔

ایس آئی بی ایف کی جانب سے خیرمقدم
کتاب میلے کی جنرل کوآرڈینیٹر خولہ المجینی نے اس اعلان پر تبصرہ کرتے ہوئے کہا کہ ’’ول اسمتھ جیسے عالمی تخلیقی آئیکن کا خیرمقدم کرنا ایس آئی بی ایف کے وژن کی عکاسی کرتا ہے جو فن، تخلیقی صلاحیت اور علم کو فروغ دینے پر یقین رکھتا ہے۔ ان کا کریئر سنیما ، موسیقی اور تحریر کے امتزاج سے تخیل اور شعور کو بیدار کرتا ہے۔‘‘ انہوں نے مزید کہا کہ ول اسمتھ کی شرکت اس سال کے ایس آئی بی ایف کے تھیم ’’آپ اور ایک کتاب کے درمیان‘‘ سے ہم آہنگ ہے، کیونکہ وہ نہ صرف ایک اداکار بلکہ ایک بیسٹ سیلنگ مصنف بھی ہیں۔

ول اسمتھ بطور مصنف اور تخلیق کار
ول اسمتھ نے مصنف مارک مینسن کے ساتھ اپنی یادداشت ’’وِل‘‘ تحریر کی، جو ان کی پرورش، کریئر، ذاتی چیلنجز اور زندگی کے اسباق پر مبنی ایک متاثرکن کتاب ہے۔ اس کے علاوہ، انہوں نے بچوں کیلئے کتابJust the Two of Usبھی لکھی، جو ان کے مشہور گانے سے متاثر ہے اور والدین اور بچوں کے درمیان رشتے کی خوبصورتی کو بیان کرتی ہے۔ میلے میں ان کی موجودگی کہانی سنانے، خود کی دریافت اور لچک کے موضوعات پر ایک بامعنی مکالمے کو جنم دے گی۔

فلم اور موسیقی میں کامیابیوں کا سفر
ول اسمتھ نے فلم ’’کنگ رچرڈ‘‘ میں شاندار اداکاری پر آسکر ایوارڈ سمیت گولڈن گلوب اور بافٹا ایوارڈز جیتے۔ اس سے قبل وہ ’’علی‘‘ اور The Pursuit of Happyness کیلئے بھی آسکر کیلئے نامزد ہو چکے ہیں۔ ایک گلوکار کے طور پر، اسمتھ نے چار گریمی ایوارڈز حاصل کئے اور عالمی سطح پر کئی مقبول گانے ریلیز کئے، جنہوں نے انہیں ایک کثیر الجہتی فنکار کے طور پر تسلیم دلایا۔

کاروبار اور اختراع میں بھی نمایاں
اپنی فنکارانہ کامیابیوں کے ساتھ ساتھ، ول اسمتھ ایک کامیاب کاروباری شخصیت بھی ہیں۔ انہوں نے Westbrook Inc. کی بنیاد رکھی، ایک جدید میڈیا اور انٹرٹینمنٹ کمپنی جو منفرد مواد تخلیق کرتی ہے۔ ان کی وینچر کیپیٹل کمپنی Dreamers VC اختراعی منصوبوں کی حمایت کرتی ہے، جبکہ The Mint Factory فیشن، تجارت اور پاپ کلچر کو یکجا کرتی ہے۔یہ تمام منصوبے ان کے اس وژن کی عکاسی کرتے ہیں جس کے تحت وہ اسکرین سے باہر بھی ثقافتی اثرات اور تخلیقی صلاحیت کو آگے بڑھا رہے ہیں۔

شارجہ بک فیئر ۲۰۲۵ء کی جھلکیاں
شارجہ بک اتھاریٹیکے زیرِ اہتمام منعقد ہونے والا یہ ۴۴؍ واں عالمی کتاب میلہ ۱۱۸؍ ممالک سے ۲؍ ہزار ۳۵۰؍ پبلشرز اور نمائش کنندگان کو اکٹھا کرے گا۔ اس میں ۱۲۰۰؍ سے زائد تقریبات، لیکچرز اور ورکشاپس ہوں گی، جن میں دنیا بھر کے معروف مصنفین، دانشور اور تخلیق کار شریک ہوں گے۔