میموری اور دیگر الیکٹرانک پرزوں کی بڑھتی ہوئی قیمتوں نے اسمارٹ فون بنانے والی کمپنیوں کو مجبور کر دیا ہے کہ وہ اپنے اپنے قیمت کے زمرے میں مسابقت برقرار رکھنے کے لیے بعض مشکل فیصلےکریں۔ جیسے جیسے گزشتہ سال کے ماڈلز کا اسٹاک ختم ہو رہا ہے، کمپنیاں ان کی جگہ ایسے نئے فون متعارف کرا رہی ہیں جو اگرچہ کوئی بڑی نئی خصوصیت پیش نہیں کرتے، لیکن کسی نہ کسی حد تک پچھلے ماڈلز کی توقعات پوری کرنے میں کامیاب رہتے ہیں۔ یہ ضروری نہیں کہ بڑی حکمت عملی ہو۔ اگر کمپنی مناسب شعبوں میں کمی کرکے بنیادی تجربے کو متاثر نہ ہونے دے تو قیمت برقرار رکھتے ہوئے ایک متوازن پروڈکٹ پیش کیاجا سکتا ہے۔چینی اسمارٹ فون کمپنی ریئل می نےاپنے نئے ریئل می ۱۶؍کےساتھ بھی کچھ ایسا ہی کرنے کی کوشش کی ہے۔ کمپنی نے فون کو نیا ڈیزائن تو دیا ہے، لیکن سلیکان کاربن بیٹری کے علاوہ کوئی نمایاں عملی اپ گریڈ شامل نہیں کیا۔ 

ریئل می ۱۶؍کا نیا ڈیزائن نوجوان صارفین کو متوجہ کرنے کی کوشش کرتا ہے، لیکن اس عمل میں اس نے اپنی مڈ رینج شناخت کا کچھ حصہ کھو دیا ہے۔ فون میں اب سامنے اور پچھلے دونوں حصوں پر مکمل طور پر فلیٹ ڈیزائن دیا گیا ہے، جسےکمپنی ’ایئر ڈیزائن‘کا نام دیتی ہے۔اگرچہ ڈیزائن جدید اور صاف ستھرا محسوس ہوتا ہے، لیکن استعمال شدہ میٹریل فون کو کچھ حد تک سستا تاثر دیتا ہے۔ بٹنوں میں مناسب ٹریول نہیں ہے اور انہیں دبانے میں بھی تھوڑی دشواری محسوس ہوتی ہے۔نسبتاً کمپیکٹ سائز ہونے کے باوجود اس میں ۷؍ہزار ایم اے ایچ کی بڑی بیٹری فٹ کی گئی ہے۔

اس کا ڈسپلے ۱۴۴؍ہرٹزریفریش ریٹ جیسےفیچرز سے محروم ہے، لیکن بنیادی استعمال کے حوالے سے اچھی کارکردگی پیش کرتا ہے۔اگرچہ یہ اسکرین گزشتہ ماڈل کی خم دار اسکرین جتنی منفرد محسوس نہیں ہوتی، لیکن فلیٹ ڈیزائن کی وجہ سے عملی استعمال میں زیادہ آسان اور بیرونی ماحول میں کم توجہ بٹانے والی ثابت ہوتی ہے۔

فون میں موجود ریئل می یو آئی ۷؍واضح طور پر آئی او ایس ۲۶؍ سے متاثر دکھائی دیتا ہے۔ مقامی ایپس، آئیکنز، ٹوگلز اور تھیمز میں شیشے جیسے شفاف عناصر شامل کیے گئے ہیں۔ بعض ایپس مثلاً فوٹوز میں کمپنی نے کیپسول نما فلوٹنگ ٹیب بار بھی فراہم کیاہے، اگرچہ آئی او ایس میں نظر آنے والا مکمل گلاس ایفیکٹ یہاں موجود نہیں۔

سادہ الفاظ میں کہا جائے تو کارکردگی کے لحاظ سے یہ فون اپنے مقابلے کے دیگر اسمارٹ فونز کے مقابلے میں پیچھے رہ جاتا ہے۔

 

 

ریئل می ۱۵؍کے مقابلے میں سب سے نمایاں کمی کیمرہ سیکشن میں کی گئی ہے۔ بنیادی کیمرے میں اب آپٹیکل امیج اسٹیبلائزیشن (او آئی ایس)موجود نہیں، جو کم روشنی میں بہتر تصاویر اور ویڈیوز لینے میں مددگار ثابت ہوتا ہے۔اس کے علاوہ فون میں الٹرا وائیڈ کیمرہ بھی موجود نہیں ہے۔ اگرچہ الٹرا وائیڈ کیمرہ بہت شاندار نہیں تھا، لیکن کم از کم وسیع زاویے سے تصاویر لینے کی سہولت فراہم کرتا تھا۔

 

 

بھاری استعمال، گیمنگ اور کیمرے کے مسلسل استعمال کے باوجود فون ایک مکمل چارج پر ایک دن سے زیادہ آسانی سے چلتا ہے۔چارجنگ کی رفتار بھی مناسب ہے۔یہ۳۰؍منٹ میں ۴۲؍ فیصداور ایک گھنٹے میں ۸۲؍ فیصد چارج ہوسکتا ہے،جبکہ مکمل چارج ہونے میں ایک گھنٹہ ۳۱؍منٹ کا وقت لگتا ہے۔