ایسے دور میں جب کمپیوٹر کے بعد روبوٹس اور اے آئی کے مسئلے پر ہر جگہ گفتگو ہورہی ہے اس فلم میںروبوٹ کو جیون ساتھی بنانے کا موضوع اٹھایا گیا ہے۔

تیری باتوں میں ایسا الجھا جیا
 (Teri Baaton Mein Aisa Uljha Jiya)
اسٹار کاسٹ:شاہد کپور، کریتی سینن، دھرمیندر، ڈمپل کپاڈیا، راکیش بیدی، انوبھا فتح پوریا، راجیش کمار، اشیش ورما، گروشا کپور
ہدایتکار اور رائٹر:امیت جوشی اور آرادھنا شاہ
پروڈیوسر:جیوتی دیشپانڈے، لکشمی اوتیکر، دنیش وجین، اکشے کپور
موسیقی:تنشک باگچی، متراز، سچن جگر
سنیماٹوگرافی:لکشمن اوتیکر
ایڈیٹنگ:منیش پردھان
پروڈکشن منیجر :ہیمنت دوبے، شریا کھنڈیلوال، دیپنکر مجمدار، اکشے شیٹی، یکتا شندے
 ریٹنگ: ***
انسانی دنیا میں روبوٹس کی افادیت پر برسوں سے تجربات جاری ہیں۔ جدید ترین اے آئی کامعاملہ بھی آج کل بہت گرم ہے کہ کیا یہ مصنوعی ذہانت انسانی صلاحیتوں کی جگہ لے کر انسانوں کو بے کار کر دےگی؟ ایسے میں ہدایتکارجوڑی امیت جوشی اور آرادھنا شاہ روبوٹ اور انسان کی محبت کی کہانی لے کر آئے ہیں۔ یہ جوڑی سوال اٹھاتی ہے کہ ہر لحاظ سے پرفیکٹ ہونے کے باوجود کیا روبوٹ عام زندگی میں انسان کی جگہ لےسکتا ہے؟ بالی ووڈ ہو یا ہالی ووڈ، اس موضوع پر کئی فلمیں بن چکی ہیں جن میں بالی ووڈ میں بننے والی رجنی کانت کی ’روبوٹ‘، ’لو اسٹوری۲۰۵۰ء‘، ’ہر‘، ’ایکس مشین‘جیسی کئی فلمیں شامل ہیں۔ اس ہدایت کارجوڑی نے کہانی میں محبت، رومانس، ڈراما، ڈانس اور گانا جیسی ہر چیز کوشامل کیا ہے، صرف منطق کو شامل کرنا بھول گئے یا شامل نہیں کرسکے۔ 
 کہانی:فلم کی کہانی روبوٹکس انجینئرآرین(شاہد کپور) کے اپنے لیے لڑکی ڈھونڈنے سے شروع ہوتی ہے۔ آرین ایک اچھے گھرانے کا لڑکا ہےاور نہ صرف اس کی ماں بلکہ اس کا پورا خاندان چاہتا ہے کہ وہ شادی کر کےگھر بسالے لیکن آریان کو کوئی لڑکی پسند نہیں آتی۔ اسی دوران اس کی خالہ ارمیلا (ڈمپل کپاڈیہ) اسے امریکہ میں ایک پروجیکٹ کے سلسلے میں فون کرتی ہیں۔ خود ایک روبوٹکس کمپنی کی مالک ارمیلاکئی سال سےروبوٹس پر مختلف تجربات کر رہی ہیں اور ان کی کوشش ہےکہ ایسا پرفیکٹ روبوٹ انسانی دنیا کو دیا جائے، جو انسانوں کو مات دےسکے۔ وہ آرین کی دیکھ بھال کے لیے سفرا (کریتی سینن) نامی روبوٹ کی خدمات حاصل کرتی ہے۔ 
 سفرہ کی تمام خوبیاں دیکھ کر آریان کو اس سے پیار ہو جاتا ہے۔ لیکن کہانی میں موڑ تب آتا ہے جب اسے معلوم ہوتا ہے کہ سفرا ایک روبوٹ ہے، پھر بھی وہ اپنےدماغ میں بڑھتے ہوئے جذبات کو روکنےمیں ناکام رہتا ہے۔ وہ کسی طرح اپنی خالہ کو راضی کرتا ہے کہ وہ اس خوبصورت روبوٹ کو انسانی ماحول میں آزمانے کیلئےہندوستان بھیجیں۔ دراصل آرین نے اپنا ذہن بنا لیا ہےکہ وہ سفرا سے شادی کرے گا۔ اس نے سفرا کو اس کی اصل شناخت ظاہر کیے بغیر اپنے خاندان سےبھی ملوایا لیکن کیا آرین کے گھر والوں کو پتہ چل جائے گا کہ سفرا ایک روبوٹ ہے؟ کیا وہ اس سےشادی کر سکے گا؟ان تمام سوالوں کے جواب آپ کو فلم دیکھنے کے بعد مل جائیں گے۔ 
ہدایت کاری:ہدایت کارجوڑی امیت جوشی اور آرادھنا شاہ نے اے آئی کےدور میں ایک ایسااہم مسئلہ اٹھایا ہےجو آج بحث کا موضوع بن گیاہے۔ جب پیشہ ورانہ زندگی میں اے آئی خطرہ بنتا جا رہا ہے تو اگرکوئی شخص محبت اور گھر بسانے کیلئےزندہ لڑکی کے بجائے روبوٹ کا آپشن آزمائے تو کیا ہوگا؟ ہدایت کارجوڑی نے اسے خاندانی تفریح کےساتھ ساتھ رومانٹک کامیڈی بنانے کی پوری کوشش کی ہے، جس میں وہ کامیاب بھی ہیں، لیکن روبوٹ کو خاندان میں شامل کرنے میں ناکام رہتےہیں۔ کہانی کو تیار ہونے میں کچھ وقت لگتا ہے۔ لیکن پھر کہانی میں تفریح سے پر بہت سے مناظر دیکھنے کو ملتے ہیں۔ 
تکنیکی باتیں :یہ فلم آپ کو کئی مقامات پر ہنسنے کیلئے مجبور کرتی ہے آگے چل کرکوئی سسپنس نہیں رہتا۔ فلم کے اسکرین پلے کو مزید چست کیا جاسکتا تھا۔ کلائمکس میں جلد بازی کی گئی ہے۔ اگر فلم کی رائٹنگ پر محنت کی گئی ہوتی تویہ ایک شاندار فلم بن سکتی تھی۔ 
ادا کاری:اداکاری کی بات کریں تو شاہد کپور اور کریتی سینن کی جوڑی اسکرین پر کافی تازہ نظرآتی ہے۔ ایک طویل عرصے کے بعد شاہد کو گرے اور منفی کرداروں سے ہٹ کر رومانوی کردارمیں دیکھ کر ان کے مداح یقیناً خوش ہوں گے۔ انہوں نے اپنا کردار اپنے منفرد انداز میں جیاہے۔ کریتی اسکرین پر بہت خوبصورت لگ رہی ہیں۔ انہوں نےروبوٹ کا کردار بہت خوبصورتی سے نبھایاہے۔ اسکرین پر دونوں کے درمیان کیمسٹری بہت اچھی ہے۔ دھرمیندر اور ڈمپل کپاڈیہ نے اپنے کرداروں کے ساتھ انصاف کیا ہے۔ راکیش بیدی، گروشاکپور، ماہی راج جین، راجیش کمار، آشیش ورما وغیرہ جیسے فنکاروں نے سپورٹنگ کاسٹ میں اچھا ساتھ دیا۔ 
نتیجہ: یہ فلم شاہد اورکریتی کے پرستار اور رومانٹک کامیڈی سے محبت کرنے والے ایک باردیکھ سکتے ہیں۔