یہاں آپ کودلکش مقامات کے علاوہ قبائلی آبادی اور اس کی قدیم ثقافت دیکھنے کو ملے گی، میوزیم میں آپ اِس شہر کی ثقافتی وراثت دیکھ سکتے ہیں۔

اروناچل پردیش کے لوئرسبانسری ضلع میں سطح سمندر سے ۵؍ ہزار ۵۰۰؍فٹ کی بلندی پر واقع زیرو ویلی ایک قدیم، دلکش اور قدرےانوکھا شہر ہے۔ سبز بانس کے جنگلات، نیلگوں و سبز رنگ کےدیودار کے درختوں، اور پہاڑی ڈھلوانوں پر پھیلے دھان کے کھیتوں کے بیچ یہ وادی سیاح کے دل کو اپنے سحر میں جکڑ لیتی ہے۔یہ وادی جتنی مشہور ہے اپنے قدرتی جنگلی حیات کے لیے، اتنی ہی مشہوریہاں کے آبائی قبیلے ’اپاتانی‘ کے لیے ہے، جنہوں نے یہاں دھان کی کاشت کو رواج دیا اور نہر نما آبپاشی نظام کا قیام عمل میں لایا۔یہ وادی نہ صرف ہندوستان کے خوبصورت ترین مقامات میں شمار ہوتی ہے بلکہ یونیسکوکی عالمی ثقافتی فہرست میں شامل ہونے کی امیدوار بھی رہ چکی ہے۔
کہاں واقع ہے؟
زیرو ویلی اروناچل پردیش کے ریاستی دارالحکومت ایتانگر سے تقریباً ۱۱۵؍کلومیٹر شمال مغرب میں واقع ہے۔سطحِ سمندر سے ۱۵۰۰؍تا ۱۸۰۰؍میٹر کی بلندی پر واقع یہ وادی اپاتانی قبیلے کی رہائش گاہ ہے، جو اپنی ثقافت، طرزِ زندگی، اور ماحول دوست کاشتکاری کے لیے مشہور ہے۔
تارِن فِش فارم
زیرو ویلی کی بلندی کے باوجود یہاں مچھلی پالنے کا منفرد کام انجام دیا جاتا ہے۔اس کے علاوہ یہاں پھولوں اور آرکڈز کی نایاب اقسام کی کاشت بھی کی جاتی ہے، جو یہاں کی نباتاتی وراثت کی عکاسی کرتی ہے۔
تالی ویلی وائلڈ لائف سینکچری
زیرو ویلی سےتقریباً ۳۲؍کلومیٹر کی مسافت پر واقع یہ محفوظ جنگل نخلستان جیسا مقام ہے۔ سرسبز مناظر، بید، بانس، آرکڈز، سلور فر اور رودوڈینڈرون جیسے نایاب درختوں سے گھرا ہوا یہ علاقہ ٹریکنگ کے شوقین افراد کے لیے کسی جنت سے کم نہیں۔
ٹپی آرکڈ ریسرچ سینٹر
یہ ادارہ پھولوں کے عاشقوں کے لیے جنت ہے۔ یہاں آپ کو آرکڈز کی تقریباً ایک ہزاراقسام ایک ہی مقام پر دیکھنے کو ملیں گی۔اگر فطرت سے شغف رکھتے ہیں تو یہ مقام آپ کے سفر کا یادگار ترین لمحہ بن سکتا ہے۔
زیرو پُتو
یہ مقام آپ کی آنکھوں، ذہن اور دل — تینوں کو فرحت بخشے گا۔چاروں طرف پھیلی ہریالی، سکون سےبیٹھنے کیلئےقدرتی منظر، اور کیمرے سے تصویر کشی کے لاجواب مواقع۔یہ جگہ آرمی پُتو کے نام سے بھی جانی جاتی ہے کیونکہ ۱۹۶۰ءمیںیہاں فوجی چھاؤنی قائم کی گئی تھی۔
پاکو وادی
اگر آپ زیرو ویلی کی سبز دلفریبی کے ساتھ ساتھ ہمالیہ کی برف پوش چوٹیاں بھی دیکھنا چاہتے ہیں، تو پاکو وادی کی طرف رخ کیجیے۔یہ ایک تنگ مگر طلسماتی وادی ہے جس کا حسن الفاظ سے ماورا ہے۔
تالی وادی
زیرو ویلی سے تقریباً ۳۲؍کلومیٹر شمال مشرق میں واقع تالی وادی نہ صرف جنگلی حیات بلکہ نباتاتی تنوع کے لیے بھی مشہور ہے۔ یہاں آپ کو مختلف قسم کے درخت، پرندے اور جنگلی جانور دیکھنے کو ملیں گے جو آپ کے دن کو مزید دلکش بنا دیں گے۔ٹریکنگ کے شوقین حضرات کے لیے یہ مقام خوابناک چیلنج کی مانند ہے۔
زیرو ویلی کا میوزیم
اگر آپ اپاتانی قبیلے کی تاریخ، لباس، موسیقی، اور لوک ورثے کو قریب سےسمجھنا چاہتے ہیں، تو زیرو کا ثقافتی میوزیم ضرور دیکھیے۔ یہاں آپ کو قدیم موسیقی کے آلات،شادی بیاہ اور دیگر رسومات کی تصاویر،روایتی لباس، شکار کے اوزار، دیسی زیورات دیکھنے کو ملیں گے۔یہ میوزیم گواہی ہے کہ فطرت کے ساتھ جینا کیسا ہوتا ہے۔
زیرو میوزک فیسٹیول کا میدان
اگر آپ ستمبر کے مہینے میں زیرو جائیں تو آپ کو فطرت کی گود میں بسایا گیا ایک انوکھا میوزک فیسٹیول دیکھنے کو ملے گا۔یہاںبانس سے بنے اسٹیج، گھاس پر بچھے قالین، جدید انڈی بینڈز، فوک ساز، اور مغربی موسیقی کا میل دیکھنے کو ملے گا۔پورے ملک سے نوجوان یہاں موسیقی، بارش، اور سبز وادی کا مزہ لینے آتے ہیںیہ مقام ایک عام دن میں بھی پرسکون وادی ہوتا ہے، اور فیسٹیول کے دنوں میں ایک روحانی میلے میں بدل جاتا ہے۔