نبی کریمؐ کے نام سے قربانی

اگر کوئی مسلمان پہلی بار نبی کریم ﷺ کی نام سے قربانی کرے تو کیا حکم ہے؟ولی اللہ، بھیونڈی

 باسمہ تعالیٰ۔ھوالموفق:حضور ﷺ کے نام سے قربانی کرنا جائز اور علمائے کرام کے مطابق موجب سعادت ہے ۔ حضور ﷺ  نے خود امت کو اپنی قربانی میں شریک کیا تھا۔ آپؐ کے اس فعل سے دوسروں کی طرف قربانی کا جواز ثابت ہوتاہے۔ پھر جس طرح کوئی امتی اپنے اجداد، اقرباء اور متعلقین کی طرف سے قربانی کرسکتا ہے تو حضورؐ  کی طرف سے بھی کرسکتا ہے اور پہلی دوسری مرتبہ پر منحصر نہیں، اللہ توفیق دے تو تاحیات اور ہر سال کرے ،لیکن سائل کے انداز سے یہ ظاہر ہورہا ہے کہ شاید پوچھنے کا مقصد یہ ہے کہ اپنی طرف سے قربانی نہ کرتے ہوئے پہلی مرتبہ حضورؐ کی طرف قربانی کرنا چاہتا ہے، اس کا جواب یہ ہے کہ اگر خود اس پر قربانی واجب نہیں تو گنجائش ہے لیکن خود اس پر قربانی واجب ہو تو اولاً اپنی قربانی کرنی ہوگی، پھر اللہ توفیق دے تو  نبی کریم ؐ یا جس کے نا م سے چاہے مزید قربانی کرے ۔واللہ اعلم وعلمہ اتم

بینک سے قرض اور قربانی

ایک آدمی نے بینک سے لون  لے رکھا ہے۔ کیا لون کی رقم سے اس کیلئے قربانی میں حصہ لینا درست ہوگا  ؟ ارشاد خان، وسئی

 باسمہ تعالیٰ۔ ھوالموفق :غریب جس پر قربانی واجب نہیں، شریعت کا اس سے یہ مطالبہ بھی نہیں کہ قرض لے کر قربانی کرے۔ شریعت نے جب اسے مکلف نہیں بنا یا تو قرض کا بوجھ سر پر لینے کی ضروت بھی نہیں تاہم وہ قرض یا لون کی رقم سے قربانی کرے تو قربانی ہوجائیگی۔ جس پر قربانی واجب ہے اسے بہر حال قربانی کرنا ضروری ہے چاہے قرض ہی کیوں نہ لینا پڑے۔ اگر بینک کی رقم ہو تو اس میں بھی کوئی مضائقہ نہیں۔ بینک لون کا معاملہ اگر چہ  سودی عقد ہے لیکن جو رقم اسے بینک سے  ملی ہے اس میں سود شامل نہیں، اس لئے قربانی نہ ممنوع ہے نہ مکروہ لہٰذا قربانی درست ہوگی اور قربانی کا فریضہ بھی ذمے سے ساقط ہوجائیگا البتہ مسلمان کے لئے بغیر شدید اور اضطراری ضرورت کے سودی معاملات سختی سے منع ہیں ۔واللہ اعلم وعلمہ اتم