پیٹرولیم اور قدرتی گیس کی وزارت کی جوائنٹ سکریٹری سجتا شرما نے کہا کہ سرکاری تیل کی مارکیٹنگ کمپنیاں (او ایم سیز) ایندھن کی قیمتوں میں حالیہ اضافے کے باوجود اب بھی شدید مالی دباؤ کا سامنا کر رہی ہیں۔

پیٹرولیم اور قدرتی گیس کی وزارت کی جوائنٹ سکریٹری سجتا شرما نے کہا کہ سرکاری تیل کی مارکیٹنگ کمپنیاں (او ایم سیز)  ایندھن کی قیمتوں میں حالیہ اضافے کے باوجود اب بھی شدید مالی دباؤ کا سامنا کر رہی ہیں اور اب بھی روزانہ تقریباً ۷۵۰؍ کروڑ روپے کا نقصان اٹھا رہی ہیں۔ ان کے تبصرے ایک ایسے وقت میں سامنے آئے ہیں جب مغربی ایشیا میں جاری کشیدگی نے خام تیل اور ایل این جی کی درآمدات میں مسلسل رکاوٹیں پیدا کی ہیں، جس سے گزشتہ ڈیڑھ ماہ سے عالمی توانائی کی فراہمی کا سلسلہ متاثر ہوا ہے۔ایندھن کی فراہمی کی موجودہ صورتحال پر بات کرتے ہوئے شرما نے یقین دلایا کہ ہندوستان کے پاس فی الحال ایندھن کے مناسب ذخائر ہیں اور ملک کے کسی بھی حصے میں کسی قسم کی کمی کی کوئی اطلاع نہیں ہے۔ انہوں نے کہا کہ ہمارے پاس کافی ذخائر ہیں اور کہیں بھی ایندھن کی کمی نہیں ہے۔

یہ بھی پڑھئے : ہندوستان روس سے تیل خرید رہا ہے ، امریکی پابندیوں سے پہلے بھی اور بعد میں بھی

شرما نے کہاکہ ’’حکومت اور تیل کمپنیاں ملک بھر میں پیٹرولیم مصنوعات کی بلا تعطل سپلائی اور ہموار تقسیم کو یقینی بنانے کے لیے صورتحال پر گہری نظر رکھے ہوئے ہیں۔‘‘ شرما کے مطابق  ایندھن کی طلب کے پیٹرن بھی بدل رہے ہیں۔ مطالبہ تھوک ایندھن کی فروخت سے خوردہ پیٹرول پمپس کی طرف منتقل ہو رہا ہے، جو صارفین کے لیے مسلسل فراہمی کو یقینی بنا رہا ہے۔
انہوں نے کہا کہ سرکاری تیل کی کمپنیوں کو ہونے والا یومیہ نقصان، جو پہلے تقریباً ۱۰۰۰؍کروڑ تھا، ایندھن کی قیمتوں میں حالیہ اضافے کے بعد اب کم ہو کر تقریباً ₹۷۵۰؍ کروڑ ہو گیا ہے۔تاہم، انہوں نے واضح کیا کہ مرکزی حکومت فی الحال پبلک سیکٹر فیول کمپنیوں کے لیے کسی ریلیف پیکیج پر غور نہیں کر رہی ہے۔ایل پی جی کی فراہمی کے بارے میں شرما نے کہا کہ عالمی چیلنجوں کے باوجود تیل کمپنیاں مستحکم تقسیم کو برقرار رکھنے میں کامیاب رہی ہیں۔

یہ بھی پڑھئے : ہفتے میں دوسری بار سی این جی کی قیمتیں بڑھ گئیں

انہوں نے کہاکہ ’’گزشتہ چار دنوں میں، تقریباً ۷۲ء۱؍ لاکھ ایل پی جی سلنڈر کی ترسیل کی گئی، جبکہ بکنگ کی تقریباً  ۶۹ء۱؍لاکھ درخواستیں موصول ہوئیں۔ یہ واضح طور پر اشارہ کرتا ہے کہ سپلائی چین نارمل اور مستحکم ہے۔‘‘ مغربی ایشیا میں جاری بحران نے توانائی کی عالمی منڈی میں مسلسل اتار چڑھاؤ پیدا کیا ہے، جس سے ہندوستان کے توانائی کے درآمدی بل پر دباؤ پڑ رہا ہے اور سرکاری ایندھن کے خردہ فروشوں کی مالی صحت کے بارے میں خدشات بڑھ رہے ہیں۔