بہار اسمبلی انتخابات کے نتائج نے ہر کسی کو چونکایا ہے۔ ہارنےو الی پارٹیوں کی بات جانے دیں، جیتنے والی پارٹیاں بھی اس نتیجے سے حیران و ششدر ہیں۔ لوک سبھا انتخابات کے دوران’ ۴۰۰؍ پار‘کا نعرہ دینے والی بی جے پی نے بہار انتخابات میں اپنے اتحاد کیلئے ۱۶۰؍ سیٹوں کا ٹارگیٹ مقرر کیا تھا لیکن این ڈی اے ’۲۰۰؍ کے پار‘ پہنچ گیا۔ بہرحال نتیجے کیسے بھی آئے ہوں، ہارنے والی پارٹیوں کو بھی اسے قبول کرتے ہوئے پیش رفت کرنی چاہئے اور انتخابی جائزے کے ساتھ اپنا احتساب کرنا چاہئے۔

   یہ اچھی بات ہے کہ نتائج کا واضح رجحان دیکھنے کے بعد جہاں راہل گاندھی نے کہا کہ ’’یہ لڑائی آئین اور جمہوریت کے تحفظ کی ہے۔ کانگریس اور انڈیا اتحاد  اپنی کوششوں کو  جاری رکھیں گے  اور مزید بااثر بنائیں گے۔‘‘ وہیں آر جے ڈی کی جانب سے بھی مثبت بیان آیا کہ ’’عوامی خدمت ایک مسلسل عمل ہے، ایک نہ ختم ہونے والا سفر۔ زندگی میں اُتار چڑھاؤ کا آنا فطری ہے۔ہار میں غم نہیں ہوتا اور جیت میں غرور نہیں ہوتا۔ آر جے ڈی غریبوں کی پارٹی ہے،اسلئے نتائج سے قطع نظر وہ اُن کے درمیان ان کی آواز  بن کر رہے گی۔‘‘

یہ حوصلہ مندی کااظہار اور جدوجہد جاری رکھنے کااعلان ہے۔ یہ اچھی بات ہے اور ایسا ہی ہونا چاہئے لیکن اسی کے ساتھ انتخابی جائزہ بھی لیا جانا چاہئے اور تمام سیکولر جماعتوں کواپنااحتساب بھی کرنا چاہئے۔ صرف الزام تراشی سے کام نہیں چلے گا۔ ووٹ چوری، انتخابی دھاندلی، اسکیموں کے نام پر رشوت خوری اور ایس آئی آر کی بات کہہ کر وہ اپنا دامن نہیں بچاسکتیں۔ راہل گاندھی اور تیجسوی یادو کو یہ بات سمجھنی چاہئے تھی کہ ان کا مقابلہ ایک ایسی پارٹی سے ہے جو خود کو دنیا کی سب سےبڑی پارٹی قرار دیتی ہے،جو بے پناہ دولت کی مالک  ہے، جو اقتدار پر قابض ہے جس کے ہاتھوں میں سی بی آئی، ای ڈی ، انکم ٹیکس اور این آئی اے جیسی تفتیشی ایجنسیوں کی لگام ہے، الیکشن کمیشن بھی جس کی کھل کر طرف داری کرتا ہے اورجو ’سام ، دام، دنڈ، بھید‘ کے استعمال کی طاقت رکھتی ہے۔ اسلئے اُن تمام جماعتوں کو جو  بی جے پی سے مقابلہ کرنے کیلئے خود کو تیار کرتی ہیں، ان حقائق کو سمجھ کر آگے پیش قدمی کرنی چاہئے اور پوری تیاری کے ساتھ کرنی چاہئے۔

مگر افسوس کہ بہار انتخابات کے دوران عظیم اتحاد میں وہ تیاری نہیں دکھائی دی، جو وقت کا تقاضا تھا۔ کہیں خوش فہمی، کہیں تکبر اورکہیں ناسمجھی کا اظہار ہورہا تھا۔ وہ کانگریس ہو یا آر جے ڈی یا دوسری ریاستوں کی دیگر سیکولر جماعتیں، جب تک وہ خود جیتنے کے بجائے بی جے پی کو ہرانے کی  تیاری کے ساتھ سامنے نہیں آئیں گی، وہ بی جے پی کو نہیں ہرا پائیں گی۔ بہار میں ’ووٹر ادھیکار یاترا‘ کے دوران راہل گاندھی اور تیجسوی کا ایک اسٹیج پر آنا اچھا قدم تھا، رائے دہندگان پر اس کے اچھے اثرات بھی مرتب ہوئے لیکن سیٹوں کی تقسیم اور انتخابات کے دوران دونوں جماعتوں میں وہ تال میل نہیں دکھائی دیا۔پرچہ نامزدگی داخل کرنے کے آخری دن تک بی جے پی سے مقابلہ کرنے نکلیں  دونوں بڑی جماعتیں آپس میں سیٹوں کی تقسیم تک نہیں کرپائی تھیں جبکہ انہیں یہ کام ’یاترا‘ نکالنے سےبہت پہلے کرلینا چاہئے تھا۔ آپس میں ان کے سرپھٹول اور ایک ایک سیٹ کی چھینا جھپٹی سے کوئی اچھا پیغام نہیں گیا۔ایک طرف جہاں ’دنیا کی سب سے مضبوط پارٹی‘ اپنے اتحادیوں کو منانے اور اپنا کنبہ بڑھانے کیلئے چھوٹی چھوٹی پارٹیوں کے آگے پیچھے گھومتی ہوئی دکھائی دی، وہیں دوسری جانب کانگریس، آر جے ڈی اور بائیں محاذ میں شامل جماعتیں، بمشکل مکیش سہنی کی پارٹی کو اپنے ساتھ لاپانے میں کامیاب ہوسکیں۔ ایم آئی ایم نے خود ہی عظیم اتحاد میں شامل ہونے کی  خواہش کا اظہار کیا تھا لیکن اس پیشکش کو حقارت سے ٹھکرادیا گیا۔

یہ نتیجے کیسے بھی آئے، لیکن جو بھی آئے ہیں، اس کے مطابق ہی اگر دیکھا جائے تو ۲۰۲۰ء کے اسمبلی انتخابات کے مقابلے عظیم اتحاد کے ووٹوں میں  کوئی کمی نہیں آئی ہے۔عظیم اتحاد کو ۲۰۲۰ء میں ۳۷ء۲۳؍ فیصد ووٹ ملے تھے جبکہ اس مرتبہ۳۷ء۳؍ فیصد ووٹ ملے ہیں۔ اس کا مطلب ہے کہ ان کا ووٹ بینک مستحکم ہے،بس انہیں اس میں تھوڑے سے اضافے کی ضرورت ہے۔ عظیم اتحاد کے مقابلے این ڈی اے کو ۲۰۲۰ء کے ۳۷ء۲۶؍ فیصد ووٹوں کے مقابلے اس بار  ۴۷ء۲؍ فیصد ووٹ ملے ہیں، یعنی تقریباً ۱۰؍ فیصد زیادہ۔ ظاہر سی بات ہے کہ ووٹوں کا یہ فرق پورے انتخابی مساوات کو تہ و بالا کرنے کیلئے کافی ہے۔ 

جو ہوا، سو ہوا، اب آگے کیا کرنا ہے، سیکولر جماعتوں کو اس کی حکمت عملی ابھی سے کرنی ہوگی۔اور بات صرف بہار کی نہیں ہے بلکہ بات پورے ملک کی ہے۔