ایک جاپانی کمپنی نے ایک ایسی انوکھی اسمارٹ واچ بنائی ہے جو کسی بھی شخص کے خون میں موجود شکر کی پیمائش بغیر سوئی چبھوئےکرسکتی ہے۔

ایک جاپانی کمپنی نے ایک ایسی انوکھی اسمارٹ واچ بنائی ہے جو کسی بھی شخص کے خون میں موجود شکر کی پیمائش  بغیر سوئی چبھوئےکرسکتی ہے۔ یہ جدید انوکھی گھڑی ذیابیطس کے ان مریضوں کیلئے بہت ہی کارآمد ثابت ہوسکتی ہے جنہیں مسلسل اپنے بلڈ شوگر کی سطح پر نظر رکھنی ہوتی ہے۔ ایسے افراد کو یہ گھڑی بغیر سوئی چبھوئے ان کا بلڈشوگر لیول کسی بھی وقت بتاسکتی ہے۔ امریکہ کے  لاس ویگاس میں منعقد ہونے والی دنیا کی سب سے بڑی ٹیکنالوجی نمائش ’ سی ای ایس‘ میں جاپان کی کمپنی’ کوانٹم آپریشن انکارپوریشن ‘نے ایک پروٹوٹائپ اسمارٹ گھڑی  نما آلہ متعارف کرایا ۔ اس ڈیوائس کو کلائی پر باندھا جاتا ہے، جس کے بعد وہ مسلسل بلڈ شوگر کی درست سطح کی مانیٹرنگ کرتی ہے۔ یہ ایپل واچ کی طرح دکھائی دیتی ہے، جس میں ایک چھوٹا اسپیکٹرومیٹر موجود ہے جو خون میں گلوکوز کو اسکین کرتا ہے۔ کمپنی کے مطابق یہ  دل کی دھڑکن اور ای سی جی پر بھی نظر رکھتی ہے۔ کمپنی نے بتایا کہ اس میں اصل جز اس کا پیٹنٹ اسپیکٹرواسکوپی میٹریل ہے۔ ڈیواس کو پہننے والے کو بس گھڑی کو سلائیڈ کرکے مینیو سے مانیٹرنگ کو متحرک کرنے کی ضرورت ہوتی ہے، جس کے۲۰؍ سیکنڈ بعد ڈیٹا ڈسپلے ہونے لگتا ہے۔ اس وقت ذیابیطس کے مریضوں کو مسلسل بلڈ گلوکوز کی سطح پر نظر رکھنی ہے تاکہ انسولین کے ڈوز کا تعین کیا جاسکے۔ مگر اس عمل کیلئے  سرنج کا استعمال عام ہوتا ہے اور یہ نئی ڈیوائس اگر واقعی کارآمد ہوئی تو اس شعبے میں انقلابی پیش رفت ثابت ہوگی۔ دنیا بھر میں ذیابیطس کے مریضوں کی تعداد میں تیزی سے اضافہ ہورہا ہے، جن میں دیگر جان لیوا بیماریوں کا خطرہ بڑھ جاتا ہے۔