اس حصولیابی کے ذریعہ انعم نے کلیان کی پہلی مسلم گائنا کولوجسٹ کا اعزاز بھی حاصل کیا

شہر کلیان سے تعلق رکھنے والی انعم رضی قاضی نے گو رنمنٹ میڈیکل کالج ، میرج سے ایم ایس گائنکو لوجی میں اول مقام حاصل کیا ہے۔ ڈاکٹر طارق قاضی کے مطابق انعم قاضی شروع سے ہی کافی ذہین اور محنتی طالبہ رہی ہے۔ عیاں رہے کہ انعم قاضی  شہر کی پہلی مسلم گائنکو لوجسٹ ہے۔ مسلم کوکنی خاندان سے تعلق رکھنے والی انعم قاضی نے محمدیہ انگریزی ہائی اسکول سے دسویں جماعت کا امتحان پاس کیا اورسی ایچ ایم کالج سے بارہویں کے بورڈ امتحان میں نمایاں کامیابی حاصل کر کے پہلی ہی کوشش میں سی ای ٹی امتحان پاس کیا اور میرٹ کی بنیاد پر راجیو گاندھی میڈیکل کالج، کلوا میں ایم بی بی ایس میں داخلہ لیا اور فائنل امتحان میں دوسرے نمبر پر رہی۔ بعد ازاں ایم ایس کیلئے گور نمنٹ میڈیکل کالج میرج  میں داخلہ لیا اور محنت اور لگن سے پورے کالج میں گائنکولوجی میں پہلا مقام حاصل کیا۔ اس ضمن میں نمائندہ ٔ انقلاب سے بات کرتے ہوئے انعم قاضی نے بتایا کہ طلبہ اگر چاہتے ہیں کہ کامیابی حاصل کریں تو ان کو اپنا زیادہ تر وقت پڑھائی پر صرف کر نا چاہئےاور سوشل میڈیا کا محدود استعمال کر نا چاہیے۔