جھینگا بریانی بنانے کی آسان ترکیب ملاحظہ کیجئے۔

درکار اجزاء: جھینگے آدھا کلو، چاول ۲؍ پیالی، نمک حسب ذائقہ، ادرک لہسن پسا ہوا ایک بڑا چمچہ، پیاز ۲؍ عدد درمیانی، ٹماٹر ۳؍ عدد درمیانے، پسی ہوئی لال مرچ ایک بڑا چمچہ، دھنیا پسا ہوا ایک بڑا چمچہ، ہلدی پسی ہوئی ایک چھوٹا چمچہ، میتھی کے چند دانے، ثابت رائی آدھا چھوٹا چمچہ، ہری پیاز ۳؍ سے ۴؍ عدد، دودھ آدھی پیالی، زرد رنگ ایک چٹکی، پسا ہوا ناریل ۲؍ بڑے چمچے، تیل آدھی پیالی۔
بنانے کا طریقہ: جھینگوں کو چھیل کر صاف پانی سے دھو لیں۔ پیاز کو باریک کاٹ لیں، ہری پیاز کو باریک چوپ کر لیں اور ٹماٹر کو موٹے کاٹ کر رکھ لیں۔ اب کڑاہی میں تیل کو درمیانی آنچ پر گرم کرلیں، اس میں میتھی دانہ اور رائی ڈال کر ہلکا سا کڑکڑا لیں۔ پھر اس میں پیاز کو سنہرا فرائی کر لیں۔ اس میں لال مرچ، دھنیا اور ہلدی ڈال کر ذرا سا پانی کا چھینٹا دے کر بھونیں، پھر جھینگے ڈال کر تیز آنچ پر ۴؍ سے ۵؍ منٹ بھونیں۔ اس کے بعد ٹماٹر اور باریک کٹی ہوئی ہری پیاز ڈال کر ۵؍ سے ۷؍ منٹ کے لئے ڈھانک کر دَم پر رکھ دیں۔ چاول کو ایک کنی اُبال لیں، فرائنگ پین میں ۲؍ بڑے چمچے تیل لگا کر اس میں آدھے چاول پھیلا کر ڈالیں پھر اس پر جھینگوں کا تیار کیا ہوا مسالہ ڈال کر اوپر سے باقی چاول ڈال دیں۔ اب دودھ میں زرد رنگ شامل کرکے چاول کے اوپر ڈال دیں اور پسے ہوئے ناریل کو ہلکا سا بھون کر اوپر سے چھڑک دیں۔ پھر ڈھانک کر ہلکی آنچ پر ۸؍ سے ۱۰؍ منٹ دَم پر رکھ دیں۔ ڈش میں نکال کر لیموں کے قتلوں کے ساتھ گرم گرم نوش فرمائیں۔