والد بھگوان دپکے نے کہاکہ ملک کی دولت لوٹنے والوں پر کارروائی نہیں ہوتی، جمہوریت کی بات کرنے والے کوگرفتار کیاجاتا ہے،  حکومت پر شدید تنقید۔

کاکروچ جنتا پارٹی کے بانی ابھیجیت دپکے کے والد بھگوان دپکے اور والدہ انیتا دپکے نے دہلی ایئرپورٹ پر حکومت کی کارروائی پر سنگین سوال اٹھائے ہیں۔ انہوں نے اس کارروائی کو ہندوستانی تاریخ کا پہلا ایسا واقعہ قرار دیا جس میں جمہوریت کے تحفظ کی کوشش کرنے والے ایک طالب علم کو ہوائی جہاز کے اندر سے گرفتار کیا گیا۔ بھگوان دپکے نے کہا کہ انہوں نے بڑے مجرموں اور صنعت کاروں کی گرفتاری کے ایسے واقعات کبھی نہیں دیکھے جو ہندوستانی دولت بیرون ملک لے گئے، اس کے بجائے جمہوریت کے تحفظ کی بات کرنے والے ایک عام طالب علم کو حراست میں لیا گیا۔ ابھیجیت کے والد نے کہا کہ اب انہیں یقین نہیں ہے کہ ہندوستان میں جمہوریت موجود ہے۔ انہوں نے الزام لگایا کہ جمہوریت کے تحفظ کی بات کرنے والوں کو دبانے کی کوشش کی جارہی ہے۔ انہوں نے کہا کہ حکومت کا ہدف ’’ایک ملک، ایک پارٹی‘‘ کی طرف بڑھنا اور دیگر سیاسی جماعتوں کو ختم کرنا ہے۔ جب ان سے ابھیجیت کی گرفتاری کے امکان کے بارے میں پوچھا گیا تو ان کے والد نے کہا کہ ابھیجیت نے گھر سے نکلنے سے پہلے انہیں اطلاع دی تھی کہ شاید انہیں گرفتار کیا جا سکتا ہے۔ موجودہ حالات کا اندرا گاندھی کے دور سے موازنہ کے بارے میں بھگوان دپکے نے کہا کہ انہیں ایمرجنسی کے بارے میں زیادہ تفصیلی معلومات نہیں ہیں۔ وہ ابھیجیت کے ساتھ کئے گئے سلوک کا جائزہ لینے کے بعد یہ فیصلہ کریں گےکہ موجودہ صورتحال میں مزید کیاکرنا ہے۔ گیانیش کمار کے بارے میں پوچھے جانے پر بھگوان دپکے نے الزام لگایا کہ انہیں ایک مخصوص کارروائی کیلئے لایا گیا تھا۔ پارلیمنٹ میں اراکین پارلیمنٹ کی معطلی اور صدر کے اختیارات سے متعلق قانون کا حوالہ دیتے ہوئے انہوں نے دعویٰ کیا کہ یہ سب پہلے سے طے شدہ اسکیم کا حصہ ہے۔