ڈاکٹروں نے سی ٹی اسکین اور سونوگرافی کرانے کا مشورہ دیا

پولیس بھرتی کیلئے ممبئی آرہے چند اوباش قسم کے نوجوانوں نے بیف رکھنے کے شبہ میں چالیس گاؤں سے کلیان آرہے مسلم بزرگ اشرف علی سید کی بے رحمی سے پٹائی کردی تھی۔نوجوانوں نے دادا کی عمر کے معمر شخص کا کوئی لحاظ نہ رکھتے ہوئے انہیں گھیرے میں لے کر زدوکوب کیا۔شر پسندوں کے اس حملہ میں اشرف علی سید کی آنکھ، پیٹ اور پیشاب کی نلی کے پاس اندرونی چوٹیں آئی ہیں۔ حادثہ کے ۵؍ روز بعد بھی اشرف علی سید کے زخم ٹھیک نہیں ہوئے اور ان کی تکلیف میں اضافہ ہوا تب انہیں علاج کیلئے سائن اسپتال کے آئی سی یو میں داخل کیا گیا ہے۔اہل خانہ کے مطابق ابھی ان کی حالت مستحکم ہے اور ڈاکٹروں کے مشورے پر مختلف ٹیسٹ کئے جارہے ہیں۔
  واضح رہے کہ چلتی ٹرین میں بزرگ شہری کی بے رحمی سے پٹائی کے باوجود تھانے گورنمنٹ ریلوے پولیس نے ملزمین کے خلاف معمولی دفعات لگائی تھیں اور انہیں ضمانت  مل گئی تھی۔اس پرممبرا کلوا کے رکن اسمبلی جتیندر اوہاڑ نے تھانے جی آر پی پہنچ کر سخت اعتراض جتایا اور ملزمین کے خلاف سنگین دفعات کو شامل کرنے کی درخواست کی تھی۔بعدازاں جی آر پی نے دفعات شامل کرنے کیلئے اتوار کی شام  اشرف علی سید کا دوبارہ بیان قلمبند کیا اور  پیر کو انہیں میڈیکل چیک اپ کیلئے تھانے سول اسپتال لے جایا گیا۔جہاں ڈاکٹروں نے بتایا کہ متاثرہ کی پیشاب کی نلی کے پاس ،پیٹ اور آنکھ پر گہری اندرونی چوٹیں آئی ہیں۔ڈاکٹروں کے مشورے پر اشرف علی کوپہلے کلوا کے چھترپتی شیواجی اسپتال لے جایا گیا بعد ازاں سائن اسپتال  کے آئی سی یو میں منتقل کیا گیا۔ اس بارے میں نمائندۂ انقلاب نے اشرف علی سید کے بیٹے اشفاق سید سے بات کی۔انہوں نے بتایا کہ حادثہ کے بعد سے ہی والد صاحب کو کم دکھائی دے رہا تھا اور نچلے حصہ میں درد ہورہا تھا۔ ڈاکٹروں نے جانچ کے بعد مختلف  اعضاء کا ایکسرے کروایا ہے اور سی ٹی اسکین اور سونو گرافی کرانے کا بھی مشورہ دیا ہے۔