اہل خانہ کا الزام تھا کہ لاک اپ میں غیر انسانی طریقے سے ہوئی پٹائی کے سبب گوردھن ہرمکر کی موت ہوئی تھی، انکوائری میں بات سچ ثابت ہوئی

 یہاں اکولہ میں ایک ملزم کی پولیس حراست میں بے رحمی سے پٹائی کی گئی تھی جس میں اس کی موت ہو گئی تھی۔ حراستی موت  کے   معاملہ میں تقریباً تین ماہ بعد تھانہ اکوٹ سٹی کے پولیس سب انسپکٹر سمیت تین اہلکاروں کے خلاف قتل کا مقدمہ درج کر لیا گیا ہے۔
  منگل کی رات دیر گئے اکوٹ سٹی پولیس اسٹیشن میں آئی پی سی کی دفعہ ۳۰۲؍، ۳۴؍  کے تحت یہ مقدمہ درج کیا گیا۔ مہلوک کے لواحقین کا الزام تھا کہ اس کی موت پولیس کی غیر انسانی طریقے سے کی گئی پٹائی کے سبب  ہوئی ہے۔ موصولہ تفصیلات کے مطابق ۱۵؍ جنوری ۲۰۲۴ء  کو، گووردھن ہرمکر کو ۳؍ پولیس اہلکاروں نے، اکوٹ سٹی پولیس کے سب انسپکٹر راجیش جاوارے کے ساتھ، ایک جرم کے الزام میں گرفتار کیا تھا۔ اس کےبعد ۱۶؍  جنوری کو اسے سکلی کو گاؤں لایا گیا اور گھر کی تلاشی لینے کے بعد اس کے چچا سکھ دیو ہرمکر کو بھی حراست میں لے لیا گیا۔
  الزام ہے کہ اسی دن رات دونوں کو تھانے میں پولیس نے بے دردی سے مارا پیٹا۔ اس مار پیٹ میں شدید زخمی ہونے کی وجہ سے انہیں فوری طور پر اسپتال میں داخل کروایا گیا۔ لیکن بعد میں پولیس نے گووردھن کی حالت تشویشناک ہونے پر اسے پرائیویٹ اسپتال میں داخل کروایا۔ اگلے دن ۱۷؍ جنوری کو علاج کے دوران گووردھن کی موت ہو گئی۔ لواحقین نے الزام لگایا کہ ایکسرے اور میڈیکل رپورٹس سے پتہ چلتا ہے کہ اس کے سینے کی ہڈیاں ٹوٹ چکی تھیں۔ لیکن حیران کن بات یہ ہے کہ اس معاملے میں اکوٹ پولیس میں حادثاتی موت درج کی گئی۔ متوفی کے چچا سکھدیو ہرمکر نے اس سنگین معاملے میں اسپیشل انسپکٹر جنرل آف پولیس سے شکایت کی تھی۔ اس کا نوٹس لیتے ہوئے اس معاملے میں ایک انکوائری کمیٹی تشکیل دی گئی۔ دریں اثنا، اکوٹ سب ڈیویژنل پولیس افسران کی رپورٹ کے مطابق، پولیس سپرنٹنڈنٹ نے سب انسپکٹر راجیش جاورے کے ساتھ چندر پرکاش سالونکھے نامی اہلکار کو معطل کر دیا تھا۔ منگل کی رات بالاپور کے سب ڈیویژنل پولیس افسر گوکل راج کو معاملے کی تفتیش سونپنے کے بعد، متوفی کی میڈیکل رپورٹ کے مطابق سب انسپکٹر جاوارے سمیت تین پولیس اہلکاروں کے خلاف قتل کا مقدمہ درج کیا گیا ہے۔ بتایا جاتا ہے کہ اس کیس کی مزید تفتیش سی آئی ڈی کے ذریعے کی جائے گی۔اس فیصلے کے بعد مہلوک کے اہل خانہ نے راحت کا سانس لیا ہے اور فیصلے کا استقبال کیا ہے۔