ملک بھر میں ان مجالس میں عوام مذہبی عقیدت کےساتھ ہی ساتھ قومی یکجہتی کے اظہار کیلئے بڑی تعداد میں جمع ہو رہے ہیں۔

ایران کے خلاف امریکہ اور اسرائیل کی حالیہ جنگ کے بعد ایران بھر میں محرم کی مجالس حب الوطنی پر مبنی عوامی اجتماعات کے ساتھ ہم آہنگ ہو گئی ہیں۔ ان مجالس میں مذہبی عقیدت  کےساتھ ہی ساتھ عوام  قومی یکجہتی کے اظہار کیلئے بڑی تعداد میں  جمع ہو رہے ہیں۔

ایرانی ذرائع ابلاغ نےایران  کے خلاف چھیڑی گئی جن کے بعد پہلے محرم الحرام کے موقع پر منعقدہ مجالس کو اپنی رپورٹوں میں اتحاد، ایثار اور اجتماعی ہم آہنگی کی علامت قرار دیا ہے۔  تہران ٹائمز کے مطابق محرم کے دوران ایران ایک ایسے منظر میں تبدیل ہو جاتا ہے جہاں مذہبی عقیدت، مقامی روایات اور ثقافتی ورثہ ایک دوسرے سے ہم آہنگ ہو کر اجتماعی یادداشت اور اتحاد کا اظہار کرتے ہیں۔ یزد، کاشان، مشہد، تبریز اور دیگر شہروں میں روایتی عزاداری، نخل برداری، تعزیہ اور ماتمی جلوسوں کا انعقاد کیا جا رہا ہے، جن میں ہر خطے کی مخصوص ثقافتی روایات نمایاں ہیں۔  حکام کے مطابق محرم کے آغاز کے ساتھ ہی ایک ملک گیر مہم شروع کی گئی ہے جس کا مقصد ضرورتمند قیدیوں کی رہائی کے لیے مالی معاونت فراہم کرنا ہے۔ تجزیہ نگاروں کا کہنا ہے کہ ایران میں محرم صرف  سوگ کا مہینہ نہیں بلکہ قومی شناخت، تاریخی شعور اور ظلم کے خلاف مزاحمت کے تصور سے  جڑا ہوا ہے۔