بنگلہ دیش کی سابق وزیراعظم شیخ حسینہ کی جانب سے نئے پاسپورٹ کیلئے دوسری درخواست کے بعد ذرائع نے کہا ہے کہ ڈھاکہ کا حوالگی پر اصرار ان کی وطن واپسی میں تاخیر کا حربہ ہے، جبکہ ہندوستان نے ان کی رضاکارانہ واپسی میں کوئی رکاوٹ پیدا نہیں کی ہے۔
EPAPER
Updated: November 20, 2026, 9:36 PM IST | New Delhi
بنگلہ دیش کی سابق وزیراعظم شیخ حسینہ کی جانب سے نئے پاسپورٹ کیلئے دوسری درخواست کے بعد ذرائع نے کہا ہے کہ ڈھاکہ کا حوالگی پر اصرار ان کی وطن واپسی میں تاخیر کا حربہ ہے، جبکہ ہندوستان نے ان کی رضاکارانہ واپسی میں کوئی رکاوٹ پیدا نہیں کی ہے۔
بنگلہ دیش کی جانب سے سابق وزیراعظم شیخ حسینہ کی ہندوستان سے حوالگی (ایکسٹراڈیشن) پر اصرار دراصل ان کی وطن واپسی میں تاخیر کرنے کا ایک حربہ ہے، جبکہ ہندوستان فریق نے ان کی رضاکارانہ واپسی میں کوئی رکاوٹ پیدا نہیں کی ہے۔ یہ بیان عوامی لیگ کی لیڈر کی جانب سے نئے پاسپورٹ کیلئے دوسری درخواست دئیے جانے کے بعد سامنے آیا ہے۔ ۷۹؍ سالہ شیخ حسینہ اگست ۲۰۲۴ء میں طلبہ کی قیادت میں ہونے والی بغاوت کے نتیجے میں اپنی حکومت کے خاتمے کے بعد سے بھارت میں مقیم ہیں۔ انہوں نے ہندوستان ٹائمز سمیت حالیہ انٹرویوز میں اس بات پر اصرار کیا ہے کہ احتجاجی مظاہرین کے خلاف اپنی حکومت کے کریک ڈاؤن کے معاملے میں سزائے موت سنائے جانے کے باوجود وہ دسمبر میں بنگلہ دیش واپس جانے کا ارادہ رکھتی ہیں۔ شیخ حسینہ کی نمائندگی کرنے والی لندن کی قانونی فرم `میٹرکس چیمبرزنے ۹؍ نومبر کو نئی دہلی میں بنگلہ دیشی ہائی کمیشن کو ای میل کرکے ان کیلئے نئے پاسپورٹ اور قومی شناختی کارڈ کی درخواست کی تھی، جس کے بعد ڈھاکہ کے حکام نے اس خط و کتابت میں حسینہ کی جانب سے اجازت نامہ نہ ہونے پر سوالات اٹھائے تھے۔ اس کے جواب میں میٹرکس چیمبرز نے جمعرات کو دوسرا خط بھیجا، جس کے ساتھ شیخ حسینہ کا دستخط شدہ اجازت نامہ بھی منسلک ہے جس میں انہیں اپنی طرف سے کارروائی کرنے کا اختیار دیا گیا ہے۔۹؍ نومبر کو حسینہ کی درخواست کے فوراً بعد، بنگلہ دیش کے وزیر مملکت برائے خارجہ امور ہمایوں کبیر نے کہا تھا کہ ان کی حکومت ان کی حوالگی پر اصرار کرے گی کیونکہ وہ ایک ’’ قاتل اور دہشت گرد‘‘ ہیں جو مبینہ طور پر۲؍ ہزار سے زائد افراد کو قتل کرنے کے بعد ملک سے فرار ہو گئی تھیں۔ انہوں نے یہ بھی کہا تھا کہ بنگلہ دیش ’’دہشت گردوں کو پاسپورٹ نہیں دیتا۔‘‘
یہ بھی پڑھئے: رکن پارلیمنٹ یوسف پٹھان کو ۱۵؍ کروڑ کی زمین مفت ملے گی، ۱۴؍ سال سےکوشش کررہے تھے
تاہم، مذکورہ باخبر ذرائع نے مؤقف اختیار کیا کہ حسینہ کو وطن واپسی کیلئے درکار واحد سفری دستاویز (پاسپورٹ) دینے سے انکار کر کے اور ساتھ ہی ان کی حوالگی کا مطالبہ کر کے ڈھاکہ دراصل ان کی واپسی کو لٹکا رہا ہے۔ ایک ذریعے نے کہا، ’’اس سے یہ اخذ کیا جا سکتا ہے کہ بنگلہ دیشی حکومت درحقیقت اس وقت ان کی واپسی نہیں چاہتی۔ بنگلہ دیش حوالگی پر اصرار کر رہا ہے، جو ایک ایسا قانونی عمل ہے جو اپنی نوعیت کے اعتبار سے کافی پیچیدہ ہے۔‘‘ ذرائع نے مزید وضاحت کی کہ حوالگی (ایکسٹراڈیشن) کا عمل اس مفروضے پر مبنی ہوتا ہے کہ کوئی شخص اپنی مرضی سے واپس نہیں آئے گا اور یہ وہ طریقہ کار ہے جسے کوئی ریاست تب استعمال کرتی ہے جب اسے کسی کی واپسی کو یقینی بنانا ہو، جبکہ شیخ حسینہ عوامی طور پر یہ کہہ چکی ہیں کہ وہ رضاکارانہ طور پر وطن واپس جائیں گی اور عدالت کے سامنے خود کو پیش کریں گی۔ ذریعے کے مطابق، ’’جہاں متعلقہ شخص نے اپنی مرضی سے واپس جانے کا فیصلہ کر لیا ہو، وہاں حوالگی کا سوال ہی پیدا نہیں ہوتا۔‘‘ اس کے ساتھ ہی ذرائع نے اس بات پر زور دیا کہ ہندوستان نے شیخ حسینہ کی رضاکارانہ واپسی میں کوئی رکاوٹ کھڑی نہیں کی ہے اور ان کی واپسی صرف سفری دستاویز کی عدم دستیابی کی وجہ سے رکی ہوئی ہے۔ یہ دستاویز صرف بنگلہ دیش ہی جاری کر سکتا ہے کیونکہ حسینہ بنگلہ دیش کی شہری ہیں۔ رپورٹس کے مطابق، حسینہ کے ہندوستان آنے کے تقریباً دو ہفتے بعد ۲۲؍ اگست ۲۰۲۴ء کو ان کا سفارتی پاسپورٹ منسوخ کر دیا گیا تھا اور ۱۶؍ فروری ۲۰۲۵؍ کو ان کا قومی شناختی کارڈ بھی بلاک کر دیا گیا تھا۔ذرائع نے واضح کیا کہ پاسپورٹ اور قومی شناختی کارڈ کا اجرا بنگلہ دیش اور اس کے شہری کے درمیان کا معاملہ ہے، جبکہ حوالگی ایک الگ قانونی معاملہ ہے اور ان دونوں کو آپس میں خلط ملط نہیں کیا جانا چاہئے۔ انہوں نے کہا کہ اپنی مرضی سے واپس آنے والے شخص کو حوالگی کی ضرورت نہیں ہوتی اور بنگلہ دیشی قانون کے تحت پاسپورٹ پر پابندی کی دفعات دراصل ’’ایگزٹ کنٹرول اقدامات‘‘ (ملک سے باہر جانے سے روکنے کے اقدامات) ہیں، جنہیں کسی بنگلہ دیشی شہری کو وطن واپس آنے سے روکنے کیلئے نہیں بنایا گیا تھا۔ اس تناظر میں انہوں نے `بنگلہ دیش پاسپورٹ آرڈر ۱۹۷۳ء کی متعدد دفعات کا حوالہ دیا، جن کا مقصد صرف کسی شخص کو مقدمات سے بچنے کیلئے ملک سے فرار ہونے سے روکنا ہے۔
یہ بھی پڑھئے: اُدیشہ: سمندری طوفان کے پیش نظر ایک لاکھ سے زائد افراد محفوظ مقام پر منتقل
یاد رہے کہ دسمبر ۲۰۲۴ء میں بنگلہ دیش کی جانب سے پہلی بار حسینہ کی حوالگی کا مطالبہ کئے جانے اور اس کے بعد کئی درخواستیں بھیجے جانے کے بعدہندوستانی فریق نے کہا تھا کہ وہ اس معاملے کو قانونی طریقہ کار کے تحت نمٹائے گا۔ دوسری جانب، مختلف بین الاقوامی کنونشنزجن کا بنگلہ دیش بھی فریق ہےکی دفعات کے تحت بھی شیخ حسینہ کو واپسی کی اجازت ملنی چاہئے۔ ان میں `انسانی حقوق کا عالمی منشور (یو ڈی ایچ آر) شامل ہے جو کسی بھی شخص کے اپنے ملک چھوڑنے اور وہاں واپس آنے کے حق کو تسلیم کرتا ہے اور `شہری و سیاسی حقوق کا بین الاقوامی معاہدہ (آئی سی سی پی آر) جو کسی کو من مانے طور پر’’اپنے ملک‘‘ میں داخل ہونے کے حق سے محروم کرنے کے خلاف تحفظ فراہم کرتا ہے۔ اسی طرح `نسلی امتیاز کے تمام اشکال کے خاتمے کا بین الاقوامی کنونشن قومیت کے حق میں قانون کے سامنے برابری کا تقاضا کرتا ہے، جبکہ `بین الاقوامی شہری ایوی ایشن کی تنظیم (آئی سی اے او) کے انیکس ۹؍ اور `قونصلر تعلقات سے متعلق ویانا کنونشن ۱۹۶۳ء کے آرٹیکل ۵؍(ڈ ی) کے تحت کسی بھی ریاست سے یہ توقع کی جاتی ہے کہ وہ بیرونِ ملک مقیم اپنے شہریوں کو سفری دستاویزات جاری کرے، ان کی تجدید یا تبدیلی کرے اور انہیں واپس ملک میں قبول کرے۔