بالی ووڈ اداکارہ، پروڈیوسر اور کاروباری شخصیت عالیہ بھٹ ارتھ شاٹ پرائز۲۰۲۶ء میں عالمی ستاروں کے ساتھ شرکت کریں گی۔ یہ عالمی ماحولیاتی ایوارڈ تقریب ۱۷؍ نومبر ۲۰۲۶ء کو ممبئی میں منعقد ہوگی، جہاں عالیہ بھٹ پانچ بڑے ارتھ شاٹ ایوارڈز میں سے ایک ایوارڈ پیش کریں گی۔

بالی ووڈ اداکارہ، پروڈیوسر اور کاروباری شخصیت عالیہ بھٹ ارتھ شاٹ پرائز۲۰۲۶ء میں عالمی ستاروں کے ساتھ شرکت کریں گی۔ یہ عالمی ماحولیاتی ایوارڈ تقریب  ۱۷؍ نومبر ۲۰۲۶ء  کو ممبئی میں منعقد ہوگی، جہاں عالیہ بھٹ پانچ بڑے ارتھ شاٹ ایوارڈز میں سے ایک ایوارڈ پیش کریں گی۔  اس تقریب میں عالیہ بھٹ کے ساتھ آسکر ایوارڈ یافتہ اداکار  رامی ملک  ، ہندوستانی کرکٹ کے مایہ ناز کھلاڑی  سچن تینڈولکر اور برطانوی اداکارہ  اور گلوکارہ  سیمون ایشلے  بھی شریک ہوں گے۔ تقریب کی میزبانی معروف فلم ساز اور ٹیلی ویژن شخصیت  کرن جوہر کریں گے  جبکہ اداکارہ  سونم کپور  بھی ایوارڈ پیش کرنے والوں میں شامل ہیں۔ 
 عالیہ بھٹ نے ارتھ شاٹ پرائز کا حصہ بننے پر خوشی کا اظہار کرتے ہوئے کہا کہ یہ انعام امید کے ساتھ ساتھ ایسے خیالات اور عملی اقدامات کو اجاگر کرتا ہے جو دنیا کو آگے بڑھنے کے نئے راستے دکھا رہے ہیں۔ انہوں نے دنیا بھر میں ماحول کے تحفظ اور کرۂ ارض کی بحالی کے لیے کام کرنے والے افراد اور اداروں کی کوششوں کو سراہا۔ عالیہ کے مطابق ممبئی میں دنیا بھر کے ایسے افراد کا ایک جگہ جمع ہونا ان کے لیے خاص موقع ہے اور انہیں ان لوگوں کو خراجِ تحسین پیش کرنے پر فخر ہے جو ماحول کے لیے عملی حل تلاش کر رہے ہیں۔ 

یہ بھی پڑھئے:ایشین گیمز:ابھیشیک کے گول سے ہندوستان نے ہاکی کے فائنل میں جگہ بنائی

ارتھ شاٹ پرائز ۲۰۲۶ءکی تقریب میں تقریباً  ۵ ؍ہزار مہمانوں  کی شرکت متوقع ہے۔ اس میں فلم، موسیقی، کھیل اور تفریحی دنیا کی معروف شخصیات کے علاوہ ماحولیاتی تحفظ، موسمیاتی ٹیکنالوجی اور پائیدار ترقی کے شعبوں میں کام کرنے والے افراد اور ادارے بھی شامل ہوں گے۔ تقریب کا مقصد ایسے اختراعی حل پیش کرنے والوں کو عالمی سطح پر نمایاں کرنا ہے جو دنیا کے بڑے ماحولیاتی مسائل سے نمٹنے کے لیے کام کر رہے ہیں۔ 
۲۰۲۶ء کے ارتھ شاٹ پرائز میں پانچ مختلف زمروں کے فاتحین کا اعلان کیا جائے گا۔ یہ زمرے  قدرتی ماحول کا تحفظ اور بحالی ، صاف ہوا ، سمندروں کی بحالی  ، کچرے سے پاک دنیا کی تعمیر   اور  موسمیاتی تبدیلی سے نمٹنا  ہیں۔ پانچوں فاتحین کو اپنے حل کو مزید وسعت دینے اور عملی اثر بڑھانے کے لیے  ۱۰؍ لاکھ پاؤنڈ  کی انعامی رقم دی جائے گی۔  ۲۰۲۶ء کی تقریب کی خاص اہمیت یہ بھی ہے کہ دی ارتھ شاٹ پرائز پہلی مرتبہ   ہندوستان میں منعقد ہورہا ہے۔ ممبئی کو اس عالمی تقریب کے لیے منتخب کیا گیا ہے، جسے ارتھ شاٹ پرائز نے ماحولیاتی چیلنجز اور ان کے ممکنہ حل دونوں کے حوالے سے اہم عالمی شہر قرار دیا ہے۔ اس تقریب کے ذریعے بھارت میں ماحول دوست اختراعات، پائیدار ترقی اور موسمیاتی کارروائی کے لیے کام کرنے والوں کو عالمی پلیٹ فارم ملے گا۔ 

یہ بھی پڑھئے:اجے دیوگن نے ’’درِیشیم: دی کنکلوژن‘‘ کے لیے موہن لال کی منظوری طلب کی

اس سال ارتھ شاٹ پرائز پہلی مرتبہ عالمی سطح پر  پرائم ویڈیو کے ذریعے نشر کی جائے گی۔ اس کے نتیجے میں یہ تقریب  ۲۴۰؍ سے زیادہ ممالک اور خطوں  میں دیکھی جاسکے گی اور ۴۰ ؍سے زائد زبانوں  میں عالمی ناظرین تک پہنچے گی۔ اس طرح ممبئی میں ہونے والی یہ تقریب عالمی سطح پر ماحولیاتی جدت اور عملی اقدامات کو اجاگر کرنے کا ایک بڑا پلیٹ فارم بنے گی۔ 
 دی ارتھ شاٹ پرائز  کا آغاز پرنس ولیم نے ۲۰۲۰ء میں کیا تھا۔ اس کا بنیادی مقصد ایسے افراد، اداروں اور اختراع کاروں کی حوصلہ افزائی کرنا ہے جو کرۂ ارض کو درپیش بڑے ماحولیاتی مسائل کے لیے قابلِ عمل حل تیار کر رہے ہیں۔ ۲۰۲۶ء کی ممبئی تقریب میں دنیا بھر سے منتخب کیے گئے فائنلسٹس کو عالمی سطح پر متعارف کرایا جائے گا اور ان کے کام کو مزید آگے بڑھانے کے لیے مالی معاونت فراہم کی جائے گی۔  عالیہ بھٹ کی شرکت نے اس عالمی ماحولیاتی تقریب میں بالی ووڈ کی موجودگی کو مزید نمایاں کردیا ہے۔