کانگریس لیڈر الکا لامبا نے خواتین اوربچیوں کے ساتھ ہوئےدرندگی کے واقعات کاحوالہ دیتے ہوئےبی جے پی پر مجرموں کی پشت پناہی کا الزام لگایا۔

:کانگریس لیڈر الکا لامبا نے ملک میں خواتین پر ہو رہے مظالم کے خلاف شدید ردعمل کا اظہار کیا ہے اوربی جےپی حکومت پرمجرموں کادفاع اورپشت پناہی کرنے کا الزام لگایا ہے۔ الکا لامبا نے کہا کہ خواتین کے جنسی استحصال کے واقعات میں انصاف کی مانگ کو کچلنے کی کوشش بھی کی جارہی ہے۔ الکا لامبا نئی دہلی میں آل انڈیا کانگریس کمیٹی کے صدر دفتر پر منعقدہ پریس بریفنگ سے خطاب کر رہی تھیں۔ انہوں نے ۱۹؍ جولائی۲۰۲۵ء کو ادیشہ کے پوری ضلع میں پیش آئے ایک ہولناک واقعے کا ذکر کرتے ہوئے کہا کہ تین افراد نے ایک نابالغ بچی کا اغوا کیا اور زندہ جلا دیا۔ بعد ازاں اسے دہلی کے ایمس اسپتال لایا گیا جہاں ۱۵؍سال کی وہ معصوم بچی زخموں کی تاب نہ لاکر دم توڑ گئی۔ الکا لامبا نے سوال اٹھایا کہ آخر ان درندوں کو گرفتار کیوں نہیں کیا گیا؟ پولیس کی جانب سے جواب آیا کہ کسی کا ہاتھ ثابت نہیں ہوا۔ انہوں نے اسے پولیس اور حکومت کی کھلی ناکامی قرار دیا۔ 
 مدھیہ پردیش اسمبلی اجلاس کا حوالہ دیتے ہوئے الکا لامبا نے کہا کہ کانگریس ایم ایل اے عارف مسعود نے۲۰۲۲ء سے۲۰۲۴ءکے درمیان ریاست میں دلت اور آدیواسی خواتین کے ساتھ ہونے والے آبروریزی کے و اقعات کی تعداد پوچھی جس پر حکومت نے اعتراف کیا کہ مذکورہ مدت میں ۷۴۱۸؍ خواتین کے ساتھ زیادتی ہوئی۔ الکا لامبا نے بتایا کہ جیسے ہی پارلیمنٹ کا اجلاس شروع ہوا، کانگریس کی خواتین وِنگ نے ’نیائے مارچ‘ نکالا تاکہ ایوان میں خواتین کی سلامتی کا موضوع اٹھایا جا سکے لیکن پولیس نے ان کی آواز دبانے کے لیے انہیں آٹھ گھنٹوں تک نجف گڑھ تھانے میں بند رکھا۔ 
 انہوں نے بی جے پی پر براہ راست حملہ کرتے ہوئے کہا کہ پارٹی لیڈر مجرموں کی پشت پناہی کر رہے ہیں۔ انہوں نے کہا کہ کرناٹک کے ایم پی پرجول ریونّا کے خلاف متعدد خواتین نے اجتماعی زیادتی کا الزام لگایا، اس کے باوجود نریندر مودی ان کے لیے انتخابی مہم چلاتے رہے۔ دوسری طرف راہل گاندھی نے اس معاملے کو سنجیدگی سے لیا اور کرناٹک کی کانگریس حکومت نے فاسٹ ٹریک عدالت میں کارروائی کے ذریعے محض۱۵؍ ماہ میں ریونّا کو مجرم قرار دلوایا۔ 
 الکا لامبا نے اعلان کیا کہ بی جے پی کو مجرموں کا دفاع بند کرنا چاہئے۔ انہوں نے کہا کہ خواتین کی حفاظت ایک سنجیدہ قومی مسئلہ بن چکی ہے اور کانگریس اس پر خاموش نہیں بیٹھے گی۔ انصاف مارچ جاری رہے گا، چاہے پولیس طاقت کا استعمال کرے یا گرفتاریاں کرے۔ انہوں نے مطالبہ کیا کہ متاثرہ خاندانوں کو مناسب تحفظ اور معاوضہ دیا جائے، اور خواتین سے متعلق جرائم کے مقدمات فاسٹ ٹریک عدالتوں میں چلائے جائیں تاکہ متاثرہ خواتین کو جلد انصاف ملے۔