منی لانڈرنگ کیس میں دفاعی وکیل امیت دیسائی نے کہا کہ تفتیشی ایجنسی ناپسندیدہ چہرے یا شخصیت کی بناء پر منظم جرائم کے سلسلہ میں اپنے فرض منصبی کو بالائے طاق رکھ کر تفتیش نہیں کر سکتی ۔آج بھی اس معاملے پر سماعت ہوگی

: ریاستی وزیر برائے اقلیتی امور نواب ملک کے وکیل امیت دیسائی نے بدھ کو انفورسمنٹ ڈائریکٹوریٹ (ای ڈی ) کے ذریعے اپنے موکل کی گرفتاری کے خلاف بحث کا سلسلہ جاری رکھتے ہوئے جہاں سپریم کورٹ کے کئی حوالوں سے اس کارروائی کو غلط ثابت کرنے کی کوشش کی وہیں  انہوں نے اپنے موکل کے گزشتہ ۱۶؍ دن سے قید و بند کی صعوبتیں برداشت کرنے کا جواز پیش کرتے ہوئے فوری راحت دینے کی اپیل بھی کی ۔بدھ کو بھی بحث کا سلسلہ مکمل نہیں ہوسکا ہے ۔ جمعرات (آج) کو ایک طرف دفاع اپنی جرح مکمل کرے گا  دوسری طرف ای ڈی کی جانب سے وکیل استغاثہ درخواست کو مسترد کرنے کیلئے دلائل دے گا ۔
  بدھ کو ہونے والی شنوائی کے دوران   نواب ملک کے  وکیل امیت دیسائی نے کہا کہ ’’  تفتیشی ایجنسی قیاس آرائیوں یا خیالی جواز پیش کرکے نہ تو اپنے فرضی منصبی کو بالائے طاق رکھ سکتی ہے اور نہ ہی نا پسندیدہ چہرہ یا شخصیت ہونے کی بنیاد پر کسی منظم جرائم میں ملوث ہونے کا الزام لگا سکتی ہے ۔‘‘ انہوں نے بامبے ہائی کورٹ ۲؍  رکنی بنچ کے جسٹس پی بی ورالے اور جسٹس ایس ایم مودک سے یہ بھی کہا کہ’’ جائیداد کی خرید و فروخت کا معاملہ جس پر ۲۰؍ سال بعد اعتراض کیا گیا ہے ، ایک طویل بحث پر مبنی ہے لیکن اس کی وجہ سے میرے موکل جو گزشتہ ۱۶؍ دن سے قید و بند کی صعوبتیں برداشت کررہے ہیں ، کو عبوری راحت دیتے ہوئے رہا کیا  جائے ۔ ان کی رہائی کے بعد ہم زمین کی خرید و فروخت کی قانونی جنگ لڑتے رہیں گے ۔‘‘  انہوں نے یہ بھی کہا کہ ’’ کرلا میں واقع گوا والا بلڈنگ نامی جائیداد جس کے مالکانہ حقوق ۲۲؍ سال قبل منیرہ پلمبر نامی خاتون کے نام پر ہوا کرتے تھے، اب وہ اس جائیداد کے اختیارات موجودہ مالک کو دینے سے انکار کررہی ہے ۔‘‘ 
 امیت  دیسائی نے نواب ملک کے خلاف منی لانڈرنگ کے تحت درج کردہ کیس کے غلط  ہونے کی دلیل پیش کرتے ہوئے سپریم کورٹ کے کئی فیصلوں کو ۲؍ رکنی بنچ کے روبرو پڑھ کر سنایا تھا ۔ عدالت نےدفاع کی دلیلوں کو سننے کے بعد ایک بار پھر اس معاملہ میں جمعرات کو بھی بحث کا سلسلہ جاری رکھنے کا حکم دیتے ہوئے سماعت کو ملتوی کر دیا ہے ۔