ووٹر لسٹ سے نام کٹناان کیلئے صرف حق رائے دہی سے محرومی نہیں ہےبلکہ روزگار سے محرومی ہے کیوں کہ بیرون ِ ریاست انہیں کام حاصل کرنے کیلئے اکثر شناختی کارڈدکھانا پڑتا ہے

مغربی بنگال کےمرشد آباد ضلع کے شمشیرگنج  سے تعلق رکھنے والے مہاجر مزدور محمد عنیق الحق  اپنی زندگی میں کئی بحرانوںکا سامنا کرچکے ہیں۔ ۲۰۱۶ء کی نوٹ بندی  کے دوران وہ  کھانا، پانی اور نقدی کیلئے قطاروں میں کھڑے  رہے۔ کووڈ-۱۹؍  کے لاک ڈاؤن کے دوران انہوں نے  اڈیشہ میں  باہر سے بندعمارتوں  میں ’’جیل میں کسی چور کی طرح ‘‘ کام  کیا اورگھر واپسی کا انتظار کرتے رہے۔ مگر اس بار صورتحال مختلف ہے۔
 ووٹر لسٹ کی ’’خصوصی جامع نظر ثانی ‘‘ (ایس آئی آر) کے بعد ان کا نام ووٹر لسٹ سے کٹ  گیا ہے  جس کی وجہ سے شدید ذہنی اذیت کا شکار ہیں۔ اپیلی  ٹربیونل میں ان کی اپیل   زیر التوا ہے اور وہ اپنے حق رائے دہی کی بحالی کے منتظر ہیں ۔ ووٹر لسٹ میں نام بحال ہو تو وہ پھر ریاست کےباہر مزدوری کیلئے روانہ ہوں۔ وہ  عید  کے موقع پر وطن واپس آئے تھے اوراس کےبعدسے  یہاں مجبوراً بیڑی بنانے کا کام کررہے ہیں جس  سےانہیں معمول کی آمدنی کے مقابلے  میں آدھی آمدنی ہوتی ہے۔  انہیں  ڈرہے کہ ووٹر لسٹ میں نام بحال نہ ہوا تو انہیں نشانہ بنایا جاسکتاہے اس لئے   نام کی بحالی سے پہلے وہ  ریاست سے باہر جانے سے گریز کر رہے ہیں۔ ان کیلئے ووٹ کھونا گویا روزگار کھونے کے مترادف ہے۔وہ کہتے ہیں’’یقیناً  ڈر لگا رہتا ہے ۔ تمام ضروری دستاویز ہونے کے باوجود  صرف بنگالی بولنے کی وجہ سے کئی ریاستوں میں ہمیں بنگلہ دیشی کہا جاتا ۔ اب جب نام بھی  ووٹر لسٹ سے ہٹا دیا گیا ہے تو یہ خطرہ اور بڑھ گیا ہے۔‘‘
 عنیق الحق جو ادیشہ، جھارکھنڈ، بہاراور تمل ناڈو میں مزدوری کرچکے ہیں، نے نیوز لانڈری سے بات چیت میں بتایا کہ ان کے خاندان کے ۹؍میں سے ۸؍ نام ووٹر لسٹ سے ہٹا دیئے گئے ہیں۔ الیکشن رجسٹریشن آفیسر کو دی گئی درخواست میں نام کاٹنے کی وجہ یہ بتائی گئی ہے کہ یہ نام’’ایک ایسے فرد سےجڑے ہوئے  ہیں  جسے ۶؍ افراد نے   اپنا پیرنٹ (والد/ یا والد ہ ) بتایا ہے۔‘‘ دوسری  طرف عینق الحق کا کہنا ہے کہ ان کے پاس تمام ضروری دستاویز موجود ہیں۔
  بنگال میں ایس آئی آر کے دوران جن حلقوں میں سب سے زیادہ نام کٹے ہیں ان مکیں  شمشیر گنج شامل ہے جومسلم  اکثریتی حلقہ ہے ۔ بنگال میں ایس آئی آر پر تنقید کرنے والوں کا کہنا ہے کہ ایس آئی آر  دراصل شہریت کے تعین کا ذریعہ بن رہا ہے۔  یوگیندر یادوجیسے سیاسی کارکن جو ایس آئی آر کا قریب سے جائزہ لے رہے ہیں، کا ماننا ہے کہ ’’عمل آئینی اقدار کو چیلنج کر رہا ہے۔‘‘ کارکنان کا موقف ہے کہ الیکشن کمیشن کو شہریت کے تعین کا کوئی اختیار نہیں