بھیونڈی نظام پور شہر میونسپل کارپوریشن کے عام انتخابات میں پرچۂ نامزدگی واپس لینے کے آخری دن بھارتیہ جنتا پارٹی(بی جے پی) کے ۵؍ امیدوار بلا مقابلہ منتخب قرار پائے۔

بھیونڈی نظام پور شہر میونسپل کارپوریشن کے عام انتخابات میں پرچۂ نامزدگی واپس لینے کے آخری دن بھارتیہ جنتا پارٹی(بی جے پی) کے ۵؍ امیدوار بلا مقابلہ منتخب قرار پائے۔ ان کامیاب امیدواروں میں ایک مسلم امیدوار ابو سعد شیخ (للن)بھی شامل ہیں۔ واضح ہوکہ الیکشن کمیشن کے طے شدہ پروگرام کے مطابق جمعہ کو پرچۂ نامزدگی واپس لینے کا آخری دن تھا۔ آخری دن دیگر امیدواروں کی جانب سے نامزدگی کے پرچے واپس لئے جانے کے بعد متعلقہ وارڈ میں مقابلہ باقی نہ رہنے کی وجہ سے بی جے پی کے ۵؍امیدواروں کو بلا مقابلہ منتخب اعلان کیا گیا۔ اس طرح بھیونڈی میں بی جے پی کے بلا مقابلہ منتخب ہونے والے امیدواروں کی مجموعی تعداد ۶؍ ہو گئی ہے۔ 
بلا مقابلہ منتخب ہونے والے امیدواروں میں وارڈ نمبر ۱۸؍ ’اے‘ سے اشونی پھوٹانکر، وارڈ نمبر ۱۸؍’ بی‘ سے دیپا مڈھوی، پربھاگ نمبر ۱۸؍’سی ‘سے ابو سعد احمد شیخ (للن)، پربھاگ نمبر ۱۶؍ ’اے‘ سے پریش (راجو) چوگھلے اور پربھاگ نمبر ۲۳؍’بی‘ سے بھارتی چودھری شامل ہیں۔ اس سے قبل نامزدگی واپس لینے کے پہلے دن وارڈ نمبر ۱۷؍’ بی‘ سے سُمیت پاٹل بلا مقابلہ منتخب قرار پائے تھے۔ واضح ہوکہ پاٹل سابق رکن پارلیمان کپل پاٹل کے بھتیجے اور پریش چوگھلے، مغربی حلقہ کے رکن اسمبلی مہیش چوگھلے کے چچیرے بھائی ہیں۔