ایران پر حملہ کے معاملے میں  حکومت کے رویے کو ہندوستان کی قومی اقدار اور مفادات کے منافی قراردیا۔

ایران کی خود مختاری اور بین الاقوامی قوانین کی کھلی خلاف ورزی کرتے ہوئے پر اسرائیل اور امریکہ کے ذریعہ اس پر کئے گئے حملے کے تعلق سے مودی سرکار کے رویے پر کانگریس نے اتوار کو پرزور حملہ کیا۔ پارٹی کے جنرل سیکریٹری جے رام رمیش نے الزام لگایا کہ ایران پر مسلط کی گئی جنگ پر مرکز کا ردعمل ہندوستان کی ’’قدروں، اصولوں، تشویشات اور مفادات‘‘ سے غداری کے مترادف ہے۔ پارٹی نے کہا کہ ملک مودی کی خارجہ پالیسی کے ’’مواد اور انداز‘‘ دونوں کی بھاری قیمت چکا رہا ہے۔ 
کانگریس کے جنرل سیکریٹری نے ’ایکس‘ پر ایک تفصیلی پوسٹ میں  امریکی صدر ڈونالڈ ٹرمپ کے ان حالیہ بیانات کا حوالہ دیا جن میں انہوں نے پاکستان کے فوجی سربراہ فیلڈ مارشل عاصم منیر اور وزیر اعظم شہباز شریف کی تعریف کی تھی۔  انہوں  نے وزیر اعظم کے اسرائیل کے دورے اور وہاں کی پارلیمنٹ کنیسٹ میں خطاب کو بھی تنقید کا نشانہ بنایا کیونکہ اس وقت امریکہ اور اسرائیل کا حملہ بہت قریب تھا۔ انہوں نے کہا کہ یہ دورہ ’’شرمناک اخلاقی بزدلی‘‘ کا مظاہرہ تھا۔ انہوں نے دہرایا کہ ایران پر مسلط کی گئی جنگ، جس میں ٹارگٹڈ قتل بھی شامل ہے، پر مودی حکومت کا ردعمل ’’ہندوستان کی قدروں، اصولوں، تشویشات اور مفادات سے غداری‘‘ ہے۔ کانگریس جنرل سیکریٹری اور وایناڈ کی رکن پارلیمان پرینکا گاندھی واڈرا نے بھی’ایکس‘ پر اپنی پوسٹ میں امریکہ اور اسرائیلی حملے کی مذمت کی اور مہاتما گاندھی کے الفاظ دہرائے: ’’آنکھ کے بدلے آنکھ پوری دنیا کو اندھا کر دے گی۔ ‘‘