برطانیہ کے چیف آف ڈیفنس اسٹاف کے مطابق عالمی وبا کی وجہ سے آئی معاشی تباہی جنگ کا باعث بن سکتی ہے

برطانیہ کے چیف آف ڈیفنس اسٹاف نے کہا ہے کہ کورونا وائرس کے سبب  دنیا بھر میں پیدا ہونے والے معاشی بحران سے تیسری جنگ عظیم کا خدشہ پیدا ہوگیا ہے۔ ایک نیوز ایجنسی کے مطابق برطانیہ میں چیف آف ڈیفنس اسٹاف سر نک کارٹر نے ایک انٹرویو میں کہا ہے کہ’’ ہمیں ۲۰؍ ویں صدی میں جنگوں کی وجہ بننے والے عوامل پر غور کرنا چاہئے اور ان سے سبق سیکھنا چاہئے۔‘‘
 سر نک کارٹر نے مزید کہا کہ عالمی وبا کی وجہ  سے  دنیا بھر کی معیشت بحران کا شکار ہے اور ایسے موقع پر کسی قسم کے جارح عمل سے دنیا بھر میں جاری علاقائی تنازعات کو ہوا مل سکتی ہے جس سے ممکنہ جنگ چھڑنے کا خوف موجود ہے اور دنیا کو تیسری جنگ عظیم کا سامنا ہوسکتا ہے۔اپنے انٹرویو میں برطانوی چیف آف ڈیفنس نے اس جانب بھی توجہ دلائی کہ ۲۰؍ ویں صدی میں ہونے والی جنگیں بھی اپنے مفادات کیلیے یکجا ہونے والے مختلف ممالک کے اتحاد سے قائم ہونے والی سیاسی تنظیموں کا نتیجہ تھیں۔
 سر نک کارٹر کا مزید کہنا تھا کہ یہی خطرہ اب بھی موجود ہے، پہلی اور دوسری جنگ عظیم سے پہلے بھی ممالک نے جارحیت کا مظاہرہ کیا گیا تھا جس کی بنیاد پر غلط اندازے لگائے گئے جو آخر کار جنگ کا باعث بنے۔برطانوی چیف آف ڈیفنس نے عالمی قوتوں کی جانب سے تاریخ دوبارہ نہیں دہرانے کی امید کرتے ہوئے اس بات پر زور دیا کہ برطانیہ سمیت عالمی قوتیں تیسری جنگ عظیم کے خدشے کے پیش نظر علاقائی تنازعات کو حل کرلیں۔ واضح رہے کہ کورونا وائرس کے سبب دنیا بھر میں  مختلف قسم کے   سازشی نظریا ت کو ہوا مل رہی ہے ۔ اس دوران برطانیہ کے ایک اعلیٰ عہدیدار کا یہ بیان اپنے آپ  معنی خیز ہو جاتا ہے۔