کیوبا نے انسانی اسمگلنگ کے ایک گروہ کا انکشاف کیا ، کہا کہ ہمارے شہریوں کو یوکرین میں لڑنے پر مجبور کیا جا رہا ہے،حکام اس نیٹ ورک کو ختم کرنے کیلئے کام کر رہے ہیں۔ اب تک صدارتی انتظامیہ یوکرین تنازع میں ملوث ہونے کی تردید کرتا رہا ہے

’کیوبا کے شہری کی روس کیلئے لڑ رہےہیں۔ ‘‘ کیوبا   نے اس کا انکشاف کیا ہے ۔ اس نے انسانی اسمگلنگ کے ایک گروہ کا انکشاف کیا ہے جس نے اس کے شہریوں کو یوکرین کی جنگ میں روس کی جانب سے لڑنے پر مجبور کیا تھا جبکہ اس کی وزارت خارجہ نے کہا کہ حکام اس نیٹ ورک کو ختم کرنے کے لئے کام کر رہے ہیں۔ میڈیارپورٹس کے مطابق کیوبا کی وزارت خارجہ کے بیان میں  اس کی تفصیل بتائی گئی ہے۔  رائٹرز  کے مطابق کیوبا کہ وزارت خارجہ نے اپنے بیان میں بتایا کہ اسمگلنگ میں ملوث گروہ ماسکو سے ہزاروں میل دور کیریبین جزائر کے ملک اور روس دونوں میں کام کر رہا تھا۔
  کیوبا کی حکومت کی جانب سے جاری بیان میں کہا گیا کہ وزارت داخلہ انسانی اسمگلنگ میں ملوث نیٹ ورک کے خلاف کارروائی کر رہی ہے، یہ گروہ روس سے کام کرتا ہے تاکہ وہاں رہنے والے اور کیوبا میں رہنے والوں کو یوکرین  کی جنگی کارروائیوں میں حصہ لینے والے فوجی دستوں میں شامل کیا جاسکے۔
  روس کی وزارت دفاع نے فوری طور پر  اس معاملے پر رد عمل ظاہر کرنے کیلئے ’رائٹرز‘ کی جانب سے کی جانے والی درخواست کا جواب نہیں دیا۔ 
  کیوبا کی وزارت خارجہ کا کہنا ہے کہ حکام، انسانی اسمگلنگ کے نیٹ ورک کو ’ختم کرنے‘ کیلئے کارروائی کر رہے ہیں۔ 
  یادرہےکہ روس نے گزشتہ سال اپنی مسلح افواج میں ۳۰؍فیصد اضافہ کرتے ہوئے اسے ۱۵؍ لاکھ جنگی اہلکاروں تک پہنچانے کے منصوبے کا اعلان کیا تھا، یہ  بڑا اعلان اس وقت کیا گیا تھا ، جب جنگ میں نامعلوم لیکن بڑی تعداد میں ہلاکتوں کی وجہ سے روس کو مشکل ہو رہی تھی۔ مئی کے آخر میں ایک روسی اخبار نے اپنی رپورٹ میں دعویٰ کیا تھا کہ کیوبا کے کئی شہریوں نے روس کی مسلح افواج کے ساتھ معاہدے کئے جنہیں روسی شہریت کے بدلے یوکرین بھیج دیا گیا ہے۔
  کمیونسٹ زیر انتظام کیوبا  سے روس کے مضبوط سیاسی تعلقات ہیں، معاشی مشکلات سے بچنے کی خاطر کیوبا کے تارکین وطن کیلئے روس اہم منزل رہا ہے۔
  رواں سال کے شروع میں کیوبا اور روس کے وزرائے دفاع نے ماسکو میں ایک میٹنگ میں مشترکہ ’ٹیکنیکل فوجی منصوبوں‘ سے متعلق تبادلۂ خیال کیا تھا لیکن کیوبا کے صدر کا انتظامیہ، یوکرین تنازع میں ملوث ہونے کی تردید کرتا  رہا ہے۔
  وزارت خارجہ نے کہا کہ کیوبا، یوکرین جنگ کا حصہ نہیں ہے، کیوبا ہر شخص اور ملک کے خلاف بھرپور کارروائی کرے گا جو اس کے شہریوں کو کرائے کے فوجیوں کے طور پر بھرتی کرنے کے مقصد سے انسانی اسمگلنگ میں کسی طرح سے بھی حصہ لے گا۔