بڑے جانوروں کو لانے کی اجازت نہ ملنے کی وجہ سے کئی افراد قربانی کی ادائیگی سے محروم رہ گئے، صرف ۳۱۰؍جانوروں کی قربانی ادا کی گئی

عیدالاضحی کے موقع پر دیونار سلاٹر ہاؤس میں قربانی کیلئے دئیے جانے والے ممبئی ہائی کورٹ کے حکم کےبعد  انتظامیہ کی جانب سے ہونے والے انتظامات کےبعد بڑے جانوروں کی قربانی دیونار کے سلاٹرہاؤس میں کی گئی لیکن دیونار  انتظامیہ کے  ہی ذریعہ   قربانی کیلئے جو سرکیولر  جاری کیا گیا تھا  اس پر  خود ہی دیونار انتظامیہ کی جانب سے مبینہ  خلاف ورزی  کی گئی جس کے  سبب دیونار  مذبح میں بڑے جانور بہت ہی کم تعداد میں  آسکے۔
   دیونار سرکیولر کے حساب سے تینوں دن ملاکر ۴۵۰؍ بڑے جانور ذبح ہونے چاہئے تھے لیکن آن لائن خریدے گئے جانوروں کو لانے کی اجازت نہ ملنے کی جہ سے  اتنے بھی جانوروں کی قربانی نہیں ہوسکی ۔ تیسرے دن دیونار میں صرف ۱۴۴؍ ہی بھینس اور پاڑے ذبح ہوئے ۔ اس طرح۳؍دنوں میں ۴۵۰؍ جانوروں میں سے ۳۱۰؍ جانوروں کی قربانی اد ا کی گئی ۔
  آل انڈیا جمعیت القریش کے قومی نائب صدر عمران بابو قریشی نے نمائندۂ انقلاب سے گفتگو کرتے ہوئے کہا کہ دیونار میں بڑے جانو روں کی قربانی کے سلسلے میں۵؍ ہزار بڑے جانوروں کی قربانی کا مطالبہ کیا گیاتھا ۔ حالاں کہ ہر سال عید قرباں کے موقع پر ۱۰؍ سے ۱۲؍  ہزار بڑے جانوروں کی قربانی  ہوتی تھی ۔ عدالت نےدیونا ر میں قربانی کے جانوروں کےذبیحہ کیلئے کوئی تعداد نہیں بتائی تھی بلکہ دیونار انتظامیہ نے خود ہی سرکیولر جاری کرتے ہوئے  عیدالا ضحی کے پہلے ، دوسرے اور تیسرے دن ۱۵۰؍ کے حساب سے ۴۵۰؍ بڑے جانوروں کی قربانی کرنے کو کہا  تھا ۔  سرکیولر کے حساب سے پہلے    دن ۱۵۰؍میں سے صرف ۳۳؍ جانور دبح کئے گئے ۔دیونار انتظامیہ نے ہائی کورٹ کے حکم کی خلاف ورزی کئے جانے پر بامبے ہائی کورٹ کا دروازہ کھٹکھٹانے کیلئے وکلا ءسے صلاح ومشورہ کیا جارہا ہے۔   راشٹریہ امن سینا کے صدر عبدالباری خان  نےکہا کہ حکومت کی گائیڈ لائن کے مطابق کئی لوگوں نے عدالت کا حکم آتے ہی آن لائن بڑے جانور خریدلئے تھے لیکن انھیں دیونار میں جانور لانے کی اجازت نہیں دی گئی ۔دیونار میں موجود سید عبدالرحمان (عمران سر) محمد مزمل اور اقبال شیخ نے الزام لگایا کہ  ہم لوگوں کے علاوہ  دوسرے ۱۰۹ ؍افراد نے   بڑے جانوروں کی قربانی کیلئے آن لائن ممبئی اور دوسرے علاقوں  سے جانوروں کی خریداری کرلی تھی لیکن اجازت نہ ملنے کی وجہ سے قربانی کرنے سے محروم رہ گئے ۔
 دیونار مذبح کے ڈپٹی جنرل منیجر ڈاکٹر کلیم پٹھان کا کہنا ہے کہ  عیدالاضحیٰ کے آخری   دن تک آئے ہوئے  ۱۴۸؍ جانوروں میں سے ۱۴۴؍ جانو ر وں کی قربانی کی گئی ۔ فی الحال دیونار میں ۴؍ بڑے جانور رہ گئے ہیں ۔ اسی طرح پہلے دن ۳۳؍ اور دوسرے دن ۱۳۳؍ جانور ذبح کئے گئے تھے ۔اس کے علاوہ  قربانی کیلئے تینوں دنوں میں یومیہ  ۱۵۰؍ سے زائد قربانی کی اجازت نہیں تھی ۔