ریاستی وزیر برائے شہری ترقیات اور تھانے کےنگرں وزیر ایکناتھ شندے نے تھانے شہر کے پرائیویٹ اسپتالوں کے ڈاکٹروں سے درخواست کی ہے کہ وہ تھانے کے شہری بن کر کورونا کے مریضوں کا بہتر علاج کریںاور اسپتال داخل ہونے والے ہر مریض کی جان بچانے کی کوشش کریں۔

ریاستی وزیر برائے شہری ترقیات اور تھانے کےنگرں وزیر  ایکناتھ شندے نے تھانے  شہر کے پرائیویٹ اسپتالوں کے ڈاکٹروں سے درخواست کی ہے کہ وہ تھانے کے شہری بن کر کورونا کے مریضوں کا بہتر علاج کریںاور اسپتال داخل ہونے والے ہر  مریض کی جان بچانے کی کوشش کریں۔ ایکناتھ شندے نے اتوار کو ویڈویو کانفرنسنگ کے ذریعے  تھانے میونسپل کارپوریشن کے دفتر سے ڈاکٹروں سے بات چیت کی۔ اس موقع پر تھانے کے میئر نریش مہسکے ، رکن پارلیمان راجن وچارے ، میونسپل کمشنر ڈاکٹر وپن شرما بھی موجود تھے۔ شندے نے کہا کہ ’’یہ تشویش کی بات ہے کہ کووڈ کے  مریضوں کی اموات کی شرح بڑھ رہی ہے۔ اس شرح کو کم کرنے کیلئے ہم سب کو مل کر کام کرنے کی ضرورت ہے۔آج تک ہم سب ایک ٹیم کی حیثیت سے کام کر رہے ہیں۔‘‘ انہوں نے یہ بھی یقین دلایا کہ ڈکٹروں کو ہر ممکن  تعاون دیا جائے گا۔   ایکناتھ شندے نے کہا کہ تمام اسپتال ، خواہ وہ نجی ہوں یا سرکاری ، کووڈ کے مریضوں کی جان بچانے کے لئے ہر ممکن کوشش کرنی چاہئے۔ انہوں نے یہ بھی کہا کہ مستقبل میں ہونے والے بڑے نقصان سے بچنے کے لئے فائر آڈٹ ، الیکٹرک آڈٹ اور آکسیجن سسٹم کا آڈٹ کرنا ضروری ہے۔آکسیجن کی قلت ہر جگہ ہے لہٰذا  جن مریضوں کو آکسیجن کی ضرورت ہوتی ہے انہیں آکسیجن دیا جانا چاہئے۔ کارپوریشن ایمرجنسی میں ان کو آکسیجن کے لئے مدد کرے گی۔
  ایکناتھ شندے نے کہاکہ ہم سب کو لوگوں کو بچانے اوران کی گھبراہٹ ختم کرنے اور انہیں ذہنی سکون   دینے کیلئے تھانیکر کی حیثیت سے کام کرنا چاہئے۔  انہوں نے  وباء کے دوران کام کرنے پر ڈاکٹروں کو مبارکباد بھی دی۔
           ابتدا میں  میئر نریش مہسکے نے ڈاکٹروں سے بات چیت کرتے ہوئے کووڈ  سے نمٹنے میں انہیں درپیش مسائل پر تبادلۂ خیال کیا اورمیونسپل کارپوریشن کی جانب سے ضروری تعاون دینے کا یقین دلایا۔