بلوچستان میں امیدواروں کے دفاتر کے باہر دھماکے، ۲۷؍ ہلاک، عمران خان کی پارٹی نے فوج پر ’من پسند نتائج‘ کیلئے بدترین ’سیاسی انجینئرنگ‘ کا الزام عائد کیا
EPAPER
Updated: February 08, 2024, 10:54 AM IST | Islamabad
بلوچستان میں امیدواروں کے دفاتر کے باہر دھماکے، ۲۷؍ ہلاک، عمران خان کی پارٹی نے فوج پر ’من پسند نتائج‘ کیلئے بدترین ’سیاسی انجینئرنگ‘ کا الزام عائد کیا
پاکستان میں جمعرات کو قومی اسمبلی اور صوبائی اسمبلیوں کے الیکشن کے پیش نظر غیر معمولی سیکوریٹی انتظامات کئے گئے ہیں۔ ملک میں ۶؍ لاکھ ۵۰؍ ہزار سے زائد سیکوریٹی اہلکار تعینات کئےگئے ہیں، الیکشن کمیشن کے صدر دفتر کو چھاؤنی میں تبدیل کردیا گیاہے۔ اس کے باوجود بلوچستان میں ۲؍ مقامات پر امیدواروں کے دفاتر کے قریب دھماکوں میں ۲۷؍ افراد ہلاک ہوگئے ہیں۔
پاکستان میں ۱۲۸؍ ملین ووٹر جمعرات کو اپنے ملک کے نئے وزیراعظم کا فیصلہ بیلٹ بیکس میں محفوظ کردیںگے۔قومی اسمبلی کی ۳۳۶؍ سیٹوں کیلئےتقریباً ۱۸؍ ہزار امیدوار میدان میں ہیں۔ مقابلہ نواز شریف کی مسلم لیگ(ن)، بلاول بھٹو کی پاکستان پیپلز پارٹی ( پی پی پی) اور اڈیالہ جیل میں بند عمران خان کی تحریک انصاف پاکستان ( پی ٹی آئی) کے درمیان ہے مگر آثار وقرائن نواز شریف کی فتح کی جانب اشارہ کررہے ہیں۔ عمران خان اوران کی پارٹی کی مقبولیت کو ملک میں واضح طور پر محسوس کیا جاسکتاہے مگر ان کے امیدواروں نے انتظامیہ پر جانبداری کا الزام عائد کیا ہے۔
پی ٹی آئی نے جمعرات کی پولنگ سے قبل بدھ کو پھر الزام لگایا کہ ’’من پسند نتائج‘‘ کیلئے فوج نے ’’بدترین سیاسی انجینئرنگ‘‘ کی ہے۔ واضح رہے کہ ایک طرف جہاں نواز شریف اور بلاول بھٹو کی پارٹیوںکو بھر پور انتخابی مہم چلانے کا موقع ملا وہیں عمران خان کی پارٹی کے امیدواروں کو پولیس اور انتظامیہ کی سختی کا سامنا رہا۔