شمالی فرانس کے روبیکس شہر میں یہ میورل بنایا گیا ہے جس میں امریکی پالیسی پر شدید تنقید کی گئی ہے

امریکہ کے یومِ آزادی کے موقع پر گزشتہ دنوںشمالی فرانس کی ایک عمارت پر مجسمہ آزادی کے شرمندگی سے چہرہ چھپاتے ہوئے ایک میورل (دیواری تصویر) نصب کیا گیا جس کی تصویریں تیزی سے سوشل میڈیا پر وائرل ہوگئیں۔ ڈچ اسٹریٹ آرٹسٹ جوڈتھ ڈی لیو کا بنایا ہوا یہ میورل، جس کا نام ’مجسمہ آزادی کا خاموش احتجاج‘ ہے، ۴؍ جولائی کو فرانس کے روبیکس شہر میں اس وقت منظر عام پر آیا جب صدر ٹرمپ اپنے نام نہاد ’بگ، بیوٹی فل بل‘ پر دستخط کرنے کی تیاری کر رہے تھے۔ ڈی لیو نے بتایا کہ یہ میورل امریکہ کی ظالمانہ امیگریشن پالیسیوں اور یورپی یونین کے ساتھ اس کی ’نازک دوستی‘ کے تئیں ان کی تشویش کی عکاسی کرتا ہے۔
  ۱۸۸۵ء میں فرانس سے نیویارک پہنچنے والا مجسمہ آزادی امریکی اعلانِ آزادی کی سو سالہ سالگرہ پر  دوستی کے اظہار کے طور پر بنایا گیا تھا۔ فرانس نے عوامی فنڈس سے اس یادگار کا آرڈر دیا تھا اور چندہ جمع کرنے کی ایک کامیاب مہم کے بعد امریکہ میں اس کا چبوترہ تعمیر کیا گیا تھا۔ یاد رہے کہ امریکہ میں جو مجسمہ آزادی نصب ہے وہ فرانس کی جانب سے ہی تحفہ دیا گیا تھا ۔ اسی کا ایک نقش فرانس میں آج بھی نصب ہے۔ دریں اثناء  ڈی لیو کا میورل یہ سوال اٹھاتا ہے کہ کیا اس یادگار میں شامل آزادی کی مختلف ضمانتیں آج بھی موجود ہیں؟ڈی لیو نے ڈچ میڈیا کی ایک رپورٹ کا ذکر کیا جس میں ایک تارک وطن کو امریکہ میں اس کے گھر سے زبردستی نکالا جا رہا تھا جبکہ اس کا بچہ دروازے پر کھڑایہ سب دیکھ رہا تھا۔ فنکار نے کہا کہ ان کا رجحان ایک جوابی آرٹ ورک بنانے کا تھا۔ انہوں نے مزید کہا کہ اس منظر نے مجھے جھنجھوڑ کر رکھ دیا۔ میں اس طرح کی ناانصافی کا جواب دیئے بغیر نہیں  رہ سکتی۔ ڈی لیو نے بتایا کہ یہ کام مستقل ہے اور اسے روبیکس میں یو آر بی ایکس فیسٹیول اور میورل آرٹسٹ کلیکٹو   کے تعاون سے بنایا گیا تھا۔  ڈی لیو نے بتایا کہ گزشتہ سنیچر کو میورل کی تصویریں وائرل ہونے کے بعد انہیں ایک نوٹیفکیشن موصول ہوا ہے کہ ان کا انسٹاگرام اکاؤنٹ، جہاں انہوں نے سب سے پہلے میورل کی تصاویر پوسٹ کی تھیں، بند کیا جاسکتا ہے۔ اس کا مطلب یہ ہے کہ جہاں پیغام پہنچنا تھا وہ پہنچ گیا ہے۔