گرین پیس-فرانس نے دلیل دی کہ جب تک میکرون روس کے ساتھ تجارتی معاہدوں کو ختم نہیں کرتے اور یورپ کی سطح پر ایک پرجوش اور پائیدار ماحولیاتی تبدیلی کی شروعات نہیں کرتے، وہ اس عالمی شہرت یافتہ ثقافتی ادارے میں نمائش کے مستحق نہیں ہیں۔

ماحولیات کے تحفظ کے میدان میں سرگرم عالمی سطح پر معروف تنظیم گرین پیس کے کارکنوں نے پیر کو فرانس کے روس کے ساتھ تجارتی تعلقات کے خلاف احتجاج کیا۔ اس دوران مظاہرین نے فرانسیسی دارالحکومت پیرس کے ایک میوزیم سے صدر ایمانوئل میکرون کا مجسمہ چوری کیا اور اسے روسی سفارت خانے کے سامنے نصب کردیا۔

گرین پیس-فرانس نے پیر کو ایک پریس ریلیز میں تصدیق کی کہ آج صبح ۱۰:۳۰ بجے، تنظیم کے کارکنوں نے گریون میوزیم، پیرس سے ایمانوئل میکرون کا مجسمہ `ادھار` لیا تھا۔ تنظیم نے دلیل دی کہ جب تک میکرون روس کے ساتھ تجارتی معاہدوں کو ختم نہیں کرتے اور یورپ کی سطح پر ایک پرجوش اور پائیدار ماحولیاتی تبدیلی کی شروعات نہیں کرتے، وہ اس عالمی شہرت یافتہ ثقافتی ادارے میں نمائش کے مستحق نہیں ہیں۔

یہ بھی پڑھئے: جرمنی نے اسرائیل کو۵۵۰؍ ملین ڈالر سے زائد کے ہتھیاروں کی برآمدات کی منظوری دی

روس کے ساتھ تجارتی تعلقات پر تنقید

گرین پیس کے کارکنان، فرانس اور روس کے درمیان خاص طور پر گیس، جوہری توانائی اور کیمیائی کھادوں کے جاری لین دین، کے خلاف احتجاج کررہے تھے۔ تنظیم نے اپنے بیان میں کہا کہ یوکرین میں جنگ کے آغاز سے، صدر میکرون نے خود کو روسی فوج کے خلاف مزاحمت کے چیمپئن کے طور پر پیش کیا ہے جبکہ ان کی قیادت میں پیرس، گیس، کیمیائی کھادوں اور جوہری توانائی جیسے اسٹریٹجک شعبوں میں ماسکو کے ساتھ فعال طور پر تجارت جاری رکھے ہوئے ہیں۔

گرین پیس نے مطالبہ کیا کہ فرانس اور یورپی یونین، غیر تجدیدی ایندھن کے استعمال کو مرحلہ وار ختم کریں اور روس سے منسلک جوہری ایندھن کی درآمدات بند کریں۔ بیان میں مزید کہا گیا کہ گرین پیس-فرانس، روسی کیمیائی کھادوں کی درآمدات پر پابندیوں کے نفاذ اور فرانسیسی اور یورپی سرزمین پر ان کی درآمدات کو، اس انحصار کو دوسرے ممالک پر منتقل کئے بغیر، روکنے کا مطالبہ کرتی ہے۔