اتوار اور پیر کی درمیانی شب ڈیڑھ بجے آئل ٹینکر سے ٹکرانے کے بعد معتمرین کی بس شعلہ میں تبدیل ہوگئی ، صرف ایک نوجوان معجزاتی طور پر بچ پایا،وزیراعظم اور وزرائے اعلیٰ سمیت تمام اہم لیڈروں کا اظہار تعزیت، جسد خاکی ہندوستان لانے کی اپیل

سعودی عرب میں  اتوار اور پیر کی درمیانی شب ڈیڑھ بجے ایک نہایت دلخراش سانحہ میں  ہندوستان سے عمرہ کیلئے جانے والے  ۴۵؍افراد نے داعی ٔ اجل کو لبیک کہہ دیا۔ ان میں  ۴۴؍ کا تعلق تلنگانہ سے اور ایک کا  کرناٹک  سے تھا۔  معتمرین کی بس ڈیزل   سے بھرے ٹینکر سے ٹکرا گئی جس کے بعد جشم زدن میں  اس میں  آگ  لگ گئی ۔  بس میں ۴۶؍ افراد سوار تھے   جن میں سے ایک معجزاتی طو رپر بچ گیا۔ 
 حیدرآباد کے پولیس کمشنر وی سی سجنار نے ۴۵؍ افراد  کے جاں بحق ہونے کی تصدیق  کی ہے جبکہ سعودی حکام یا ہندوستانی  حکومت  نے اس خبر  کے لکھے جانے تک فوت ہونےوالوں کی تعداد  کے تعلق سے وضاحت نہیں کی ہے۔جدہ میں  ہندوستانی سفارتخانہ نے حادثہ کی جگہ پر صورتحال کا جائزہ لینے کیلئے  اپنے حکام روانہ کرنے کی اطلاع دیتے ہوئے کہا ہے کہ ’’فی الحال ہم ہلاکتوں کی درست تعداد نہیں بتا سکتے کیونکہ کاشوں کی شناخت کا عمل جاری ہے۔‘‘حیدرآباد  میں رشتہ داروں نے بتایا  ہے کہ حادثے کا شکار ہونے والی بس میں ایک ہی خاندان کی ۳؍ نسلوں پر مشتمل ۱۸؍ افراد  شامل تھے۔ شیخ نذیر الدین جو حیدرآباد کے وِدیا نگر کے  رہنے والے  اورریلوے کے سبکدوش ملازم تھے،  کے بھتیجے محمد اسلم نے بتایا کہ وہ اپنی اہلیہ، بیٹے، ۳؍ بیٹیوں اور نواسوں کے ساتھ عمرہ پر گئے تھے  اور مذکورہ بس میں  سوار تھے۔
 تلنگانہ حج کمیٹی کے مطابق جاں بحق ہونے والوں میں۱۰؍بچے  شامل  ہیں۔ وزیر اعظم نریندر مودی اور تلنگانہ و آندھرا پردیش کے وزرائے اعلیٰ  ریونت ریڈی اور این چندرابابو نائیڈو نے حادثے پر افسوس کا اظہار کیا ہے۔ وزیراعظم نریندر مودی اور کانگریس صدر ملکارجن کھرگے نیز مختلف ریاستوں  کے وزرائے اعلیٰ جن میں   ایم کے اسٹالن اور عمر عبداللہ شامل ہیں، نے بھی دکھ اور افسوس کا اظہار کیا ہے۔ حادثہ ہندوستانی وقت کے مطابق رات ۳۰:۱؍ بجے ہوا ۔ سجنار نے بتایا کہ عمرہ کیلئے ۵۴؍  افراد کا قافلہ ۹؍نومبر کو   روانہ ہواتھا اور ۲۳؍ نومبر کو اس کی واپسی تھی۔  عمرہ کی سعادت حاصل کرنے کے بعد جب قافلہ میں موجود افراد مکہ سے  مدینہ کیلئے روانہ ہوئے تو ۵۴؍ میں سے ۴؍ علاحدہ کار میں بیٹھے جبکہ ۴؍مکہ میں رُک گئے۔ اس طرح بس میں  ۴۶؍افراد  سوار تھے