اقوام متحدہ کی خصوصی مندوب برائے غزہ البانیز نے حقوق انسانی کونسل میں اسرائیل کو سخت تنقیدوں کا نشانہ بنایا

اقوام متحدہ کی خصوصی مندوب برائے غزہ فرانسسکا البانیز نے جنیوا میں اقوام متحدہ کی حقوق انسانی کونسل میں خطاب کرتے ہوئے غزہ میں امداد کی تقسیم کے نام نہاد امریکی اور اسرائیلی منصوبے کو انتہائی سخت تنقیدوں کا نشانہ بنایا ۔  البانیز نے کہا کہ غزہ میں صورتحال تباہی کی تمام حدیں عبور کر چکی ہے۔ انہوں نے امریکہ کے زیرسرپرستی چلنے والے ادارے غزہ ہیومنیٹرین فاؤنڈیشن کو ایک ایسا  موت کا جال قرار  دیا جو فلسطینیوں کو قتل یا جبری نقل مکانی پر مجبور کرنے کے  لئے بنایا گیا ہے۔
 فرانسسکا البانیز نے اپنی حالیہ رپورٹ میں بالکل واضح طور پر کہا کہ اسرائیل جدید تاریخ کی سب سے سفاک نسل کشی کی ذمہ دار ریاست ہے۔ اسے سبق سکھایا جانا ضروری ہے۔ البانیز کے مطابق عالمی برادری کو فوری طور پر اسرائیل پر مکمل اسلحہ پابندی لگانے، اس کے ساتھ تمام تجارتی اور سرمایہ کاری معاہدے معطل کرنے اور اس کی سیاسی و فوجی لیڈر شپ کو قانون کے کٹہرے میں لانے کی ضرورت ہے۔اگر یہ ابھی نہیں کیا گیا  تو غزہ میں جو انسانی بحران پیدا ہوا ہے وہ اتنا سنگین ہو جائے گا کہ پورا خطہ مشرق وسطیٰ اس کی لپیٹ میں آجائے گا۔ 
  یاد رہے کہ اس سے قبل ۱۷۱؍ بین الاقوامی فلاحی تنظیموں نے  اپنے مشترکہ بیان میں ’غزہ ہیومنیٹرین فاؤنڈیشن‘ کو فوراً بند کرنے کا مطالبہ کیا ہے۔ ان تنظیموں کا کہنا ہے کہ یہ ادارہ غزہ میں عام شہریوں کو موت یا شدید زخمی ہونے کے خطرے سے دوچار کررہا ہے۔بیان میں کہا گیا کہ فلسطینیوں کو ایک ناممکن انتخاب کا سامنا ہے ۔ یا تو بھوک سے مر جائیں یا خوراک کے حصول کی کوشش میں گولیوں کا سامنا کریں۔ اس بیان پر دستخط کرنے والی تنظیمیں عالمی طور پر معروف ہیں