انگلش پریمیئر لیگ میں سنسنی خیز مقابلوں کا سلسلہ جاری ہے۔ گزشتہ روز کھیلے گئے میچ میں مانچسٹر یونائیٹڈ نے انجری ٹائم میں گول کر کے ویسٹ ہیم کے خلاف میچ برابر کر دیا۔

انگلش پریمیئر لیگ میں سنسنی خیز مقابلوں کا سلسلہ جاری ہے۔ گزشتہ روز کھیلے گئے میچ میں مانچسٹر یونائیٹڈ نے انجری ٹائم میں گول کر کے ویسٹ ہیم کے خلاف میچ برابر کر دیا، جبکہ نیوکاسل کے ہاتھوں شکست نے ٹوٹنہم کے منیجر تھامس فرینک کی برطرفی کی تلوار مزید تیز کر دی ہے۔
مانچسٹر یونائیٹڈ کے منیجر مائیکل کیرک، جنہوں نے عہدہ سنبھالنے کے بعد مسلسل چار فتوحات حاصل کی تھیں، کل ویسٹ ہیم کے خلاف جیت کے تسلسل کو برقرار نہ رکھ سکے۔ ویسٹ ہیم نے ٹامس سوچیک کے گول کی بدولت برتری حاصل کر رکھی تھی، لیکن میچ کے ۹۶؍ ویں منٹ میں متبادل کھلاڑی بینجمن سیسکو نے شاندار گول کر کے یونائیٹڈ کو شکست سے بچا لیا۔مانچسٹر یونائیٹڈ ۴۵؍ پوائنٹس کے ساتھ چوتھے نمبر پر برقرار ہے۔ویسٹ ہیم کے لیے یہ ڈرا میچ بقا کی جنگ میں اہم ہے، تاہم وہ اب بھی ریلیگیشن زون سے محض دو پوائنٹس دور ہیں۔

یہ بھی پڑھئے:فیفا کا بڑا اعلان، ورلڈ کپ۲۰۲۶ء کی انعامی رقم میں غیر معمولی اضافہ

ٹوٹنہم ہاٹ اسپر کو اپنے ہوم گراؤنڈ پر نیوکاسل کے ہاتھوں ۱۔۲؍سے عبرت ناک شکست کا سامنا کرنا پڑا۔ اس شکست کے بعد اسٹیڈیم میں موجود شائقین نے منیجر تھامس فرینک کے خلاف نعرے بازی کی، جس سے ان کے مستقبل پر سوالیہ نشان لگ گیا ہے۔نیوکاسل کی جانب سے مالک تھیاؤ اور جیکب ریمزی نے گول کر کے اپنی ٹیم کو فتح دلائی۔ٹوٹنہم اب ریلیگیشن زون سے صرف پانچ پوائنٹس اوپر ہے، جو کلب کے لیے ایک تشویشناک صورتحال ہے۔

یہ بھی پڑھئے:عدالت کا حکم: کیری میناٹی کرن جوہر کے خلاف قابلِ اعتراض مواد نشر نہ کریں

اسٹیمفورڈ برج پر چیلسی نے لیڈز یونائیٹڈ کے خلاف ۰۔۲؍کی مضبوط برتری حاصل کرنے کے باوجود میچ  ۲۔۲؍ سے برابر کر دیا۔ کول پامر اور جواؤ پیڈرو کے گولز کے بعد ایسا لگ رہا تھا کہ چیلسی آسانی سے جیت جائے گی، لیکن لیڈز نے شاندار واپسی کرتے ہوئے ایک پوائنٹ چھین لیا۔چیلسی کے منیجر لیام روزنیئر نے اسے اپنی ٹیم کی "تحفے میں دی گئی ناکامی" قرار دیا ہے۔